ເນື່ອງໃນໂອກາດວັນດັ່ງກ່າວນີ້, ປະຊາຊົນ ສປປ ເກົາຫຼີ ແລະ ບຸກຄົນກ້າວໜ້າຂອງໂລກໄດ້ທົບທວນຄືນຄຸນງາມຄວາມດີອັນມະຫາສານດ້ວຍຈິດໃຈອັນສູງສົ່ງ ຊຶ່ງປະທານ ກິມອິນຊຸງ ໄດ້ສ້າງໄວ້ໃນພາລະກິດເພື່ອສ້າງສາປະເທດຊາດໃຫ້ມີຄວາມເຂັ້ມແຂງ, ປະຊາຊົນມີຄວາມຜາສຸກໃນພາລະກິດສັງຄົມນິຍົມ ແລະ ຄວາມເປັນເອກະລາດຂອງໂລກເປັນໄລຍະເວລາ 70 ປີ ນັບຕັ້ງແຕ່ເພິ່ນໄດ້ເລີ່ມອອກເດີນຕາມເສັ້ນທາງຂອງການປະຕິວັດແຕ່ອາຍຸຍັງໜຸ່ມນ້ອຍໃນໄວ 10 ປາຍປີ.
ນັບແຕ່ມື້ເພິ່ນເລີ່ມການປະຕິວັດ, ສະຫາຍ ກິມອິນຊຸງ ໄດ້ອະທິບາຍແຈ້ງເຖິງຄວາມຈິງເຖິງຫຼັກທີ່ວ່າເອກະລາດແມ່ນເສັ້ນຊີວິດຂອງມະຫາຊົນ ແລະ ເປັນສິ່ງທີ່ເຮັດໃຫ້ປະເທດຊາດມີຊີວິດຊີວາ, ໄດ້ກໍ່ຕັ້ງແນວຄວາມຄິດຈຸເຊທີ່ຖືເອົາມະຫາຊົນເປັນໃຈກາງ ແລະ ແກ້ໄຂທຸກບັນຫາຕາມສີສັນຂອງ ສປປ ເກົາຫຼີ ເພື່ອຜົນປະໂຫຍດຂອງປະຊາຊົນ ສປປ ເກົາຫຼີ ແລະ ເພື່ອໃຫ້ສອດຄ່ອງກັບສະພາບເງື່ອນໄຂອັນສະເພາະຂອງປະເທດໃນຕະຫຼອດໄລຍະຂອງການຊີ້ນຳການປະຕິວັດ.
ສະຫາຍ ກິມອິນຊຸງ ໄດ້ນໍາພາການຕໍ່ສູ້ຈົນບັນລຸຜົນສໍາເລັດໃນພາລະກິດປົດປ່ອຍຊາດດ້ວຍແຜນການອັນຍິ່ງໃຫຍ່ໃນການສ້າງສາປະເທດຊາດໃຫ້ມີຄວາມຮັ່ງມີ, ການເຮັດສົງຄາມກັບກຸ່ມຈັກກະພັດຕໍ່ຕ້ານປະຊາຊົນ ສປປ ເກົາຫຼີ, ພາລະກິດຟື້ນຟູ ແລະ ສ້າງສາປະເທດຊາດຫຼັງສົງຄາມ ແລະ ພາລະກິດການປະຕິວັດສັງຄົມໃນສອງໄລຍະ.
ເພິ່ນຍັງເຮັດໃຫ້ແນ່ໃຈວ່າການຫັນເປັນອຸດສາຫະກຳສັງຄົມນິຍົມເປັນຈິງໄດ້ຜ່ານການຂະຫຍາຍຕົວຂຶ້ນຢ່າງແຮງເໝືອນດັ່ງມ້າຕິດປີກອັນໄດ້ສ້າງພື້ນຖານທີ່ເຂັ້ມແຂງໃຫ້ກັບການສ້າງເສດຖະກິດທີ່ເພິ່ງພາຕົນເອງຂອງຊາດ.
ໃນໄລຍະເວລາແຫ່ງການນຳພາການປະຕິວັດ, ສະຫາຍ ກິມອິນຊຸງ ໄດ້ຍົກສູງຄັນທຸງແຫ່ງຈິດໃຈກຸ້ມຕົນເອງ, ເພິ່ງຕົນເອງ, ໄດ້ທັບມ້າງອຸປະສັກ, ຄວາມກົດດັນ, ການແຊກແຊງກິດຈະການພາຍໃນທຸກປະການຢ່າງເດັດດ່ຽວສາມາດສ້າງພື້ນຖານອັນໜັກແໜ້ນໃນການກຸ້ມຕົນເອງ, ເພິ່ງຕົນເອງ ແລະ ທ່າແຮງບົ່ມຊ້ອນແຫ່ງການພັດທະນາພາຍໃນ ຊຶ່ງເຮັດໃຫ້ສັງຄົມນິຍົມຕາມສີສັນຂອງ ສປປ ເກົາຫຼີ ນັບມື້ນັບໄດ້ຮັບການພັດທະນາຢ່າງບໍ່ຢຸດຢັ້ງທ່າມກາງພາຍຸລົມແຮງ.
