ກອງປະຊຸມສະຫຼຸບການຈັດຕັ້ງປະຕິບັດວຽກງານສາທາລະນະສຸກປະຈຳປີ 2023 ແລະ ແຜນພັດທະນາສາທາລະນະສຸກປະຈຳປີ 2024 ພາຍໃຕ້ຫົວຂໍ້ “ຍົກສູງຄຸນນະພາບການບໍລິການສາທາລະນະສຸກ ໂດຍການຫັນການບໍລິຫານຄຸ້ມຄອງໄປສູ່ລະບົບທັນສະໄໝ” ໄດ້ຈັດຂຶ້ນໃນວັນທີ 15 ກຸມພາຜ່ານມາ ທີ່ຖ້ຳຊ້າງລອດ ເມືອງວຽງໄຊ ແຂວງຫົວພັນ ໂດຍການເປັນປະທານຂອງທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ມີຮອງລັດຖະມົນຕີ, ຄະນະອະທິການບໍດີ, ສະຖາບັນ, ອໍານວຍການໂຮງໝໍສູນກາງ ແລະ ສູນຕ່າງໆເຂົ້າຮ່ວມ.

ທ່ານ ບຸນແຝງ ພູມມະໄລສິດ ກ່າວວ່າ: ໃນໄລຍະ 1 ປີຜ່ານມາຂະແໜງສາທາລະນະສຸກໄດ້ມີຜົນສໍາເລັດຫຼາຍດ້ານ ອັນພົ້ນເດັ່ນແມ່ນການຈັດຕັ້ງປະຕິບັດເປົ້າໝາຍ 11 ຕົວຊີ້ບອກທີ່ສະພາແຫ່ງຊາດຮັບຮອງ ແລະ ຢູ່ຫຼາຍແຂວງກໍໄດ້ພະຍາຍາມສູ້ຊົນຈັດຕັ້ງປະຕິບັດໃຫ້ມີຄວາມຄືບໜ້າ ເຖິງວ່າບໍ່ບັນລຸທັງໝົດກໍຕາມ. ສຳລັບການຈັດຕັ້ງປະ ຕິບັດວຽກງານວິຊາສະເພາະຂອງ 7 ແຜນງານສາທາລະນະສຸກ, ບັນດາໂຄງການ ແລະ ກິດຈະກໍາຕ່າງໆ ຂັ້ນສູນກາງ ແລະ ທ້ອງຖິ່ນມີຄວາມຄືບໜ້າທີ່ດີ ແຕ່ຍັງມີຫຼາຍບັນຫາສິ່ງທ້າທາຍເຮັດໃຫ້ການປະຕິບັດບາງກິດຈະກຳບໍ່ສາ ມາດບັນລຸໄດ້ຕາມແຜນການທີ່ວາງໄວ້.

ກອງປະຊຸມຄັ້ງນີ້, ໄດ້ສຸມໃສ່ປຶກສາຫາລືບັນດາວຽກງານທີ່ສໍາຄັນ ແລະ ໄດ້ຕົກລົງເປັນເອກະພາບຄື: ສະຫຼຸບຕີລາຄາຜົນສໍາເລັດ, ສິ່ງຄົງຄ້າງ ແລະ ທ້າທາຍໃນການຈັດຕັ້ງປະຕິບັດແຜນພັດທະນາສາທາລະນະສຸກປະຈໍາປີ 2023 ແລະ ທິດທາງແຜນການປີ 2024 ເພື່ອໃຫ້ບັນລຸ 11 ຕົວຊີ້ບອກທີ່ສະພາແຫ່ງຊາດໄດ້ຮັບຮອງ ໂດຍສຸມໃສ່ຈັດຕັ້ງປະຕິບັດປັບປຸງຄຸນນະພາບຂອງການບໍລິການສາທາລະນະສຸກໃຫ້ທົ່ວເຖິງ ແລະ ມີີຄຸນນະພາບດີຂຶ້ນກວ່າເກົ່າ; ຄົ້ນຄວ້າປຶກສາຫາລືບັນຫາທີ່ພົ້ນເດັ່ນ ເປັນຕົ້ນການຈັດຕັັ້ງປະຕິບັດວຽກງານການເງິນ, ການຈັດສັນງົບປະມານປີ 2023 ແລະ ແຜນການປີ 2024, ການຫັນໂຮງໝໍກຸ້ມຕົນເອງ, ວຽກງານກອງທຶນປະກັນສຸຂະພາບ ແລະ ທິດທາງເພື່ອບັນລຸສຸຂະພາບທົ່ວປວງຊົນ, ການສ້າງກົນໄກການປະສານງານເພື່ອບັນລຸ 11 ຕົວຊີ້ບອກທີ່ສະພາຮັບຮອງ, ການປະຕິບັດ ນະໂຍບາຍ 5 ດີ 1 ພໍໃຈ, ການຍົກລະດັບຄຸນນະພາບຂອງສະຖານທີ່ບໍລິການ, ການກໍ່ສ້າງ-ບັນຈຸ, ຊັບຊ້ອນບຸກຄະກອນສາທາລະນະສຸກ, ການສົ່ງເສີມກົນໄກການສະໜອງຢາ ແລະ ອຸປະກອນການແພດ.

(ແຫຼ່ງຂ່າວ: ຂປລ)