ຂ່າວຕ່າງປະເທດລາຍງານ ເມື່ອບໍ່ດົນມານີ້ວ່າ: ທະນາຄານພັດທະນາອາຊີ (ADB) ໄດ້ອະນຸມັດເງິນກູ້ຢືມຕາມນະໂຍບາຍ ມູນຄ່າ 50 ລ້ານໂດລາ ເພື່ອສະໜັບສະໜູນຄວາມພະຍາຍາມຂອງກຳປູເຈຍໃນການສ້າງສະພາບແວດລ້ອມທາງດ້ານທຸລະກິດທີ່ເປັນມິດກັບການລົງທຶນ ແລະ ຍົກລະດັບທຸລະກິດຕ່າງໆໃຫ້ມີຄວາມສາມາດທາງການແຂ່ງຂັນສູງຂຶ້ນ ແລະ ຫຼຸດອຸປະສັກທາງການຄ້າ.

ທະນາຄານ ADB ຖະແຫຼງວ່າ: ໂຄງການຍ່ອຍທີ່ສອງຂອງໂຄງການການຄ້າ ແລະ ຄວາມສາມາດທາງການແຂ່ງຂັນກຳລັງຊຸກຍູ້ຄວາມພະຍາຍາມຂອງລັດຖະບານກຳປູເຈຍ ໃນການນຳໃຊ້ນະໂຍບາຍຈາກການລົງທຶນຂອງພາກເອກະຊົນມາບັນລຸການຂະຫຍາຍຕົວທີ່ເພີ່ມຂຶ້ນ ກວມລວມ ແລະ ຍືນຍົງ ເພື່ອຍົກລະດັບຊີວິດການເປັນຢູ່ຂອງປະຊາຊົນ.

ທ່ານ ໂຍດສະນະ ວາຣມາ ຜູ້ອຳນວຍການທະນາຄານ ADB ປະຈຳກຳປູເຈຍ ກ່າວວ່າ: ໂຄງການນີ້ສະໜັບສະໜູນ ຄວາມຕັ້ງໃຈ ADB ໃນການຍົກລະດັບຄວາມສາມາດທາງເສດຖະກິດຂອງກຳປູເຈຍ ແລະ ສ້າງລະບົບນິເວດທີ່ດີຍິ່ງຂຶ້ນ ເພື່ອການຂະຫຍາຍຕົວຂອງທຸລະກິດ ຊຶ່ງກ້າວສູ່ການລົງທຶນເພີ່ມຂຶ້ນ, ການສ້າງວຽກເຮັດງານທຳ ແລະ ການຂະຫຍາຍຕົວທາງເສດຖະກິດ ທີ່ຍືນຍົງ.

ໂຄງ​ການ​ນີ້​ເນັ້ນໃສ່ວິ​ສາ​ຫະ​ກິດ​ຂະ​ໜາດ​ກາງ, ​ຂະ​ໜາດນ້ອຍ, ຈຸນລະວິສາຫະກິດ ຫຼື (MSMEs) ທີ່​ປຽບສະເໝືອນກະດູກສັນຫຼັງຂອງ​ເສດ​ຖະ​ກິດ​ກໍາ​ປູ​ເຈຍ ​ແລະ ການຂະຫຍາຍຕົວຂອງວິສາຫະກິດກຸ່ມນີ້ຍັງມີຄວາມສຳຄັນຕໍ່ການຂັບເຄື່ອນຄວາມສາມາດທາງການແຂ່ງຂັນ.

ທະນາຄານ ADB ເນັ້ນສະໜັບສະໜູນວິສາຂະກິດເຫຼົ່ານີ້ ສ້າງຄວາມຫຼາກຫຼາຍ ແລະ ນຳໃຊ້ເຂົ້າໃນແນວທາງດີຈີຕອນ ແລະ ເພີ່ມຜົນຜະລິດ ໂດຍຜ່ານແຮງຈູງໃຈແບບເນັ້ນເປົ້າໝາຍ, ໂດຍໂຄງການນີ້ ເນັ້ນຊຸກຍູ້ການຄ້າຂ້າມແດນທີ່ສະດວກ ແລະ ມີປະສິດທິພາບຂຶ້ນດ້ວຍການປັບປຸງລະບຽບ ລວມເຖິງຫຼຸດຂະບວນການ ແລະ ອຸປະສັກທາງການຄ້າ ເພື່ອກໍາປູເຈຍ ຢູ່ໃນຕຳແໜ່ງທີ່ດີຂຶ້ນໃນຕະຫຼາດລະດັບພາກພື້ນ ແລະ ລະດັບໂລກ.

ທັງນີ້, ADB ກ່າວຕື່ມວ່າ: ໂຄງການນີ້ຈະນຳໄປສູ່ການລົງທະບຽນໃນລະບົບການລົງທະບຽນທຸລະກິດອອນລາຍຂອງວິສາຫະກິດກຸ່ມນີ້ ປະມານ 50,000 ຄົນ ແລະ ມີການອອກໃບອະນຸຍາດ, ໃບຮັບຮອງ ແລະ ໃບອະນຸຍາດທາງທຸລະກິດທີ່ຈຳເປັນ ສະບັບອອນລາຍພາຍໃນປີ 2027 ລວມເຖິງມອບສິ່ງຈູງໃຈ ແລະ ການສະໜັບສະໜູນທາງເຕັກໂນໂລຊີແກ່ວິສາກິດກຸ່ມນີ້ ເພື່ອຊຸກຍູ້ການຂະຫຍາຍຕົວໃນຂະແໜງທຸລະກິດຍຸດທະສາດ ແລະ ການຍົກລະດັບລະບົບຕ່ອງໂສ້ມູນຄ່າ.