 |
ໃນໂອກາດນີ້, ພະນະທ່ານ ທອງລຸນ ສີສຸລິດ ໄດ້ສະແດງຄວາມຍິນດີທີ່ໄດ້ມີໂອກາດ ພົບປະກັບ ພະນະທ່ານ ຊາດືຣ ຊາປາຣົບ ປະທານາທິບໍດີ ແຫ່ງ ສ ກຽກກິດສະຖານ ພ້ອມທັງສະ ແດງຄວາມຍ້ອງຍໍຊົມເຊີຍຕໍ່ ກຽກກິດສະຖານ ໃນຖານະເປັນເຈົ້າພາບຮ່ວມກັບອົງການຮ່ວມມືຊຽງໄຮ້ ແລະ ສະແດງຄວາມຂອບໃຈຕໍ່ການເຊື້ອເຊີນ ສປປ ລາວ ເຂົ້າຮ່ວມກອງປະຊຸມດັ່ງກ່າວ ແລະ ຈັັດການພົບປະສອງຝ່າຍຄັ້ງນີ້ ຊຶ່ງເປັນການພົບປະກັນຄັ້ງທໍາອິດຂອງສອງປະມຸກລັດ ພາຍຫຼັງການ ສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ ກຽກກິດສະຖານ ອັນເປັນຂີດໝາຍ ສຳຄັນ ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດຕະຫຼອດໄລຍະ 3 ກວ່າທົດສະວັດຜ່ານມາ (13 /7/1995-13/7/2026). ໃນໂອກາດນີ້, ພະນະທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ແລະ ອວຍພອນໄຊອັນປະເສີດ ມາຍັງ ພະນະທ່ານ ປະທານາທິບໍດີ ແລະ ປະຊາຊົນ ກຽກກິດສະ ຖານ ເພື່ອນມິດທຸກຖ້ວນໜ້າ ເນື່ອງໃນໂອກາດວັນປະກາດເອກະລາດ ແຫ່ງ ສາທາລະນະລັດ ກຽກ ກິດສະຖານ ຄົບຮອບ 35 ປີ (31/8/1991-31/8/2026).
 |
ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ລະຫວ່າງ ສປປ ລາວ ແລະ ສ ກຽກກິດສະຖານ ທີ່ມີມູນເຊື້ອມາແຕ່ດົນນານ ຊຶ່ງກຽກກິດສະຖານ ເປັນໜຶ່ງໃນບັນດາລັດອະດີດ ສະຫະພາບໂຊວຽດ ທີ່ໄດ້ໃຫ້ການຊ່ວຍເຫຼືອສະໜັບສະໜູນ ໃນພາລະກິດຕໍ່ສູ້ກູ້ຊາດ ແລະ ສະຖາປະ ນາ ສປປ ລາວ ໃນໄລຍະຜ່ານມາ ລວມທັງການພັດທະນາຊັບພະຍາກອນມະນຸດໃຫ້ແກ່ ສປປ ລາວ ເປັນຈຳນວນຫຼາຍ. ພ້ອມດຽວກັນນີ້, ສອງຝ່າຍ ຍັງໄດ້ທົບທວນຄືນການພົວພັນຮ່ວມມືໃນໄລຍະ ຜ່ານມາ ແລະ ປຶກສາຫາລື ກ່ຽວກັບທິດທາງແຜນການຮ່ວມມືໃນຕໍ່ໜ້າ. ສອງຝ່າຍເຫັນດີສ້າງຕັ້ງ ກົນໄກການຮ່ວມມືທາງດ້ານການເມືອງ ລະຫວ່າງ ສອງກະຊວງການຕ່າງປະເທດ ລາວ ແລະ ກຽກ ກິດສະຖານ. ນອກຈາກນີ້, ສອງຝ່າຍ ຍັງໄດ້ເຫັນດີໃຫ້ມີການແລກປ່ຽນບົດຮຽນປະສົບການ ເພື່ອນໍາ ໃຊ້ທ່າແຮງຂອງການຫັນປ່ຽນຈາກປະເທດທີ່ບໍ່ມີຊາຍແດນຕິດກັບທະເລໄປສູ່ປະເທດເຊື່ອມຈອດ ເພື່ອ ສົ່ງເສີມການຮ່ວມມືທາງດ້ານເສດຖະກິດການ, ການຄ້າ ແລະ ການຂົນສົ່ງລະຫວ່າງກັນໃຫ້ຫຼາຍ ຍິ່ງຂຶ້ນໃນຕໍ່ໜ້າ.
 |
ໃນໂອກາດດຽວກັນນີ້, ພະນະທ່ານ ຊາດືຣ ຊາປາຣົບ ກໍໄດ້ສະແດງຄວາມປິຕິຍິນດີ ທີ່ໄດ້ມີໂອກາດພົບປະກັບ ພະນະທ່ານ ປະທານປະເທດ ແຫ່ງ ສປປ ລາວ ແລະ ສະແດງ ຄວາມມຸ່ງໝັ້ນທີ່ຈະສືບຕໍ່ຊຸກຍູ້ການພົວພັນຮ່ວມມື ລະຫວ່າງ ສປປ ລາວ - ສ ກຽກກິດສະຖານ ຢ່າງ ສຸດຄວາມສາມາດ ເພື່ອເສີມຂະຫຍາຍການພົວພັນຮ່ວມມືຂອງສອງປະເທດໃຫ້ເຂັ້ມແຂງ ແລະ ແຕກ ດອກອອກຜົນຍິ່ງໆຂຶ້ນ ພ້ອມທັງອວຍພອນໃຫ້ສາຍພົວພັນມິດຕະພາບ ລະຫວ່າງ ລາວ ແລະ ກຽກ ກິດສະຖານ ທີ່ມີມູນເຊື້ອມາແຕ່ດົນນານ ຈົ່ງສືບຕໍ່ໄດ້ຮັບການພັດທະນາ ແລະ ຈະເລີນງອກງາມ ຍິ່ງໆຂຶ້ນ.
(ຂ່າວ: ກຕທ)
ຄໍາເຫັນ