ພິທີເຊັນບົດບັນທຶກຄວາມເຂົ້າໃຈລະຫວ່າງສູນການແພດຟື້ນຟູໜ້າທີ່ການ ແລະ ອົງການເພື່ອມະນຸດສະທໍາ ແລະ ການມີສ່ວນຮ່ວມ ປະຈຳລາວສໍາລັບໂຄງການຟື້ນຟູໜ້າທີ່ການຂັ້ນພື້ນຖານໃນຊຸມຊົນໄດ້ຈັດຂຶ້ນໃນວັນທີ 17 ມັງກອນ ນີ້ ທີ່ໂຮງແຮມແລນມາກ ນະຄອນຫຼວງວຽງຈັນ,ໂດຍການລົງນາມລະຫວ່າງ ທ່ານ ທອງເພັດ ສິດທິວັນ ຫົວໜ້າສູນການແພດຟື້ນຟູໜ້າທີ່ການ ກະຊວງສາທາລະນະສຸກແລະ ທ່ານ ເຣເນຍ ຄາຣາໄບ ຜູ້ຈັດການອົງການເພື່ອມະນຸດສະທໍາ ແລະ ການມີສ່ວນຮ່ວມ ປະຈໍາ ສປປ ລາວຊຶ່ງມີບັນດາຜູ້ຕາງໜ້າຈາກ ກະຊວງສາທາລະນະສຸກ, ກະຊວງການຕ່າງປະເທດ, ແລະ ກະຊວງສຶກສາທິການ ແລະ ກິລາ. ພ້ອມດ້ວຍຜູ້ຕາງໜ້າພາກສ່ວນກ່ຽວຂ້ອງ ຈາກແຂວງ ແລະ ເມືອງ ເປົ້າໝາຍຂອງໂຄງການເຂົ້າຮ່ວມ.
ໂຄງການຟື້ນຟູໜ້າທີ່ການຂັ້ນພື້ນຖານໃນຊຸມຊົນປະກອບມີ 3 ກິດຈະກໍາຫຼັກຄື: ສ້າງຂີດຄວາມເຂັ້ມແຂງ ໃຫ້ຜູ້ໃຊ້ບໍລິການເພື່ອຮັບປະກັນວ່າສາມາດເຂົ້າເຖິງການບໍລິການແບບມີສ່ວນຮ່ວມໄດ້ດີຂຶ້ນ, ຄຸນນະພາບການບໍລິການໄດ້ຮັບການປັບປຸງໃຫ້ມີຄວາມຍືນຍົງ ແລະ ຮັບປະກັນການຈັດຕັ້ງປະຕິບັດກອບວຽກງານ ແລະ ຍຸດທະສາດການມີສ່ວນຮ່ວມ.ໂຄງການຟື້ນຟູໜ້າທີ່ການຂັ້ນພື້ນຖານໃນຊຸມຊົນ ໄດ້ຮັບທຶນສະໜັບສະໜູນຈາກກະຊວງການຕ່າງປະເທດ ຂອງປະເທດລຸກຊໍາບວກ ໃນມູນຄ່າ 800.000 ເອີໂຣ ແລະ ມີໄລຍະເວລາຈັດຕັ້ງປະຕິບັດ ນັບແຕ່ມື້ທີ່ໄດ້ຮັບອະນຸມັດ ເຖິງ ວັນທີ 31 ທັນວາ 2027ຊຶ່ງຈະໄດ້ຖືກຈັດຕັ້ງປະຕິບັດ ຢູ່ 15 ບ້ານ ໃນ 3 ເມືອງ ຂອງ ແຂວງຫົວພັນ ຄື: ເມືອງຫົວເມືອງ, ຊໍາເໜືອ ແລະ ວຽງໄຊແລະ 10 ບ້ານ ໃນ 2 ເມືອງ ຂອງແຂວງຈຳປາສັກ ຄື: ນະຄອນປາກເຊ ແລະ ເມືອງບາຈຽງຈະເລີນສຸກ. ຈຸດປະສົງໂຄງການເພື່ອຍົກລະດັບຄຸນນະພາບການບໍລິການດ້ານການແພດຟື້ນຟູໜ້າທີ່ການ ເພື່ອເຮັດໃຫ້ຄົນພິການສາມາດເຂົ້າເຖິງການບໍລິການທີ່ມີຄຸນນະພາບ ແນໃສ່ປັບປຸງປັບຊີວິດການເປັນຢູ່ຂອງຄົນພິການໃຫ້ດີຂຶ້ນ ແລະ ມີສ່ວນຮ່ວມໃນສັງຄົມ. ສະເພາະການເຂົ້າເຖິງການບໍລິການທີ່ມິຄຸນນະພາບທາງດ້ານ ການຟື້ນຟູໜ້າທີ່ການ, ການສຶກສາ ແລະ ການບໍລິການດ້ານເສດຖະກິດ-ສັງຄົມແບບມີສ່ວນຮ່ວມ ຂອງຜູ້ທີ່ມີຄວາມເປັນພິການ ແລະ ຜູ້ດ້ອຍໂອກາດ, ໂດຍສະເພາະແມ່ຍິງ ແລະ ເດັກນ້ອຍ.
ຂ່າວ: ຍຸພິນທອງ(ຂໍ້ມູນຈາກອົງການ HI)