ທ່ານ ວັນໄຊ ພອງສະຫວັນ ປະທານອົງການກວດກາແຫ່ງລັດ ໄດ້ລາຍງານໃຫ້ຮູ້ວ່າ: ການດໍາເນີນງານຕິດຕາມ-ກວດກາ 6 ເປົ້າໝາຍສໍາຄັນໃນຂອບເຂດທົ່ວປະເທດ ຄື: 1. ກວດກາການນໍາໃຊ້ບ້ວງເງິນກອງທຶນທາງຢູ່ 2 ແຂວງຄື: ແຂວງວຽງຈັນ ແລະ ແຂວງໄຊສົມບູນ: ຜ່ານການກວດກາໂຄງການນໍາໃຊ້ບ້ວງເງິນກອງທຶນທາງ ຮອດປີ 2025 ທັງໝົດ 178 ໂຄງການ (219 ສັນຍາ) ມູນຄ່າເຂົ້າແຜນ 850.98 ຕື້ກີບ ແລະ ມູນຄ່າຕາມສັນ ຍາ 926.21 ຕື້ກີບ ພົບເຫັນບັນຫາຄື: ມີການນໍາໃຊ້ງົບປະມານປີ 2024-2025 ໄປຊໍາລະໃຫ້ໂຄງການທີ່ຄ້າງຊໍາລະມາແຕ່ປີ 2017. ພົບ 44 ໂຄງການເຊັນສັນຍາເກີນມູນຄ່າທີ່ສະພາແຫ່ງຊາດຮັບຮອງ. ພົບ 7 ໂຄງການ ທີ່ມີການກໍ່ສ້າງທັບຊ້ອນກັນ (ໂຄງການເກົ່າຍັງຢູ່ໃນໄລຍະຄໍ້າປະກັນ ແຕ່ມີໂຄງການໃໝ່ສ້າງທັບ). ພົບ 4 ໂຄງການ ບໍ່ໄດ້ປະຕິບັດຕາມບົດບັນທຶກກວດກາວຽກ 100% ເປັນມູນຄ່າ 340.57 ລ້ານກີບ. ສ່ວນຫຼາຍບໍ່ໄດ້ຈົດທະບຽນສານ, ບໍ່ມີການວາງເງິນຄໍ້າປະກັນສັນຍາ, ບາງໂຄງການເຊັນສັນຍາກ່ອນສະເໜີເຂົ້າແຜນ ແລະ ນໍາໃຊ້ເງິນບໍ່ຖືກເປົ້າໝາຍ; 2. ກວດກາການລັກລອບຂຸດຄົ້ນຊັບພະຍາກອນແຮ່ທາດ ແລະ ປ່າໄມ້: ປະກົດການລັກລອບຂຸດຄົ້ນແຮ່ທາດ, ການຂຸດຄົ້ນໄມ້ ແລະ ການເຄື່ອນຍ້າຍໄມ້ອອກຕ່າງປະເທດ ຍັງເປັນບັນຫາທ້າທາຍ ແລະ ແຜ່ລາມຢູ່ຫຼາຍແຂວງ. ເຖິງວ່າລັດຖະບານ ແລະ ຄະນະເລຂາທິການສູນກາງພັກ ໄດ້ອອກຄໍາສັ່ງ (ຄໍາສັ່ງເລກທີ 46/ນຍ, ຄໍາສັ່ງ ເລກທີ 11/ຄລສພ) ແລະ ແຕ່ງຕັ້ງຄະນະສະເພາະກິດ (ຂໍ້ຕົກລົງເລກທີ 78/ນຍ) ແລ້ວກໍຕາມ, ແຕ່ການແກ້ໄຂຍັງບໍ່ທັນຂາດໂຕ ເນື່ອງຈາກການຈັດຕັ້ງປະຕິບັດບໍ່ທັນເຂັ້ມງວດ, ເຖິງຖອງ ແລະ ຄວາມເປັນແບບຢ່າງນໍາໜ້າຂອງພະນັກງານການນໍາຂັ້ນສູງ ແລະ ທ້ອງຖິ່ນບາງສ່ວນຍັງບໍ່ທັນດີ; 3. ກວດກາບ້ວງເງິນຝາກກູ້ຂອງລັດຖະ ບານຢູ່ລັດວິສາຫະກິດໄຟຟ້າລາວ: ກວດກາ 17 ໂຄງການ ມູນຄ່າກູ້ຢືມທັງໝົດ 4.59 ຕື້ໂດລາ. ໃນນີ້ກໍາລັງລົງເລິກກວດກາບ້ວງເງິນຝາກກູ້ 237.60 ລ້ານໂດລາ, ຊຶ່ງພົບວ່າ: ຜູ້ໃຫ້ກູ້ຢຸດການສະໜອງທຶນ 7 ສັນຍາ ມູນຄ່າ 98.91 ລ້ານໂດລາ. ໄຟຟ້າລາວໄດ້ໂອນໃຫ້ກະຊວງການເງິນ 53.68 ລ້ານໂດລາ, ນໍາໃຊ້ເອງເພື່ອແກ້ສະພາບຄ່ອງ 43.53 ລ້ານໂດລາ. ເງິນຄ້າງຢູ່ບໍລິສັດທີ 3 (ຜູ້ໃຫ້ທຶນໂອນໃຫ້ບໍລິສັດທີ 3 ແຕ່ບໍລິສັດບໍ່ໂອນຕໍ່ໃຫ້ໄຟຟ້າລາວ) ຈໍານວນ 