![]() |
ໃນໂອກາດນີ້, ພະນະທ່ານ ປະທານປະເທດ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ກ່າວຄໍາເຫັນໂດຍໄດ້ຕີລາຄາສູງຕໍ່ເນື້ອໃນຫົວຂໍ້ຂອງກອງປະຊຸມສຸດຍອດຝຣັງໂກໂຟນີ ຄັ້ງທີ XX ຄັ້ງນີ້ ຊຶ່ງສະແດງໃຫ້ເຫັນເຖິງຄວາມສໍາຄັນ ແລະ ແທດເໝາະກັບສະພາບການຂອງໂລກໃນປັດຈຸບັນທ່າມກາງທີ່ບັນດາປະເທດກໍາລັງພັດທະນາທີ່ຮັກຫອມສັນຕິພາບໄດ້ຢືນຢັນຄືນຄວາມໝາຍໝັ້ນ ແລະ ເຈດຕະນາລົມ ເພື່ອຍົກສູງບົດບາດຂອງຂອບການຮ່ວມມືແບບຫຼາຍຝ່າຍເພື່ອສ້າງສະພາບແວດລ້ອມອັນເອື້ອອໍານວຍໃຫ້ແກ່ການບັນລຸເປົ້າໝາຍການພັດທະນາແບບຍືນຍົງ, ໂດຍຮ່ວມກັນຊອກຫາຊ່ອງທາງ ເພື່ອຜ່ານຜ່າອຸປະສັກທ່າມກາງສິ່ງທ້າທາຍປັດຈຸບັນ. ພ້ອມນີ້, ທ່ານ ປະທານປະເທດ ຍັງໄດ້ສະແດງຄວາມຂອບໃຈຢ່າງຈິງໃຈຕໍ່ປະເທດເຈົ້າພາບ ແລະ ບັນດາປະເທດສະມາຊິກອົງການຝຣັງໂກໂຟນີສາກົນໃນການໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ ແລະ ໄດ້ຢໍ້າຄືນວ່າ ສປປ ລາວ ຈະສືບຕໍ່ມີສ່ວນຮ່ວມຢ່າງສ້າງສັນໃນຄວາມພະຍາຍາມຮ່ວມກັນ ເພື່ອດໍາເນີນນະໂຍບາຍຮ່ວມມື, ພາຍໃຕ້ຄຳຂວັນ “ຄວາມສະເໝີພາບ, ຄວາມຈິງໃຈຊ່ວຍເຫຼືອກັນ ແລະ ກັນ ແລະ ຄວາມສາມັກຄີ” ໃຫ້ເປັນຮູບປະທໍາຢ່າງແທ້ຈິງ ແລະ ຍົກສູງບົດບາດຂອງຫຼັກການຮ່ວມມືຫຼາຍຝ່າຍ. ບົນຈິດໃຈດັ່ງກ່າວ, ສປປ ລາວ ໄດ້ຢືນຢັນຄວາມພ້ອມໃນການປະກອບສ່ວນຢ່າງຕັ້ງໜ້າເຂົ້າໃນວຽກງານທີ່ປິ່ນອ້ອມຂອງອົງການຝຣັງໂກໂຟ ນີສາກົນ, ລວມທັງການຊຸກຍູ້ການພົວພັນຮ່ວມມືລະຫວ່າງ ອາຊຽນ ແລະ ອົງການຝຣັງໂກໂຟນີສາກົນ ໃຫ້ຫຼາຍຂຶ້ນ.
![]() |
ໃນໄລຍະເຂົ້າຮ່ວມກອງປະຊຸມຄັ້ງນີ້, ທ່ານປະທານປະເທດແຫ່ງ ສປປ ລາວ ຍັງໄດ້ພົບປະກັບພະນະທ່ານ ໂຕ ເລິມ ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ; ພະບາດ ສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ພະມະຫາກະສັດ ແຫ່ງ ຣາຊະອານາຈັກກຳປູເຈຍ;ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ປະທານສະພາສູງ ແຫ່ງ ຣາຊະອານາຈັກກໍາປູເຈຍ, ພະນະທ່ານ ອິກນາຊິໂອ ກາສຊິດ ຮອງປະທານາທິບໍດີ ແຫ່ງ ສະມາພັນທະລັດ ສະວິດ ແລະ ພ້ອມກັນນັ້ນກໍໄດ້ມີການພົບປະສາມຝ່າຍ (ລາວ-ຫວຽດນາມ-ກຳປູເຈຍ) ເພື່ອປຶກສາຫາລື ກ່ຽວກັບທິດທາງການຮ່ວມມືໃນຕໍ່ໜ້າລະຫວ່າງ ສປປ ລາວ ກັບບັນດາປະເທດດັ່ງກ່າວໃນຕໍ່ໜ້າ.
