ຂ່າວສານຊີອາໄອລາຍງານໃນວັນທີ 13 ມັງກອນ ຜ່ານມາວ່າ: ກອງປະຊຸມເວທີປຶກສາຫາລືການທະນາຄານອາຊີຄັ້ງທີ 18 ທີ່ຈັດໂດຍອົງການປົກຄອງເຂດບໍລິຫານພິເສດຮົງກົງ ແລະ ອົງການພັດທະນາການຄ້າຮົງກົງ ທີ່ສູນປະຊຸມວາງສະແດງຮົງກົງ, ກອງປະຊຸມດຳເນີນເປັນເວລາ 2 ວັນພາຍໃຕ້ຫົວຂໍ້ “ຕິດຈັກໃໝ່ແຫ່ງການເຕີບໂຕ” ໂດຍສຸມໃສ່ການເຮັດໃຫ້ຮົງກົງເສີມຂະຫຍາຍທ່າແຮງທີ່ເປັນສູນການທະນາຄານສາກົນຕື່ມອີກ, ສະແຫວງຫາເຄື່ອງຈັກໃໝ່ແຫ່ງການເຕີບໂຕໃນສະພາບການປ່ຽນແປງ ແລະອື່ນໆ.
ທ່ານຫຼີເຈ່ຍຊາວ ຜູ້ວ່າການເຂດບໍລິຫານພິເສດຮົງກົງໄດ້ກ່າວຄຳປາໄສໃນພິທີເປີດກອງປະຊຸມ. ກອງປະຊຸມຍັງໄດ້ເຊື້ອເຊີນຜູ້ນຳ, ນັກທຸລະກິດ, ຜູ້ຊ່ຽວຊານດ້ານການທະນາຄານ ແລະ ນັກເສດຖະສາດທີ່ມີຊື່ສຽງຮ້ອຍກວ່າທ່ານກ່າວຄຳປາໄສໃນກອງປະຊຸມ.
ກອງປະຊຸມເວທີປຶກສາຫາລືໄດ້ຈັດໃຫ້ມີກິດຈະກຳຕ່າງໆ 40 ກວ່າຄັ້ງ ເຊັ່ນ: ງານປາຖະກະຖາ, ການສົນທະນາດ້ານນະໂຍບາຍ ແລະ ກອງປະຊຸມເວທີປຶກສາຫາລືຫົວຂໍ້ສະເພາະ, ໂດຍສຸມໃສ່ຫົວຂໍ້ຈຸດສຸມຕ່າງໆ ເຊັ່ນ: “ການຄາດຄະເນເສດຖະກິດທົ່ວໂລກ”, “ໂອກາດຈາກຈີນ” ແລະອື່ນໆ ໂດຍສຸມໃສ່ໂອກາດການຄ້າໃນຕະຫຼາດຈະເລີນໃໝ່ຕ່າງໆ ເຊັ່ນ: ແຜ່ນດິນໃຫຍ່ຈີນ, ອາຊຽນ ແລະ ຕາເວັນອອກກາງ ຊຶ່ງຈະດຶງດູດບຸກຄົນໃນວົງການການທະນາຄານ ແລະ ການຄ້າຫຼາຍກວ່າ 3.600 ທ່ານເຂົ້າຮ່ວມ.
