ໃນວັນທີ 17 ຜ່ານມານີ້,ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈເຖິງ ພະນະທ່ານ ໂຈເຊັບ ໄບເດັນປະທານາທິບໍດີ ແຫ່ງ ສະຫະລັດ ອາເມຣິກາ ທີ່ວໍຊິງຕັນດີຊີຊຶ່ງມີເນື້ອໃນວ່າ:
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈ ແລະ ເຫັນອົກເຫັນໃຈຢ່າງສຸດຊຶ້ງ ມາຍັງ ລັດຖະບານ ແລະ ຜູ້ປະສົບເຄາະຮ້າຍ ທີ່ໄດ້ຮັບຜົນກະທົບຈາກໄຟໄໝ້ປ່າຢ່າງຮ້າຍແຮງ ທີ່ແຜ່ລາມທົ່ວພາກພື້ນທາງຕອນໃຕ້ຂອງ ລັດຄາລິໂຟເນຍ ໃນ ສະຫະລັດ ອາເມຣິກາ.
ໄຟໄໝ້ປ່າຄັ້ງນີ້ ຖືເປັນໄຟໄໝ້ທີ່ຮ້າຍແຮງທີ່ສຸດທີ່ບໍ່ເຄີຍເກີດຂຶ້ນມາກ່ອນ ຊຶ່ງໄດ້ສ້າງຄວາມສູນເສຍທາງດ້ານຊີວິດຂອງປະຊາຊົນຈຳນວນບໍ່ໜ້ອຍ, ທັງທຳລາຍທີ່ພັກອາໄສຂອງປະຊາຊົນຢ່າງຫຼວງຫຼາຍ ແລະ ເຮັດໃຫ້ປະຊາຊົນຫຼາຍພັນຄົນຂາດທີ່ພັກອາໄສ ໃນຂົງເຂດດັ່ງກ່າວ. ຂ້າພະເຈົ້າ ຂໍຊົມເຊີຍເຈົ້າໜ້າທີ່ກູ້ໄພທີ່ເຮັດວຽກຢ່າງບໍ່ຮູ້ອິດຮູ້ເມື່ອຍ ເພື່ອຄວບຄຸມສະຖານະການ ແລະ ຊ່ວຍເຫຼືອຜູ້ທີ່ຕ້ອງການ ການຊ່ວຍເຫຼືອ.
ຂ້າພະເຈົ້າ ກໍຄືປະຊາຊົນລາວ ຂໍຢືນຄຽງຂ້າງ ລັດຖະບານ ແລະ ປະຊາຊົນ ສະຫະລັດ ອາເມຣິກາ ແລະ ເຊື່ອໝັ້ນວ່າ ພາຍໃຕ້ການນຳພາຂອງພະນະທ່ານ, ຈະສາມາດຜ່ານຜ່າຄວາມຫຍຸ້ງຍາກ, ຟື້ນຟູຊີວິດການເປັນຢູ່ຂອງປະຊາຊົນ ແລະ ພື້ນທີ່ໄດ້ຮັບຜົນກະທົບໃຫ້ກັບຄືນສູ່ສະພາບປົກກະຕິ.