ພ້ອມດຽວກັນນີ້, ຍັງມີການຈັດງານວາງສະແດງ ໝູ່ບ້ານຝຣັງໂກໂຟນີ ທີ່ເປັນກິດຈະກໍາໜຶ່ງທີ່ປິ່ນອ້ອມກອງປະຊຸມສຸດຍອດດັ່ງກ່າວໃນລະຫວ່າງວັນທີ 13-17 ພະຈິກ 2026, ໂດຍມີການເຂົ້າຮ່ວມຂອງສະພາການຄ້າ ແລະ ອຸດສາຫະກໍາ ແຫ່ງຊາດລາວ ຊຶ່ງໄດ້ປະກອບສ່ວນໃນການວາງສະແດງ ແລະ ຈໍາໜ່າຍສິນຄ້າ ແລະ ຜະລິດຕະພັນຂອງບໍລິສັດຂອງ ສປປ ລາວ, ໂດຍສະເພາະແມ່ນ ວິສາຫະກິດສ່ວນບຸກຄົນ ຫັດຖະກໍາຕໍ່າຫູກແດນສະຫວັນ.
![]() |
ອົງການຝຣັງໂກໂຟນີສາກົນ (OIF) ແມ່ນອົງການຈັດຕັ້ງສາກົນລະຫວ່າງລັດຖະບານຂອງບັນດາປະເທດທີ່ໃຊ້ພາສາຝຣັ່ງ, ໄດ້ຮັບການສ້າງຕັ້ງຂຶ້ນໃນວັນ 20 ມີນາ 1970 ໂດຍຜູ້ນໍາຈາກ 21 ປະ ເທດທີ່ໄດ້ເຊັນສັນຍາຮ່ວມກັນ ຊຶ່ງໃນເບື້ອງຕົ້ນມີຊື່ວ່າອົງການຮ່ວມມື ທາງດ້ານວັດທະນະທໍາ ແລະ ເຕັກນິກ, ເຄື່ອນໄຫວທາງດ້ານການຝຶກອົບຮົມວິຊາຊີບ ແລະ ເຕັກນິກ ແລະ ດ້ານວັດທະນະທໍາ. ໃນປີ 2005 ຈຶ່ງໄດ້ປ່ຽນຊື່ມາເປັນ ອົງການຝຣັງໂກໂຟນີສາກົນ ຫຼື Organisation Internationale de la Francophonie (OIF) ຊຶ່ງມີຈຸດປະສົງ ເພື່ອສົ່ງເສີມການສຶກສາ, ການຝຶກອົບຮົມວິຊາຊີບ ແລະ ເຕັກນິກ; ການພັດທະນາແບບຍືນຍົງ; ການຮັກສາສັນຕິພາບ, ການເຄົາລົບລະບົບປະຊາທິປະໄຕ ແລະ ສິດທິມະນຸດ ແລະ ເຄົາລົບຄວາມຫຼາກຫຼາຍທາງດ້ານວັດທະນະທຳ ໃນບັນດາປະເທດສະມາຊິກນໍາກັນ. ອົງການ OIF ໄດ້ສ້າງກົດບັດຂອງຕົນ ຂຶ້ນໃນປີ 1997 ແລະ ດັດແກ້ໃໝ່ ໃນປີ 2005 ເພື່ອກຳນົດພາລະບົດບາດ ແລະ ແນວທາງການເຄື່ອນໄຫວຂອງອົງການ. ປັດຈຸບັນ, ອົງການດັ່ງກ່າວເປັນອົງການທີ່ກ້ວາງຂວາງ ມີສະມາຊິກທັງໝົດ 90 ປະເທດ (54 ປະເທດສະມາຊິກສົມບູນ, 7 ປະເທດສະມາຊິກສົມທົບ ແລະ 27 ປະເທດສະມາຊິກສັງເກດການ) ທີ່ຢູ່ໃນ 5 ທະວີບຂອງໂລກ, ມີສຳນັກງານໃຫຍ່ຕັ້ງຢູ່ ນະຄອນຫຼວງປາຣີ ສ ຝຣັ່ງ. ສປປ ລາວ ໄດ້ເຂົ້າເປັນສະມາຊິກສົມທົບຂອງອົງການຟຣັງໂກໂຟນີສາກົນ ໃນປີ 1972 ແລະ ໄດ້ເຂົ້າເປັນເປັນສະມາຊິກສົມບູນຂອງອົງການດັ່ງກ່າວ ນັບແຕ່ປີ 1991 ເປັນຕົ້ນມາ. ນັບແຕ່ນັ້ນມາ, ສປປ ລາວ ໄດ້ເອົາໃຈໃສ່ເຄື່ອນໄຫວ ແລະ ປະກອບສ່ວນເຂົ້າໃນວຽກງານຕ່າງໆຂອງອົງການຝຣັງໂກໂຟນີສາກົນຢ່າງຕັ້ງໜ້າ. ແຜນຍຸດສະສາດຂອງອົງການ 2026-2030 ແມ່ນສຸມໃສ່ ເຮັດໃຫ້ອົງການຝຣັງໂກໂຟນີສາກົນ ມີຄວາມເຂັ້ມແຂງ, ເສີມຂະຍາຍບົດບາດຂອງຕົນໃນເວທີສາກົນ, ການຫັນເປັນດີຈີຕອນ ແລະ ນະວັດຕະກໍາ, ການພັດທະນາແບບຍືນຍົງ ໂດຍເນັ້ນໃສ່ການພັດທະນາຊາວໜຸ່ມ ແລະ ແມ່ຍິງ.
(ຂ່າວ: ກຕທ)



ຄໍາເຫັນ