ຂ່າວຕ່າງປະເທດລາຍງານ ຫວ່າງມໍ່ໆມານີ້ວ່າ: ຂໍ້ມູນຈາກກະຊວງພະລັງງານ ແລະຊັບພະຍາກອນບໍ່ແຮ່ ຂອງອິນໂດເນເຊຍ ລະບຸວ່າ: ອິນ​ໂດ​ເນ​ເຊຍ​​ຜະ​ລິດ​ຖ່ານ​ຫີນ​ໄດ້ 830.96 ລ້ານ​ໂຕນ​ໃນ​ປີ 2024, ສູງ​ກວ່າປະລິມານ​ການ​ຜະ​ລິດ​ຂອງ​ປີ​ກ່ອນ​ທີ່​ມີ 770.9 ລ້ານ​ໂຕນ.

ການຈຳໜ່າຍ​ຖ່ານ​ຫີນ​ໃນ​ປີ 2024 ມີ 811.01 ລ້ານ​ໂຕນ, ​ໃນຈຳນວນນີ້ສົ່ງອອກໄປຕ່າງປະເທດ433.17 ລ້ານ​ໂຕນ​ ແລະ ຈຳໜ່າຍໃນຕະຫຼາດພາຍໃນປະ​ເທດ377.85 ລ້ານ​ໂຕນ ຊຶ່ງຈາກຈຳນວນ​ການຂາຍ​ໃນ​ປະ​ເທດທັງໝົດ ມີການຈັດສັນຖ່ານຫີນ ຈຳນວນ209.93 ລ້ານໂຕນເພື່ອຕອບສະໜອງຕໍ່ຂໍ້ຜູກພັນໃນຕະຫຼາດພາຍໃນປະເທດ.

ການຜະລິດຖ່ານຫີນໃນປີ 2024 ລື່ນກາຍເປົ້າໝາຍຂອງລັດຖະບານກຳນົດໄວ້ທີ່710 ລ້ານໂຕນ ເຖິງ 17%.

ອິນ​ໂດ​ເນ​ເຊຍ ​ຊຶ່ງເປັນ​ປະ​ເທດ​ສົ່ງ​ອອກ​ຖ່ານ​ຫີນ​ເຊື້ອໄຟທີ່​ໃຫຍ່​ທີ່​ສຸດ​ຂອງ​ໂລກ​ນັບ​ຕັ້ງແຕ່​ລື່ນກາຍອົສຕຣາລີ ໃນປີ 2018 ແລະ ມີບົດບາດສຳຄັນໃນການຄ້າຖ່ານຫີນລະດັບໂລກຢ່າງຕໍ່ເນື່ອງ, ​ໂດຍ​ມີ​ຈຸດໝາຍການ​ສົ່ງ​ອອກ​ທີ່​ສຳຄັນ​ໄດ້ແກ່:​ອິນ​ເດຍ, ຍີ່​ປຸ່ນ​ແລະ​ປະ​ເທດ​ອື່ນໆ.