ພະນະທ່ານທອງລຸນ ສີສຸລິດ ປະທານ ປະເທດ ແຫ່ງ ສປປ ລາວ ໄດ້ສົ່ງສານສະແດງຄວາມເສົ້າສະຫຼົດໃຈ ເຖິງ ພະ​ນະ​ທ່ານຊອຍ ຊັງ ມອກຮັກສາການ ປະທານາທິບໍດີແຫ່ງ ສາທາລະນະລັດ ເກົາຫຼີ ໂດຍມີເນື້ອໃນວ່າ:

ຂ້າພະເຈົ້າ ຮູ້ສຶກເສົ້າສະຫຼົດໃຈ ທີ່ໄດ້ຮັບຊາບຂ່າວເຫດການອຸບັດເຫດເຮືອບິນຕົກ ຢູ່ ສະໜາມບິນສາກົນ ມຸອັນ ທາງພາກຕາເວັນຕົກສ່ຽງໃຕ້ຂອງ ສາທາລະນະລັດ ເກົາຫຼີ ໃນວັນທີ 29 ທັນວາຜ່ານມາ ຊຶ່ງໄດ້ສ້າງຄວາມເສຍຫາຍໃຫ້ແກ່ຊີວິດແລະ ຊັບສິນຂອງປະຊາຊົນຢ່າງຫຼວງຫຼາຍ.

ຕາງໜ້າໃຫ້ ລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄືໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສຍໃຈ ແລະ ເຫັນໃຈຢ່າງສຸດຊຶ້ງມາຍັງ ພະນະທ່ານ ແລະ ຜ່ານພະນະທ່ານໄປຍັງລັດຖະບານ ກໍ​ຄືປະ​ຊາ​ຊົນ​ ສເກົາຫຼີໂດຍ​ສະ​ເພາະ​ຜູ້​ທີ່ຖືກ​ເຄາະ​ຮ້າຍແລະຄອບ​ຄົວ​ຂອງ​ເຂົາ​ເຈົ້າຈາກ​ເຫດ​ການອຸບັດເຫດໃນ​ຄັ້ງ​ນີ້.

ຂ້າພະ​ເຈົ້າ​ເຊື່ອ​ໝັ້ນວ່າ ດ້ວຍຄວາມເອົາໃຈໃສ່ຢ່າງໃກ້ຊິດຂອງລັດຖະບານ ສ ເກົາຫຼີ, ປະຊາຊົນ ສ ເກົາຫຼີ ຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ໃຫ້ກັບຄືນສູ່ສະພາບປົກກະຕິໂດຍໄວ.

ໃນໂອກາດດຽວກັນ, ພະນະທ່ານ ທອງສະຫວັນ ພົມວິຫານ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ກໍໄດ້ ສົ່ງສານສະແດງຄວາມເສົ້າສະຫຼົດໃຈ ເຖິງຄູ່ຮ່ວມຕຳແໜ່ງເຊັ່ນດຽວກັນຕໍ່ເຫດການອຸບັດເຫດເຮືອບິນຕົກ ດັ່ງກ່າວ.