ເພິ່ນແມ່ນບິດາຂອງປະເທດຊາດຜູ້ທີ່ເຕົ້າໂຮມເອົາປະຊາຊົນ ສປປ ເກົາຫຼີ ທີ່ຮັກປະເທດຊາດທຸກຄົນດ້ວຍຈິດໃຈອັນກວ້າງຂວາງຂອງເພິ່ນ. ເພິ່ນແມ່ນດວງອາທິດຂອງທຸກຄົນ, ບໍ່ພຽງແຕ່ເປັນການນຳຂອງພັກການເມືອງຕ່າງໆແລະ ປະມຸກລັດ ລວມໄປເຖິງບຸກຄົນສຳຄັນຂອງຫຼາຍໆປະເທດທົ່ວໂລກເທົ່ານັ້ນ, ແຕ່ຍັງລວມເຖິງບຸກຄົນທີ່ມີອຸດົມການ ແລະ ທັດສະນະການເມືອງທີ່ແຕກຕ່າງ, ເຄົາລົບບູຊາຢ່າງໜັກແໜ້ນ ແລະ ປະທັບໃຈກັບບຸກຄະລິກລັກສະນະອັນສູງສົ່ງຂອງເພິ່ນ.
ສະຫາຍ ກິມອິນຊຸງ ໄດ້ເຮັດສຳເລັດພາລະກິດສ້າງພັກ, ລັດ ແລະ ກອງທັບຈຸເຊອັນກາຍເປັນພື້ນຖານການເມືອງ ແລະ ການທະຫານທີ່ເຂັ້ມແຂງໃຫ້ແກ່ຜົນສຳເລັດຂອງການປະຕິວັດຈຸເຊ.
ເພິ່ນໄດ້ຫາທາງແກ້ໄຂອັນສົມບູນແບບໃຫ້ກັບບັນຫາຜູ້ສືບທອດການນຳ ທີ່ເປັນປັດໄຈຫຼັກໃນການສືບຕໍ່ພາລະກິດປະຕິວັດ ແລະ ສືບຕໍ່ມູນເຊື້ອການປະຕິວັດຢ່າງມີຄວາມບໍລິສຸດ ແລະ ຍັງໄດ້ຊີ້ນຳຄວາມພະຍາຍາມອັນຍິ່ງໃຫຍ່ເພື່ອສ້າງຄົນຮຸ່ນໃໝ່ໃຫ້ກາຍເປັນຜູ້ສືບທອດການປະຕິວັດ.
ດ້ວຍວຽກງານການຕ່າງປະເທດທີ່ຫ້າວຫັນຂອງເພິ່ນ, ເພິ່ນໄດ້ຍົກສູງພາລະບົດບາດ ແລະ ອຳນາດຂອງ ສປປ ເກົາຫຼີ ໃນເວທີສາກົນຢ່າງໂດດເດັ່ນ ແລະ ບັນລຸຜົນສຳເລັດອັນຍິ່ງໃຫຍ່ເພື່ອສ້າງຄວາມເຂັ້ມແຂງໃຫ້ກັບຂະບວນການສັງຄົມນິຍົມ ແລະ ການຍາດໄດ້ໄຊຊະນະຂອງພາລະກິດເອກະລາດຕ້ານລັດທິຈັກກະພັດ.
ປະທານ ກິມອິນຊຸງ ແລະ ປະທານ ໄກສອນ ພົມວິຫານ ແມ່ນຜູ້ສ້າງຕັ້ງສາຍພົວພັນ ແລະ ການຮ່ວມມືມິດຕະພາບອັນເປັນມູນເຊື້ອທີ່ມີມາແຕ່ດົນນານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ສປປ ເກົາຫຼີ - ສປປ ລາວ ຊຶ່ງສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງພາຍໃຕ້ຄັນທຸງຂອງພາລະກິດສັງຄົມນິຍົມ ແລະ ພາລະກິດເອກະລາດຕ້ານລັດທິຈັກກະພັດ.
ຜົນສຳເລັດທີ່ທ່ານປະທານໄດ້ອຸທິດຜ່ານມານັ້ນເປັນຜົນສຳເລັດອັນຍິ່ງໃຫຍ່ທີ່ບໍ່ເຄີຍມີມາກ່ອນໃນປະຫວັດສາດຂອງຊາດທີ່ແກ່ຍາວຫຼາຍພັນປີດ້ວຍແນວຄວາມຄິດ ແລະ ທິດສະດີອັນຍິ່ງໃຫຍ່, ຄວາມສາມາດໃນການນຳພາອັນໂດດເດັ່ນ ແລະ ການປະຕິວັດອັນຍິ່ງໃຫຍ່ຂອງສະຫາຍ ກິມອິນຊຸງ, ຜູ້ນຳທີ່ຍິ່ງໃຫຍ່ເພື່ອເປີດອະນາຄົດທີ່ສົດໃສຂອງປະເທດ ສປປ ເກົາຫຼີ ຈຸເຊຈະຖືກນຳໄປສູ່ປະຊາຊົນຮຸ່ນຕໍ່ໄປ.
ພາລະກິດປະຕິວັດຈຸເຊທີ່ໄດ້ເລີ່ມຂຶ້ນ ແລະ ນຳໄປສູ່ໄຊຊະນະໂດຍສະຫາຍ ກິມອິນຊຸງ ແລະ ສະຫາຍ ກິມເຈິງອິນ ກໍາລັງໄດ້ຮັບການສານຕໍ່ຢ່າງຕໍ່ເນື່ອງໂດຍ ສະຫາຍ ກິມເຈິງອຸນ ເລຂາທິການໃຫຍ່ພັກແຮງງານເກົາຫຼີ ປະທານກິດຈະການແຫ່ງລັດແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ ໃນປັດຈຸບັນ ແລະ ທຸກແຜນການອັນຍາວໄກ ແລະ ຄວາມປາຖະໜາຂອງສະຫາຍ ກິມອິນຊຸງ ຈະໄດ້ຮັບການປະຕິບັດໃຫ້ເປັນຮູບປະທໍາຢ່າງມີຜົນສຳເລັດ.
ຄໍາເຫັນ