ຫ້ອງການກະສິກຳ ແລະ ປ່າໄມ້ເມືອງບໍ່ແຕນ ແຂວງໄຊຍະບູລີ ໄດ້ຈັດພິທີສະເຫຼີມສະຫຼອງ 3 ວັນທີ່ສໍາຄັນຄື: ວັນຊົນລະປະທານ ແຫ່ງຊາດ, ວັນສັກຢາກັນພະຍາດສັດແຫ່ງຊາດ ແລະ ວັນເປີດຂະບວນການຜະລິດລະດູແລ້ງຂຶ້ນໃນອາທິດຜ່ານມານີ້ ຢູ່ທີ່ບ້ານໜອງປະຈີດ ໂດຍການເຂົ້າຮ່ວມຂອງ ທ່ານ ບຸນພະລັງ ວິໄລສັກ ວ່າການເຈົ້າເມືອງບໍແຕນ, ມີຫົວໜ້າຫ້ອງການ, ອົງການ, ກົມກອງ, ນັກທຸລະກິດ ຜູ້ປະກອບການ, ນາຍບ້ານ, ຕະຫຼອດຮອດ ປະຊາຊົນໃນບ້ານດັ່ງກ່າວເຂົ້າຮ່ວມ.

ໃນພິທີ, ທ່ານ ກົງກຽນ ຄະນະສູດ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄດ້ຜ່ານບົດລາຍງານການສະເຫຼີມສະຫຼອງ 3 ວັນດັ່ງກ່າວ. ໃນໄລຍະຜ່ານມາພັກ ແລະ ລັດຖະບານ ກໍມີແນວທາງນະໂຍບາຍ, ລະບຽບກົດ ໝາຍວ່າດ້ວຍຊົນລະປະທານ ແລະ ກົດໝາຍຄຸ້ມຄອງສັດ ເຂົ້າ-ອອກ ຢ່າງຈະແຈ້ງ ເພື່ອເປັນການສົ່ງເສີມໃນການປູກພືດ ແລະ ລ້ຽງສັດໃຫ້ມີການຂະຫຍາຍຕົວຂຶ້ນ. ສໍາລັບເມືອງບໍ່ແຕນໄດ້ເອົາໃຈໃສ່ສົ່ງເສີມ ການປູກພືດລະດູແລ້ງຊະນິດຕ່າງໆ ເພື່ອບໍລິໂພກພາຍໃນເມືອງ ຊຶ່ງສາມາດສະໜອງພືດຜັກຮັບໃຊ້ພາຍໃນເມືອງໄດ້ໂດຍພື້ນຖານ. ປັດຈຸບັນທົ່ວເມືອງບໍ່ແຕນມີຊົນລະປະທານ 107 ແຫ່ງ. ໃນນີ້ ຖາວອນ 13 ແຫ່ງ, ສາມາດສະໜອງນໍ້າໃຫ້ແກ່ການຜະລິດລະດູຝົນ ໄດ້ທັງໝົດ 686.72 ເຮັກຕາ ແລະ ລະດູແລ້ງໄດ້ 645 ເຮັກຕາ ໂດຍແນໃສ່ການປູກເຂົ້ານາແຊງ, ປູກສາລີຫວານ, ໝາກແຕງ, ໝາກຖົ່ວ ແລະ ພືດອື່ນໆ ທີ່ມີເງື່ອນໄຂເໝາະສົມກັບສະພາບຕົວຈິງຂອງທ້ອງຖິ່ນເພື່ອໃຫ້ມີພືດ-ຜັກບໍລິໂພກພາຍໃນເມືອງ ແລະ ຫຼຸດຜ່ອນການນໍາເຂົ້າພືດຜັກອັນບໍ່ຈໍາເປັນຈາກບ່ອນອື່ນ. ສຳລັບໃນລະດູແລ້ງປີນີ້ ໄດ້ວາງຄາດໝາຍສູ້ຊົນແຜນການປູກເຂົ້ານາແຊງ 4.46 ເຮັກຕາ, ສາລີຫວານ 86.18 ເຮັກຕາ,ຖົ່ວດິນແລ້ງ 67.10 ເຮັກຕາ, ໝາກໂມ 246.5 ເຮັກຕາໝາກແຕງ 3.75 ແລະ ພືດຜັກຕ່າງໆ 149.11 ເຮັກຕາ.

ໃນໄລຍະ 1 ປີຜ່ານມາ ສາມາດສັກຢາກັນພະຍາດສັດລ້ຽງໄດ້ທັງໝົດ 5,063 ໂຕ. ໃນນີ້ ປະກອບມີ : ຄວາຍຈຳນວນ 375 ໂຕ, ງົວຈໍານວນ 4.269 ໂຕ, ໝູຈໍານວນ 205 ໂຕ, ສັກຢາກັນວໍ້ໝາ 55ໂຕ. ໃນພິທີດັ່ງກ່າວ, ຍັງໄດ້ຮ່ວມກັນສັກຢາສັດ ແລະ ລົງຕິດຕາມການປູກໝາກໂມຂອງບໍລິສັດ ວຽງແກ້ວຢູ່ທີ່ ບ້ານໜອງປະຈີດ.

(ຂ່າວ-ພາບ: ສາຍຄຳ ບຸນຍາວົງ)