ຂ່າວຕ່າງປະເທດລາຍງານ ຫວ່າງບໍ່ດົນມານີ້ວ່າ: ຜົນການຄົ້ນຄວ້າໃໝ່ສະແດງໃຫ້ເຫັນວ່າການດື່ມກາເຟໃນແຕ່ລະມື້ຂອງພວກເຮົາ ອາດມີສ່ວນຊ່ວຍຫຼຸດຜ່ອນຄວາມສ່ຽງໃນການເສຍຊີວິດຈາກພະຍາດທີ່ກ່ຽວກັບຫົວໃຈ ໄດ້.

ຜົນການສຶກສາພົບວ່າ: ຜູ້ທີ່ດື່ມກາເຟໃນຕອນເຊົ້າ ມີຄວາມສ່ຽງຕໍ່ການເສຍຊີວິດຈາກພະຍາດ ທີ່ກ່ຽວກັບຫົວໃຈ ແລະ ຫຼອດເລືອດ ແລະມີຄວາມສ່ຽງຕໍ່ການເສຍຊີວິດຕໍ່າກວ່າຄົນທີ່ດື່ມກາເຟໃນເວລາອື່ນໆ, ແນວໃດກໍຕາມ, ການຄົ້ນຄວ້ານີ້ບໍ່ໄດ້ພິສູດວ່າ ກາເຟເປັນປັດໄຈຫຼັກພຽງຢ່າງດຽວທີ່ເຮັດໃຫ້ຄວາມສ່ຽງໃນການເສຍຊີວິດຫຼຸດລົງ.

ທ່ານ ລູ່ ສີ ຫົວໜ້າ​ຄະນະ​ຄົ້ນຄວ້າ ແລະຜູ້ອໍານວຍການສູນຄົ້ນຄວ້າພະຍາດຕຸ້ຍ ມະຫາວິທະຍາໄລທູເລນ ເມືອງນິວອໍລີນ ສະຫະລັດ ອາເມຣິກາ ກ່າວວ່າ: ການສຶກສາບໍ່ໄດ້ອະທິບາຍຢ່າງຊັດເຈນວ່າເປັນຫຍັງການດື່ມກາເຟໃນຕອນເຊົ້າຈຶ່ງສາມາດຊ່ວຍຫຼຸດຜ່ອນຄວາມສ່ຽງໄດ້.ແຕ່ໜຶ່ງໃນຄໍາອະທິບາຍຄື: ການບໍລິໂພກກາເຟໃນເວລາອື່ນໆເຊັ່ນ: ໃນຕອນບ່າຍຫຼືຕອນແລງ ອາດກະທົບກັບລະບົບໂມງຊີວະພາບພາຍໃນຮ່າງກາຍ ແລະ ລະດັບຮໍໂມນເຊັ່ນ: ເມລາໂທນິນ ໄດ້.

ການ​ຄົ້ນ​ຄວ້າ​ດັ່ງ​ກ່າວ​ໄດ້​ຖືກ​ພິມ​ເຜີຍ​ແຜ່​ໃນ​ວັນທີ 9 ມັງກອນ ຜ່ານມາ ​ໃນ​ວາ​ລະ​ສານ European Heart ນັກ​ຄົ້ນ​ຄວ້າ​ລະບຸ​ວ່າ: ​ຍັງຕ້ອງມີການ​ຄົ້ນ​ຄວ້າ​ເພີ່ມ​ເຕີມ​ວ່າ ຜົນການສຶກສາທີ່ອອກມາສອດຄ່ອງກັບຄົນທຸກກຸ່ມ ຫຼື ບໍ, ໂດຍອາດຈະຕ້ອງມີການທົດລອງທາງເຕັກນິກ ເພື່ອເບິ່ງຜົນກະທົບຂອງການປ່ຽນແປງເວລາໃນການດື່ມກາເຟ ດ້ວຍ.

ນັກຄົ້ນຄວ້າຈາກມະຫາວິທະຍາໄລທູເລນ ເມືອງນິວອໍລີນ ໄດ້ເຮັດການສຶກສາຜູ້ໃຫຍ່ ຈຳນວນ 40,725 ຄົນ ທີ່ຮ່ວມກັນເຮັດແບບສອບຖາມໃນສະຫະລັດ ອາເມຣິກາ ຕັ້ງແຕ່ປີ 1999 ຫາ 2018. ທຸກໆຄົນຈະຖືກຖາມກ່ຽວກັບເລື່ອງອາຫານແລະເຄື່ອງດື່ມທີ່ຮັບປະທານໃນທຸກໆວັນ ລວມເຖິງພຶດຕິກຳການດື່ມກາເຟເຊັ່ນ: ດື່ມຫຼາຍປານໃດແລະ ດື່ມໃນເວລາໃດ ເພື່ອວັດແທກວ່າເວລາຂອງການດື່ມກາເຟມີຜົນກະທົບຕໍ່ຄວາມແຂງແຮງຂອງຫົວໃຈ ຫຼື ບໍ? ຊຶ່ງຖືເປັນ​ຄັ້ງ​ທໍາ​ອິດ​ທີ່​ມີ​ການ​ຄົ້ນ​ຄວ້າ​ກ່ຽວ​ກັບ​ຫົວ​ຂໍ້​ນີ້​.

ທີມນັກຄົ້ນຄວ້າ ພົບວ່າ: ຜູ້ທີ່ດື່ມກາເຟໃນຕອນເຊົ້າ ອັດຕາການເສຍຊີວິດໜ້ອຍກ່ວາຄົນທີ່ບໍ່ດື່ມກາເຟ16% ແລະຜູ້ທີ່ດື່ມກາເຟໃນຕອນເຊົ້າ ເສຍຊີວິດຈາກພະຍາດຫົວໃຈນ້ອຍລົງກວ່າ 31%. ສ່ວນຜູ້ທີ່ດື່ມກາເຟໝົດມື້ ຄວາມສ່ຽງຂອງພະຍາດຫົວໃຈບໍ່ໄດ້ຫຼຸດລົງ ເມື່ອປຽບທຽບກັບຄົນທີ່ບໍ່ດື່ມກາເຟ.

ໂດຍໃນຈຳນວນຜູ້ທີ່ເຂົ້າຮ່ວມຄົ້ນຄວ້າທັງໝົດ ແບ່ງເປັນຄົນທີ່ດື່ມເຟໃນຕອນເຊົ້າ 36% ແລະ 14% ແມ່ນຜູ້ທີ່ດື່ມກາເຟໝົດມື້.