41.47 ລ້ານໂດລາ. ມີຫຼາຍໂຄງການຈັດຕັ້ງປະຕິບັດແລ້ວ ແຕ່ບໍ່ມີປະສິດທິຜົນ ຫຼື ປະສິດທິຜົນຕໍ່າ; 4. ກວດກາ 5 ຂົງເຂດ ຢູ່ກະຊວງອຸດສາຫະກໍາ ແລະ ການຄ້າ, ຜ່ານການກວດກາເຫັນວ່າ ການປະຕິບັດນະໂຍບາຍເງິນເດືອນ ແລະ ເງິນອຸດໜູນໃຫ້ພະນັກງານຢູ່ບັນດາລັດວິສາຫະກິດມີລາຍຈ່າຍສູງ ແຕ່ລັດວິສາຫະກິດກັບບໍ່ມີຜົນກໍາໄລ. ປັດຈຸບັນເຈົ້າໜ້າທີ່ກໍາລັງລົງເລິກກວດກາ 2 ຂົງເຂດ ຄື: ຂົງເຂດພະລັງງານ ແລະ ບໍ່ແຮ່; 5. ກວດກາໂຄງການຂົນສົ່ງແບບຍືນຍົງໃນຕົວເມືອງນະຄອນຫຼວງວຽງຈັນ (BRT): ໂຄງການມູນຄ່າ 99.70 ລ້ານໂດລາ (ທຶນກູ້ຢືມ) ເລີ່ມມາແຕ່ປີ 2018 ຮອດປີ 2025 ມີ 33 ສັນຍາ ມູນຄ່າ 58.71 ລ້ານໂດລາ. ຜ່ານການກວດກາພົບຂໍ້ຜິດພາດຫຼາຍປະການ ຄື: ໂຄງການ ມີການຕໍ່ອາຍຸສັນຍາຫຼາຍຄັ້ງ ແຕ່ວຽກຍັງບໍ່ເຮັດ, ແບບແຕ້ມບໍ່ທັນໄດ້ຮັບຮອງ, ບາງສະຖານີສ້າງແລ້ວກໍຖືກທຸບມ້າງ ແລະ ຮື້ຖອນ, ສັນຍາທັງໝົດ 33 ສະບັບ ບໍ່ມີສະບັບພາສາລາວ, ນໍາໃຊ້ບ້ວງເງິນ BRT ໄປປັບປຸງ 9 ເສັ້ນທາງທີ່ບໍ່ນອນໃນໂຄງການ ມູນຄ່າ 1.52 ລ້ານໂດລາ (ໃນນີ້ມີ 1 ເສັ້ນທາງ ມູນຄ່າ 584,508 ໂດລາບໍ່ໄດ້ຮັບການຕົກລົງ ແຕ່ໄດ້ກໍ່ສ້າງແລ້ວ). ຈັດຊື້ລົດສາມລໍ້ໄຟຟ້າ 150 ຄັນ (ລາຄາ 3,040 ໂດລາ/ຄັນ) ເພື່ອຮັບໃຊ້ໂຄງການ ແຕ່ຕົວຈິງບໍ່ທັນໄດ້ນໍາໃຊ້ ເພາະບໍ່ມີເດີ່ນຈອດລົດ; 6. ການຕິດຕາມ-ກວດກາ ໂຄງການລົງທຶນຂອງລັດ ເລີ່ມແຕ່ຫົວທີ (24 ໂຄງການ): ກວດກາ 24 ໂຄງການ ມູນຄ່າ 171,813.71 ຕື້ກີບ ພົບວ່າ: ເຈົ້າຂອງໂຄງການ ແລະ ບໍລິສັດ ແກ້ໄຂຜົນການກວດກາຊັກຊ້າເອກະສານກ່ອນສະເໜີເຂົ້າແຜນບໍ່ຄົບຖ້ວນ, ບໍລິສັດຕໍ່ສັນຍາຫຼາຍຄັ້ງເກີນລະບຽບ, ເນື້ອໃນສັນຍາບໍ່ລະອຽດ (ບໍ່ກໍານົດເງິນຄໍ້າປະກັນ 10% ແລະ ບໍ່ມີມາດຕະການປັບໄໝ). ບໍລິສັດປະຕິບັດໄປໄລຍະໜຶ່ງແລ້ວ ສະເໜີຂໍດັດແກ້ເພີ່ມມູນຄ່າ ຫຼື ຢຸດດໍາເນີນໂຄງການ. ລາຄາກາງ-ລາຄາຫົວໜ່ວຍ ບໍ່ສາມາດນໍາໃຊ້ໄດ້ຕົວຈິງ ຍ້ອນການເໜັງຕີງຂອງລາຄາວັດສະດຸ ແລະ ອັດຕາເງິນເຟີ້, ລວມທັງຄວາມສາມາດຊໍາລະສະສາງຂອງລັດແກ່ຍາວຫຼາຍປີ. ຕໍ່ ບັນຫາທັງໝົດທີ່ພົບເຫັນ, ອົງການກວດກາແຫ່ງລັດໄດ້ສະເໜີວິທີແກ້ໄຂໃຫ້ເຈົ້າຂອງໂຄງການ ແລະ ພາກສ່ວນທີ່ກ່ຽວຂ້ອງ ເພື່ອຮີບຮ້ອນປັບປຸງແກ້ໄຂໃຫ້ຖືກຕ້ອງຕາມກົດໝາຍ ແລະ ລະບຽບການຢ່າງເຂັ້ມງວດ.
ຂ່າວ-ພາບ: ບຸນຕອມ
ຄໍາເຫັນ