![]() |
ທ່ານ ບຸນໂຈມ ອຸບົນປະເສີດ ໄດ້ກ່າວເປີດກອງປະຊຸມຢ່າງເປັນທາງການ ພ້ອມທັງໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມ ແລະ ຍັງໄດ້ໃຫ້ກຽດເຜີຍແຜ່ເນື້ອໃນສຳຄັນມະຕິກອງປະຊຸມຄົບຄະນະສະໄໝວິສາມັນຄັ້ງທີ 1 ຂອງຄະນະບໍລິຫານງານສູນກາງພັກ ສະໄໝທີ XII ສະບັບເລກທີ 72/ຄບສພ, ລົງວັນທີ 12 ຕຸລາ 2026.
ທ່ານ ອ່ອນລຳພັນ ບົວສີແກ້ວ ຫົວໜ້າຫ້ອງວ່າການແຂວງ ທັງເປັນຫົວໜ້າກອງເລຂາ ລາຍງານວ່າ: ໄລຍະຜ່ານມາ, ຄະນະພັກແຕ່ລະຂັ້ນ ໄດ້ເອົາໃຈໃສ່ສູງໃນການນຳພາ-ຊີ້ນຳວຽກງານ 3 ປະສານ (ວຽກກໍ່ສ້າງຮາກຖານການເມືອງ, ວຽກພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກສາມສ້າງ). ນອກນັ້ນ, ຍັງໄດ້ມີການປະກອບສ່ວນໃນທົ່ວສັງຄົມທັງພາຍໃນ ແລະ ຕ່າງປະເທດ ເຮັດໃຫ້ຫຼາຍຄາດໝາຍ ແລະ ຕົວຊີ້ບອກ ສາມາດບັນລຸ ແລະ ມີຄວາມຄືບໜ້າໃນລະດັບດີ, ຜ່ານການສະຫຼຸບຕີລາຄາ ຈາກຂະແໜງການກ່ຽວຂ້ອງ, ໃນທົ່ວແຂວງມີ 1,034 ບ້ານ, ມີ 180,433 ຄອບຄົວ, ໃນນັ້ນມີຄອບຄົວພົ້ນທຸກ 160,328 ຄອບຄົວ ກວມເອົາ 88.86%, ຄອບຄົວພັດທະນາ 132,946 ຄອບຄົວ, ກວມເອົາ 73.68%, ບ້ານພົ້ນທຸກ 836 ບ້ານ ກວມ 80.85%, ມີບ້ານພັດທະນາ 319 ບ້ານ, ກວມເອົາ 30.85% ຂອງຈໍານວນບ້ານທົ່ວແຂວງ, ມີເມືອງພົ້ນທຸກແລ້ວ 11 ເມືອງ. ພ້ອມນີ້, ຍັງໄດ້ເອົາໃຈໃສ່ໃກ້ຊິດຕິດແທດອົບຮົມທາງດ້ານການເມືອງ-ແນວຄິດ ໃຫ້ແກ່ສະມາຊິກພັກ-ພະນັກງານ, ທະຫານ, ຕຳຫຼວດແລະປະຊາຊົນທົ່ວແຂວງ ໂດຍເຜີຍແຜ່ເຊື່ອມຊຶມແນວທາງນະໂຍບາຍແນວທາງຂອງພັກ, ລະບຽບກົດໝາຍຂອງລັດ, ມະຕິ, ຄຳສັ່ງ ແລະ ນິຕິກຳຕ່າງໆ, ປຸກລະດົມຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບວາລະແຫ່ງຊາດ ວ່າດ້ວຍການພັດທະນາຊົນນະບົດ-ແກ້ໄຂຄວາມທຸກຍາກ, ເຊື່ອມຊຶມມະຕິກອງປະຊຸມຄະນະບໍລິຫານງານພັກ ສະໄໝທີ X, ຈຶ່ງເຮັດໃຫ້ການຈັດຕັ້ງປະຕິບັດບັນດາມະຕິສະພາປະຊາຊົນແຂວງ ແລະ ແຜນພັດທະນາພື້ນຖານໂຄງລ່າງ ຢູ່ບັນດາບ້ານຂອງເມືອງ ມີຄວາມເຂັ້ມແຂງຢູ່ຂັ້ນຮາກຖານ.
ໃນກອງປະຊຸມ, ຍັງໄດ້ມີການລາຍງານການຈັດຕັ້ງປະຕິບັດວຽກງານ 3 ສ້າງ 5 ປີ 2022-2026 ແລະ ທິດທາງແຜນການ; ລາຍງານວຽກງານປ້ອງກັນຊາດ ໃນການສ້າງບ້ານປ້ອມໝັ້ນສູ້ຮົບຕິດລຽນ ຕິດພັນກັບວຽກກໍ່ສ້າງຮາກຖານການເມືອງ, ການແກ້ໄຂ ແລະ ສະກັດກັ້ນ ບັນຫາຄ້າຂາຍເຖື່ອນ ຕາມເຂດບ້ານລຽບຊາຍແດນ ລາວ-ໄທ, ລາວ-ຫວຽດນາມ, ການລັກລອບດູດແຮ່-ຊາຍຕາມລໍານໍ້າຂອງ; ລາຍງານວຽກງານປ້ອງກັນຄວາມສະຫງົບສຸກ ເປັນຕົ້ນ ການຫັນກຳລັງລົງກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຄາດໝາຍ, ການແກ້ໄຂປະກົດການຫຍໍ້ທໍ້ໃນສັງຄົມ; ລາຍງານກ່ຽວກັບແຜນພັດທະນາ 6 ຕາແສງ ໃນ 5 ເມືອງ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ແລະ ວຽກງານອື່ນໆທີ່ກ່ຽວຂ້ອງ.
ຂ່າວ: ສະຫວັນນະເຂດ

ຄໍາເຫັນ