ໃນອາທິດຜ່ານມານີ້ ຢູ່ທີພະທາດຈຽງຕຶງ ເມືອງສິງ ແຂວງຫຼວງນໍ້າທາ ໄດ້ຈັດພິທີບຸນນະມັດສະການ ແລະ ປະກາດຮັບຮອງພະທາດຫຼວງຈຽງຕືງເປັນມໍລະດົກແຫ່ງຊາດ ເພື່ອເປັນການສົ່ງເສີມປີທ່ອງທ່ຽວລາວ 2024 ໂດຍການເປັນປະທານຮ່ວມຂອງທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ, ທ່ານ ນາງ ສວນສະຫວັດ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ມີຮອງເຈົ້າຮອງ, ແຂກຖຶກເຊີນ ຕະຫຼອດຊາວເມືອງສິງເຂົ້າຮ່ວມຢ່າງຫຼວງຫຼາຍ.

ທ່ານ ສີວິໄລ ປັນແກ້ວ ຮອງເຈົ້າແຂວງຫຼວງນໍ້າທາ ຜູ້ຊີ້ນໍາວຽກງານຂົງເຂດວັດທະນະທໍາ-ສັງຄົມຂັ້ນແຂວງ ລາຍງານການກະກຽມບຸນນະມັດສະການ ແລະ ປະກາດຮັບຮອງເປັນມໍລະດົກແຫ່ງຊາດ ວ່າ: ປີນີ້, ລັດຖະບານແຫ່ງ ສປປ ລາວ ໄດ້ກໍານົດເອົາປີ 2024 ເປັນປີທ່ອງທ່ຽວລາວ ໂດຍຖືເອົາການທ່ອງທ່ຽວເປັນປັດໃຈສໍາຄັນໃນການຍູ້ແຮງການຜະລິດເປັນສິນຄ້າ, ການບໍລິການ ເພື່ອສ້າງລາຍຮັບໃຫ້ແກ່ລັດ ແລະ ສັງຄົມ ໂດຍແນ່ໃສ່ສ້າງຄຸນນະພາບຊີວິດທີ່ດີ ໃຫ້ແກ່ປະຊາຊົນບັນດາເຜົ່າ, ບັນດາຊັ້ນຄົນ ພ້ອມກັນປະກອບສ່ວນໃຫ້ແກ່ການພັດທະນາເສດຖະກິດສັງຄົມຂອງຊາດ, ຂອງທ້ອງຖິ່ນໃຫ້ມີຄວາມຈະເລີນກ້າວໜ້າ ແບບຍືນຍົງ ແລະ ເປັນມິດກັບສິ່ງແວດລ້ອມ, ພາຍໃຕ້ຄໍາຂັວນທີ່ວ່າ ‘’ທ່ອງທ່ຽວລາວປອດໄພ, ຊື່ນໃຈໃນວັດທະນະທໍາ, ທໍາມະຊາດ ແລະ ປະຫວັດສາດ’’ ສໍາລັບແຂວງຫຼວງນໍ້າທາ.

ສໍາລັບປີ 2024 ນີ້, ມີນັກທ່ອງທ່ຽວເຂົ້າມາທ່ຽວ ແລະ ຜ່ານແຂວງຫຼວງນໍ້າທາ ຈໍານວນ 1 ລ້ານກວ່າເທື່ອຄົນ, ສ້າງລາຍຮັບໄດ້ 46 ລ້ານກວ່າໂດລາສະຫະລັດ.

ພະທາດຫຼວງຈຽງຕຶງ ມີປະຫວັດບອກເລົ່າ ໃນການສ້າງພະທາດອົງຕຶງມາແຕ່ດົນນານ ແຕ່ຫຼັກຖານທາງປະຫວັດສາດໃນຕໍານານ ການສ້າງເມືອງສິງ ໄດ້ບັນທຶກໄວ້ວ່າ: ໃນສະຕະວັດທີ 18, ຈສ 1154, ພສ 2335, ຄສ 1792 ໄດ້ມີຊົນເຜົ່າໄຕ໋ລື້ ຈາກອານາຈັກຈຽງແຂງ ໄດ້ມາຕັ້ງຖິ່ນຖານ ບ້ານເມືອງຢູ່ທົ່ງສິງ (ເມືອງສິງປັດຈຸບັນ) ຊຶ່ງນໍາໂດຍ ເຈົ້າຍິງເຂັມມາ, ນາງໝ້າຍຂອງເຈົ້າສຸລິນທາ ພ້ອມດ້ວຍໄພ່ພົນ ແລະ ບຸດຊາຍ ຊື່ເຈົ້າແສງສີ ຕໍ່ມາຈຶ່ງໄດ້ສ້າງພະທາດຫຼວງຈຽງຕຶງ ຂຶ້ນໃນປີ ຈສ 1157, ພສ 2339 ແລະ ຄສ 1796 ຊຶ່ງເປັນພຸດທະປະຕິມາກໍາແບບຊົງກົມ, ຊາວເມືອງໄດ້ຖືເອົາມື້ເດືອນຈຽງເພັງ (ເດືອນລື້) ເປັນງານສະຫຼອງ ແລະ ນະມັດສະການພະທາດຫຼວງຈຽງຕຶງ ສືບສານກັນມາຈົນຮອດປັດຈຸບັນ. ພ້ອມດຽວກັນນີ້ ຍັງໄດ້ມອບໃບຢັ້ງຢືນພະທາດຈຽງຕຶງ ພະທາດຫຼວງຈຽງຕືງເມືອງສິງແຂວງຫຼວງນໍ້າທາ ໄດ້ຮັບຮອງເປັນມໍລະດົກແຫ່ງຊາດລະດັບທ້ອງຖິ່ນແຫ່ງທີ 1 ຂອງແຂວງຫຼວງນໍ້າທາຕື່ມອິກ. ຈາກນັ້ນຍັງໄດ້ຕັດແຖບຜ້າ, ລັນຄ່ອງ 9 ບາດ ແລະ ວາງສີລາລືກ ການກໍ່ສ້າງພະເຈົ້າໃຫຍ່ປາງທານພອນ ທີ່ມີຄວາມສູງ 88 ກວ່າແມັດ.

(ແຫຼ່ງຂ່າວ: ຫຼວງນໍ້າທາ)