ທີມນັກກິລາເຕະບານນັກຮຽນຊາຍ ຈາກແຂວງຫຼວງພະບາງ ແລະ ທິມນັກກິລາເຕະບານນັກຮຽນຍິງ ຈາກແຂວງຈໍາປາສັກ ສາມາດຍາດໄດ້ແຊັມ ໃນການແຂ່ງຂັນກິລາເຕະບານນັກຮຽນມັດທະຍົມສຶກສາ ທົ່ວປະເທດ ຊີງຂັນກະຊວງສຶກສາທິການ ແລະ ກິລາ (ສສກ) ຄັ້ງທີ VII ລາຍການ Copa Coca-Cola Laos 2024 ລະຫວ່າງວັນທີ 21 ຕຸລາ ຫາ ວັນທີ 29 ພະຈິກ 2024 . ພິທີຊີງຮອບສຸດທ້າຍປິດການແຂ່ງຂັນເຕະບານ ລາຍການດັ່ງກ່າວ ຈັດຂຶ້ນໃນວັນທີ 29 ພະຈິກ ຜ່ານມາ ຢູ່ສະໜາມລ້ານຊ້າງ ສະເຕດ້ຽມ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ເປັນກຽດເຂົ້າຮ່ວມ ແລະ ມອບລາງວັນຂອງ ທ່ານ ສໍາລານ ພັນຄະວົງ ຮອງລັດຖະມົນຕີກະຊວງ ສສກ, ທ່ານ ສີຈັນ ຈິດຕະປັນຍາ ວ່າການຫົວໜ້າກົມກິລາລະດັບສູງ ກະຊວງ ສສກ, ທ່ານ ພະສິນ ປັນດີ ຜູ້ຈັດການໃຫຍ່ບໍລິສັດ ລາວ ໂຄຄາ-ໂຄລາ ບ໊ອຕຕລິງ ຈໍາກັດ, ທ່ານ ຄໍາຫວັນ ນັນທະວົງ ປະທານສະຫະພັນກິລາບານເຕະ ນະຄອນຫຼວງວຽງຈັນ ພ້ອມດ້ວຍບັນດາຫົວໜ້າກົມ-ຮອງກົມ ຫົວໜ້າພະແນກ-ຮອງຫົວໜ້າພະແນກ ອ້ອມຂ້າງກະຊວງ ສສກ ບັນດາຄູຝຶກ ນັກກິລາ ຕະຫຼອດຮອດກອງເຊຍ ເຂົ້າຮ່ວມຢ່າງເປັນຂະບວນຟົດຟື້ນ.

ທ່ານ ສຸລິວັນ ເຊີນວິໄລ ຜູ້ອໍານວຍການສະຖາບັນກິລາ-ກາຍຍະກໍາ ຫົວໜ້າເຕັກນິກຈັດການແຂ່ງຂັນ ໄດ້ຂຶ້ນລາຍງານໃຫ້ຮູ້ວ່າ: ການແຂ່ງຂັນດັ່ງກ່າວ ເລີ່ມແຕ່ວັນທີ 21 ຕຸລາ 2024 ແມ່ນຮອບຄັດເລືອກທົ່ວນະຄອນຫຼວງວຽງຈັນ ເພື່ອຄັດເລືອກເອົາທີມຊະນະເລີດ ທີມຊາຍ 4 ທີມ ແລະ ທີມຍິງ 2 ທີມ ເປັນຕົວແທນຂອງນະຄອນຫຼວງ,​ ວັນທີ 12-14 ພະຈິກ 2024 ຮອບຄັດເລືອກແຂວງພາກເໜືອ ຈັດຢູ່ແຂວງອຸດົມໄຊ ເພື່ອຄັດເລືອກເອົາທີມຊາຍ 2 ແລະ ທີມຍິງ 1 ເປັນຕົວແທນເຂດພາກເໜືອ ແລະ ວັນທີ 19-21 ພະຈິກ 2024 ຮອບຄັດເລືອກເຂດພາກໃຕ້ ຈັດຢູ່ແຂວງສະຫວັນນະເຂດ ເພື່ອຄັດເລືອກເອົາທີມຊາຍ 2 ແລະ ທີມຍິງ 1 ເປັນຕົວແທນເຂດພາກໃຕ້.

