ໂດຍ: ບຸນອູ້ມ
ງານເທດສະການອາຫານລາວຄັ້ງທີ 20ໄດ້ສຳເລັດລົງຢ່າງຈົບງາມ, ທ່ານນາງຈັນທະຈອນວົງໄຊປະທານສະມາຄົມນັກທຸລະກິດຍິງທັງເປັນປະທານຄະນະກຳມະການຈັດງານເທດສະການອາຫານລາວໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ: ການຈັດງານເທດສະການອາຫານລາວປີນີ້ເປັນປີທີ 20 ພາຍໃນງານໄດ້ມີອາຫານລາວທົ່ວປະເທດ 18 ແຂວງມາວາງຂາຍ ພ້ອມນັ້ນຍັງມີສະຖານທູດປະຈຳຢູ່ລາວຈຳນວນໜຶ່ງເຂົ້າຮ່ວມເພື່ອເປັນການສະເຫຼີມສະຫຼອງງານເທດສະການໃນຄັ້ງນີ້.
ສະເພາະປີນີ້ມີອາຫານພື້ນເມືອງທີ່ເປັນເອກະລັກແບບລາວໆ, ມີເຮືອນຄົວລາວທີ່ເປັນໄຮໄລ້ຂອງງານເພື່ອໃຫ້ນັກທ່ອງທ່ຽວ ກໍຄືຜູ້ມາທ່ຽວຊົມໄດ້ຖ່າຍຮູບ, ຊີມອາຫານ ຊຶ່ງມີອາຫານທີ່ຫາຍາກຂອງຫຼາຍແຂວງ.ນອກນີ້ຍັງໄດ້ເຊີນເອົາບັນດາປະຊາຊົນທີ່ມີຄວາມຮັກ, ມັກໄດ້ເຂົ້າມາສະແດງສີໄມ້ລາຍມື ນໍາເອົາອາຫານຂອງຕົນມາວາງຂາຍໂດຍສະເພາະອາຫານທີ່ເປັນສັນຍາລັກຂອງແຂວງຕົນເອງ. ສຳລັບກິດຈະກຳພາຍໃນງານຍັງມີການແຂ່ງຂັນພາເຂົ້າທ່ຽງອາຫານລາວ, ສຳມະນາກິນອາຫານລາວເພື່ອສຸຂະພາບ, ສະແດງສິລະປະ, ການເດີນແບບຂອງເຍົາວະຊົນ ແລະ ອື່ນໆ.
ໃນໂອກາດນີ້, ທ່ານນາງຈັນທະຈອນວົງໄຊໄດ້ກ່າວໃຫ້ຮູ້ຕື່ມວ່າ: ເນື່ອງໃນໂອກາດວັນສ້າງຕັ້ງພັກປປລາວຄົບຮອບ 70 ປີ, ວັນສະຖາປະນາ ສປປລາວຄົບຮອບ 50 ປີແລະວັນເກີດປະທານ ໄກສອນພົມວິຫານຄົບຮອບ 105 ປີເປັນໂອກາດທີ່ຍິ່ງໃຫຍ່ຂອງປີ 2025ຂໍອວຍພອນໄຊອັນປະເສີດໃຫ້ການນຳພັກ-ລັດຈົ່ງມີສຸຂະພາບແຂງແຮງມີພະລານາໄມສົມບູນສືບຕໍ່ຊີ້ນຳ-ນຳພາປະເທດຊາດກ້າວຂຶ້ນສູ່ຄວາມສີວິໄລ, ຄວາມຈະເລີນຮຸ່ງເຮືອງເທື່ອລະກ້າວ, ຂໍອວຍພອນໄຊໃຫ້ປະຊາຊົນລາວບັນດາເຜົ່າທຸກຖ້ວນໜ້າພ້ອມດ້ວຍນັກທຸລະກິດຈົ່ງມີສຸຂະພາບແຂງແຮງມີອາຍຸໝັ້ນຍືນພ້ອມກັນສະເຫຼີມສະຫຼອງງານບຸນໃຫຍ່ຂອງຊາດລາວເຮົາໃຫ້ມີຄວາມເບີກບານມ່ວນຊື່ນ ແລະ ມີຄວາມໝາຍສຳຄັນອັນເລິກເຊິ່ງ.
