ແຂວງຜົ້ງສາລີ ມີຜົນສຳເລັດທີ່ພົ້ນເດັ່ນຫຼາຍດ້ານໃນການພັດທະນາເສດຖະກິດ-ສັງຄົມ ແລະ ແກ້ໄຂຄວາມທຸກຍາກຂອງປະຊາຊົນ ສະແດງອອກໃນ 11 ເດືອນຂອງປີ 2024 ແຂວງໄດ້ເອົາໃຈໃສ່ຊຸກຍູ້ສົ່ງເສີມປູກພືດ ແລະ ຕົ້ນໄມ້ອຸດສາຫະກໍາເປັນສິນຄ້າສົ່ງອອກດ້ວຍຮູບການລົງທຶນ 2+3, 1+4 ແລະ ດ້ວຍຮູບການອື່ື່ນໆ ບັນລຸຜົນສຳເລັດຕາມຄາດໝາຍທີ່ວາງໄວ້.
ທ່ານ ຄໍາຜອຍ ວັນນະສານ ກໍາມະການສູນກາງພັກ ເລຂາພັກແຂວງ ເຈົ້າແຂວງຜົ້ງສາລີໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນໃນວັນທີ 12 ທັນວາຜ່ານມາ ທີ່ແຂວງຜົ້ງສາລີ ວ່າ: ມາຮອດ 11 ເດືອນຂອງປີ 2024 ແຂວງພວກເຮົາໄດ້ມີຜົນສຳເລັດທີ່ພົ້ນເດັ່ນຫຼາຍດ້ານ ໃນການຈັດຕັ້ງປະຕິບັດວຽກງານດັ່ງນີ້: 1. ຊາປອດສານພິດ: ໄດ້ປູກຢູ່ 6 ເມືອງ, 170 ບ້ານ, 6,388 ຄອບຄົວ, ມີຫົວໜ່ວຍທຸລະກິດທັງພາຍໃນ ແລະ ຕ່າງປະເທດມາລົງທຶນສົ່ງເສີມປູກ ແລະ ເກັບຊື້ລວມມີ 18 ຫົວໜ່ວຍທຸລະກິດໃນນີ້: ພາຍໃນ 5 ຫົວໜ່ວຍ, ຕ່າງປະເທດ 13 ຫົວໜ່ວຍ; ມີເນື້ອທີ່ປູກທັງໝົດ 3,511.21 ເຮັກຕາ (ຮຕ), ຜົນຜະລິດຊາປະຕິບັດໄດ້ 4,401.18 ໂຕນ ແລະ ສົ່ງຊາແຫ້ງອອກໄດ້ 979.54 ໂຕນ, ມູນຄ່າສົ່ງອອກ 97.95 ຕື້ກີບ; 2. ຢາງພາລາ: ໄດ້ປູກຢູ່ 7 ເມືອງ, 233 ບ້ານ, 8,704 ຄອບຄົວ, ມີບໍລິສັດລົງທຶນປູກ ແລະ ເກັບຊື້ 10 ຫົວໜ່ວຍທຸລະກິດ; ໃນນີ້: ພາຍໃນ 1 ຫົວໜ່ວຍ ແລະ ຕ່າງປະເທດ 9 ຫົວໜ່ວຍ ແລະ ຂອງປະຊາ ຊົນປູກເອງມີເນື້ອທີ່ປູກທັງໝົດ 35,413.54 ຮຕ, ເນື້ອທີ່ສາມາດກີດຢາງ 17,678.24 ຮຕ, ເນື້ອທີ່ປາດຕົວຈິງ 13,539.63 ຮຕ, ຜົນຜະລິດ 20,886.9 ໂຕນ ລວມມູນຄ່າສົ່ງອອກ 417.73 ຕື້ກີບ; 3. ອ້ອຍ: ໄດ້ປູກຢູ່ 6 ເມືອງຄື: ເມືອງບຸນເໜືອ, ເມືອງຍອດອູ, ເມືອງບຸນໃຕ້, ເມືອງຜົ້ງສາລີ, ເມືອງຂວາ ແລະ ເມືອງສໍາພັນ) ມີ 95 ບ້ານ, 3,431 ຄອບຄົວ; ໂດຍບໍລິສັດຈົ່ງຢຸນ ແລະ ບໍລິສັດລິລຽງສົ່ງເສີມປູກ ແລະ ເກັບຊື້, ມີເນື້ອທີ່ 8,338.24 ຮຕ, ຜົນຜະລິດ 550,926 ໂຕນ, ລວມມູນຄ່າສົ່ງອອກ 826.38 ຕື້ກີບ; 4. ກ້ວຍ: ປູກຢູ່ 4 ເມືອງຄື: (ເມືອງຂວາ, ເມືອງບຸນເໜືອ, ເມືອງຍອດອູ ແລະ ເມືອງບຸນໃຕ້) ມີ 52 ບ້ານ, 658 ຄອບຄົວ, ມີເນື້ອທີ່ປູກ 1,077.36 ຮຕ, ຜົນຜະລິດ 5,213 ໂຕນ ລວມມູນຄ່າສົ່ງອອກ 6.43 ຕື້ກີບ; 5. ກາເຟ: ໄດ້ປູກຢູ່ 7 ເມືອງ, 39 ບ້ານ, 999 ຄອບຄົວ ໂດຍບໍລິສັດຈ່າງເຊີນຕາ ແລະ ບໍລິສັດຈິງຮຸຍຊິນ ສົ່ງເສີມປູກ ແລະ ເກັບຊື້, ມີເນື້ອທີ່ 205.51 ຮຕ, ເນື້ອທີ່ສາມາດເກັບກ່ຽວໄດ້ 129 ຮຕ, ຜົນຜະລິດປະມານ 199 ໂຕນ ລວມມູນຄ່າສົ່ງອອກ 6.96 ຕື້ກີບ; 6. ໝາກແໜ່ງ: ປູກໃນ 7 ເມືອງ, 460 ບ້ານ, 24,121 ຄອບຄົວ ປະຊາຊົນລົງທຶນປູກເອງ ແລະ ບໍລິສັດຈີງຈຽງສົ່ງເສີມປູກ ແລະ ເກັບຊື້, ມີເນື້ອທີ່ປູກ 22,310.13 ຮຕ, ເນື້ອທີ່ເກັບກ່ຽວປະມານ 20,258.68 ຮຕ, ຜົນຜະລິດ 459.5 ໂຕນ (ໝາກແໜ່ງດິບ) ມູນຄ່າສົ່ງອອກ 111.65 ຕື້ກີບ; 7. ໝາກງາ: ປູກໃນ 7 ເມືອງ, 155 ບ້ານ ປະຊາຊົນປູກເອງ ແລະ ມີບໍລິສັດເກັບຊື້, ມີເນື້ອທີ່ປູກ 771 ຮຕ, ຜົນຜະລິດ 21.50 ໂຕນ ມູນຄ່າສົ່ງອອກ 1.42 ຕື້ກີບ; 8. ໝາກເດືອຍ: ປູກໃນ 7 ເມືອງ, 194 ບ້ານ, 8,435 ຄອບຄົວ, ມີເນື້ອທີ່ປູກ 4,236.42 ຮຕ, ຜົນຜະລິດ 120 ໂຕນ ມູນຄ່າສົ່ງອອກ 2.88 ຕື້ກີບ; 9. ພືດລະດູແລ້ງ ລວມມີພືດຕະກຸນຖົ່ວ, ແຕງໂມ, ໝາກເຜັດ, ມັນຝຣັ່ງ, ໝາກອຶ ແລະ ອື່ນໆ ສ່ວນໃຫຍ່ແມ່ນປູກຢູ່ເມືອງຍອດອູ, ບຸນເໜືອ, ບຸນໃຕ້; ແຕ່ລະປີບັນລຸໄດ້ເນື້ອທີ່ 4,000-5,000 ຮຕ, ຜົນຜະລິດ 13,970.84 ໂຕນຕໍ່ລະດູ ມູນຄ່າສົ່ງອອກປະມານ 168.75 ຕື້ກີບ; 10. ການຂຸດຄົ້ນເຄື່ອງປ່າຂອງດົງສາ ມາດຂຸດຄົ້ນ ແລະ ສົ່ງອອກໄດ້ 1,234.61 ໂຕນ ລວມມູນຄ່າສົ່ງອອກທັງໝົດ 23.06 ຕື້ກີບ; ລວມມູນຄ່າສົ່ງອອກທັງໝົດ 1,664.47 ຕື້ກີບ ແລະ ຜະລິດຕະພັນໂອດັອບບັນລຸໄດ້ 30 ກາໝາຍ (121 ຊະນິດ).
ທ່ານ ຄໍາຜອຍ ວັນນະສານ ກ່າວໃຫ້ຮູ້ອີກວ່າ: ຈາກການປະເມີນຜົນ ມາດຕະຖານຄວາມທຸກຍາກ ແລະ ພົ້ນທຸກ 348/ລບ ມາຮອດເດືອນ 11 ປີ 2024 ທົ່ວແຂວງມີຈຳນວນບ້ານທຸກຍາກ 324 ບ້ານ ກວມ 63.9%, ສາມາດແກ້ໄຂບ້ານທຸກຍາກໄດ້ 183 ບ້ານ ກວມ 36.09%; ການສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດບັນລຸ 2 ຈຸດຄື: ບ້ານຢໍ້ ເມືອງບຸນເໜືຶອ ແລະ ຈຸດບ້ານສິນໄຊ ເມືອງຂວາ. ມາຮອດປັດຈຸບັນບ້ານທຸກຍາກຍັງກວມ 64% ແລະ ຄອບຄົວທຸກຍາກຍັງກວມ 44%, ໄດ້ສຸມໃສ່ຍົກລະດັບພື້ນຖານໂຄງລ່າງໃນຂົງເຂດສຶກສາເປັນຕົ້ນ ໂຮງຮຽນ, ຫ້ອງຮຽນຈາກປະຖົມປະຖານມາເຄິ່ງຖາວອນ ແລະ ຖາວອນເພີ່ມຂຶ້ນ ຕິດພັນກັບການສະໜອງອຸປະກອນການຮຽນ-ການສອນ, ການແກ້ໄຂຄູສອນ ແລະ ການປັບປຸງລະບົບການຮຽນ-ການສອນໃນທຸກຊັ້ນຮຽນ ແລະ ສຸມໃສ່ຈັດຕັ້ງປະຕິບັດຄາດໝາຍການພັດທະນາແບບຍືນຍົງ (SDGs) ໃນຂົງເຂດສັງຄົມບັນລຸເພີ່ມຂຶ້ນ. ຂ່າວ-ພາບ: ພູວັນ