ຜ່ານການຄັດເລືອກປະກົດວ່າ: ຕົວແທນຂອງນະຄອນຫຼວງວຽງຈັນ ມີ 4 ທີມຊາຍ: ໂຮງຮຽນ ມສ ດອນໜູນ (ເມືອງໄຊທານີ),​ ໂຮງຮຽນ ມສ ເຄເອັນຊີ (ເມືອງຫາດຊາຍຟອງ),​ ໂຮງຮຽນ ມປ ໂນນສະຫວ່າງ (ເມືອງໄຊເສດຖາ) ແລະ ໂຮງຮຽນ ມສ ນາຊາຍທອງ (ເມືອງນາຊາຍທອງ) ແລະ 2 ທີມຍິງ ໂຮງຮຽນ ມສ ໂຄກສີວິໄລ (ເມືອງໄຊທານີ) ແລະ ໂຮງຮຽນ ມສ ສົມສະຫວາດ (ເມືອງປາກງື່ມ) ສ່ວນຕົວແທນເຂດພາກເໜືອ 2 ທີມຊາຍ ມີແຂວງຫຼວງນໍ້າທາ ແລະ ແຂວງຫຼວງພະບາງ 1 ທີມຍິງ ແຂວງຫຼວງພະບາງ ແລະ ຕົວແທນເຂດພາກໃຕ້ 2 ທີມຊາຍ ມີແຂວງສະຫວັນນະເຂດ ແລະ ແຂວງສາລະວັນ 1 ທີມຍິງ ແຂວງຈໍາປາສັກ.

ຜ່ານການແຂ່ງຂັນຜົນປະກົດວ່າ: ປະເພດທີມຊາຍ ຊະນະເລີດ (ທີ1) ແຂວງຫຼວງພະບາງ; ທີ 2 ມສ ດອນໜູນ ຈາກນະຄອນຫຼວງວຽງຈັນ ແລະ ທີ 3 ມສ ເຄເອັນຊີ ຈາກນະຄອນຫຼວງວຽງຈັນ.

ສ່ວນປະເພດທີມຍິງ ຊະນະເລີດ ແຂວງຈໍາປາສັກ; ທີ 2 ມສ ໂຄກສີວິໄຊ ຈາກນະຄອນຫຼວງວຽງຈັນ ແລະ ທີ 3 ແຂວງຫຼວງພະບາງ . ສໍາລັບຂອງຂວັນລາງວັນ ທັງ 2 ປະເພດ ແມ່ນໄດ້ຮັບເທົ່າກັນ ຄື: ຊະນະເລີດ ໄດ້ຮັບຂັນ 1 ໜ່ວຍ ຫຼຽນລາງວັນ 25 ຫຼຽນ ພ້ອມເງິນລາງວັນ 50 ລ້ານກີບ ມີຜະລິດຕະພັນອື່ນໆ 20 ລ້ານກີບ ລວມມູນຄ່າທັງໝົດ 70 ລ້ານກີບ; ທີ 2 ໄດ້ຮັບຫຼຽນລາງວັນ 25 ຫຼຽນ ພ້ອມເງິນລາງວັນ 30 ລ້ານກີບ ມີຜະລິດຕະພັນອື່ນໆ 10 ລ້ານກີບ ລວມມູນຄ່າທັງໝົດ 40 ລ້ານກີບ ແລະ ທີ 3 ໄດ້ຮັບຫຼຽນລາງວັນ 25 ຫຼຽນ ພ້ອມເງິນລາງວັນ 15 ລ້ານກີບ ມີຜະລິດຕະພັນອື່ນໆ 5 ລ້ານກີບ ລວມມູນຄ່າທັງໝົດ 20 ລ້ານກີບ.

(ຂ່າວ-ພາບ: ຕຸໄລເພັດ)