![]() |
ສະຫາຍ ນາງ ບຸນທະວີ ດວງລາສີ ກ່າວວ່າ: ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແມ່ນວຽກງານຍຸດທະສາດໜຶ່ງ ທີ່ສຳຄັນຂອງພັກ, ຮຽກຮ້ອງໃຫ້ຄະນະພັກ, ຄະນະນຳ ແລະ ພະນັກງານ-ສະມາຊິກພັກທຸກສະຫາຍ ກຳແໜ້ນດ້ານເນື້ອໃນ, ຄົ້ນຄິດຢ່າງລະອຽດ, ຖີ່ຖ້ວນ ຢ່າງມີວິໄສທັດ ທັງວຽກງານຂອງພັກ, ຂອງລັດ ໂດຍສະເພາະເງື່ອນໄຂດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມຮູ້-ຄວາມສາມາດ ແລະ ປະສົບການຕົວຈິງ ຕອບສະໜອງໃຫ້ແກ່ການກຳນົດຕຳແໜ່ງນຳພາ-ຄຸ້ມຄອງໃນແຕ່ລະຂັ້ນ ຮັບປະກັນການຫັນເປັນໜຸ່ມ, ມີລັກສະນະສືບທອດປ່ຽນແທນຢ່າງຕໍ່ເນື່ອງ ເພື່ອເຮັດໃຫ້ການປະຕິບັດໜ້າທີ່ການເມືອງ ມີປະສິດທິພາບ ແລະ ປະສິດທິຜົນສູງສຸດ.
ກອງປະຊຸມຄັ້ງນີີ້, ຜູ້ເຂ້ົາຮ່ວມ ໄດ້ເຊື່ອມຊຶມເນື້ອໃນບັນດາເອກະສານທີ່ສຳຄັນ ເປັນການຈັດຕັ້ງຜັນຂະຫຍາຍມະຕິຕົກລົງຂອງກົມການເມືອງສູນກາງພັກ ສະບັບເລກທີ 64/ກມສພ, ວ່າດ້ວຍ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ບັນດານິຕິກໍາ, ເອກະສານສຳຄັນທີ່ກ່ຽວຂ້ອງ ເປັນຕົ້ນ ແຈ້ງການແນະນຳ ຂອງຄະນະປະຈຳພັກແຂວງສາລະວັນ, ເພື່ອເຮັດໃຫ້ພະນັກງານ ກຳໄດ້ເນື້ອໃນຢ່າງລະອຽດເລິກເຊິ່ງ ເປັນເງື່ອນໄຂ ໃນການຄັດເລືອກ, ເລືອກເຟັ້ນເອົາພະນັກງານນຳພາ-ຄຸ້ມຄອງ ທີ່ມີມາດຖານເງື່ອນໄຂຄົບຖ້ວນ ທີ່ຈະມາເປັນຜູ້ນຳພາ-ຊີ້ນຳວຽກງານຕ່າງໆໃນກົມກອງ ແລະ ເພື່ອຮັບປະກັນລັກສະນະສືບທອດປ່ຽນແທນຕໍ່ເນື່ອງ ໃນແຕ່ລະສະໄໝກອງປະຊຸມໃຫຍ່ຂອງພັກ. ພ້ອມທັງເປັນການກະກຽມບຸກຄະລາກອນ ໃຫ້ຕອບສະໜອງທັງດ້ານຈຳນວນ ແລະ ຄຸນນະພາບ, ຮັບປະກັນໃນການຫັນແນວທາງນະໂຍບາຍຂອງພັກ ລົງສູ່ພາກປະຕິບັດຕົວຈິງ ຕາມທິດຫັນເປັນໜຸ່ມ ແລະ ຍືນຍົງ.
![]() |
ໄລຍະຜ່ານມາ ຄະນະກວດກາພັກອົງການກວດກາລັດແຂວງສາລະວັນ ເອົາໃຈໃສ່ໃນການປະຕິບັດ ແຜນກຳນົດສ້າງພະນັກງານນໍາພາ-ຄຸ້ມຄອງຂັ້ນແຂວງຄຸ້ມຄອງ ໂດຍໄດ້ປະສານສົມທົບກັບຄະນະຈັດຕັ້ງແຂວງ ເພື່ອໃຫ້ສອດຄ່ອງຕາມມະຕິຂອງກົມການເມືອງສູນກາງພັກ, ມີເປົ້າໝາຍໃນແຜນທັງໝົດມີ 21 ສະຫາຍ, ຍິງ 6 ສະຫາຍ.ມາຮອດປັດຈຸບັນ ໄດ້ຮັບການແຕ່ງຕັ້ງເຂົ້າໃນຕາແໜ່ງງານຕົວຈິງ 15 ສະຫາຍ, ຍິງ 5 ສະຫາຍ; ເທົ່າກັບ 71.42%. ທັງໄດ້ມີການແຕ່ງຕັ້ງ, ສັບຊ້ອນ, ຈັດວາງພະນັກງານນໍາພາ-ຄຸ້ມຄອງ ສ່ວນຫຼາຍແມ່ນອີງໃສ່ແຜນກຳນົດ ແລະ ແຜນບຳລຸງສ້າງພະນັກງານນໍາພາ-ຄຸ້ມຄອງ ເປັນຕົ້ນຕໍ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງ ຕາມຄວາມເໝາະສົມ.
ຈາກນັ້ນ, ຄະນະພັກ-ຄະນະນຳ, ພະນັກງານສະມາຊິກພັກ ກໍໄດ້ໃຊ້ສິດປະຊາທິໄປຂອງຕົນ ປ່ອນບັດທາບທາມ ຮອບທີ 1, ຮອບທີ 2 ແລະ ຮອບທີ 3, ເພື່ອເລືອກເຟັ້ນເອົາພະນັກງານນຳພາ-ຄຸ້ມຄອງ, ພະນັກງານສືບທອດປ່ຽນແທນ ເຂົ້າໃສ່ແຕ່ລະປະເພດຕຳແໜ່ງບໍລິຫານ ໃຫ້ຄົບຖ້ວນຕາມມາດຕະຖານ ແລະ ເງື່ອນໄຂ.
ຂ່າວ-ພາບ: ວິໄລວອນ ສິດທິໄຊ


ຄໍາເຫັນ