ຕອນເຊົ້າວັນທີ 2 ທັນວານີ້, ການນໍາແຂວງຫຼວງພະບາງ ນໍາໂດຍ ສະຫາຍ ສຸກັນ ບຸນຍົງ ຮອງເລຂາບໍລິຫານງານພັກແຂວງ ໄດ້ເຂົ້າວາງພວງມາລາຢູ່ອະນຸສາວະລີນັກຮົບນິລະນາມ ແລະ ກະຕ່າດອກໄມ້ຢູ່ໜ້າຮູບຫຼໍ່ຂອງ ປະທານ ໄກສອນ ພົມວິຫານ, ທ່ານ ປະທານ ສຸພານຸວົງ ໂອກາດ ວັນຊາດ ທີ 2 ທັນວາ ວັນທີ່ 2 ທັນວາ ຄົບຮອບ 49 ປີ ແລະ ວັນເກີດຂອງ ປະທານ ໄກສອນ ພົມວິຫານ ວັນທີ່ 13 ທັນວາ ຄົບຮອບ 104 ປີ.

ການວາງພວງມາລາ ແລະ ກະຕ່າດອກໄມ້ໃນຄັ້ງນີ້, ເປັນການສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ ເຖິງຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈໍານົນຂອງບັນພະບູລຸດລາວ ກໍຄືບັນດານັກຮົບປະຕິວັດ ທີ່ໄດ້ເສຍສະຫຼະຊີວິດ, ເລືອດເນື້ອ ເພື່ອພາລະກິດປະຕິວັດຢ່າງອົງອາດກ້າຫານ ພາຍໃຕ້ການຊີ້ນຳ-ນຳພາຂອງພັກປະຊາຊົນ ປະຕິວັດລາວ ຈົນສາມາດຍາດໄດ້ໄຊຊະນະອັນໃຫຍ່ຫຼວງ ແລະ ປະກາດເອກະລາດ, ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975. ຊຶ່ງບັນດາການນຳຂອງແຂວງ ໄດ້ກ່າວຄຳປະຕິຍານ ຕໍ່ໜ້າອະນຸສາວະລີນັກຮົບນິລະນາມ ແລະ ຮູບຫຼໍ່ຂອງປະທານ ໄກສອນ ພົມວິຫານ, ທ່ານ ປະທານ ສຸພານຸວົງ ວ່າ: ຈະຮ່ຳຮຽນເອົາຄຸນສົມບັດ, ສິນທຳປະຕິວັດ, ແບບຢ່າງອັນດີເລີດຂອງນັກຮົບນິລະນາມ, ວິລະຊົນແຫ່ງຊາດ, ພະນັກງານການນຳຮຸ່ນກ່ອນ ແລະ ຈົ່ງຮັກພັກດີ ຕໍ່ອຸດົມການຂອງພັກ, ຈະຕັ້ງໜ້າຈັດຕັ້ງປະຕິບັດ, ຜັນຂະຫຍາຍ ມະຕິກອງປະຊຸມໃຫຍ່ ອົງຄະນະພັກແຂວງຫຼວງພະບາງ ແລະ ກອງປະຊຸມໃຫຍ່ຜູ່ແທນທົ່ວປະເທດ ວາງອອກໃຫ້ປະກົດຜົນເປັນຈິງ.