![]() |
ສະຫາຍ ພົນຕີ ກົງທອງ ສຸຂະວົງ ກ່າວວ່າ: ໂຄງການນີ້ ແມ່ນໝາກຜົນຂອງການຮ່ວມມື ແລະ ການປະສານງານຢ່າງແໜ້ນແຟ້ນ ລະຫວ່າງກະຊວງ ປກຊ ແລະ ບໍລິສັດ ອິນຟີນິຕີ້ ໂຮມດິ້ງ ຈຳກັດ ຊຶ່ງເປັນບາດກ້າວທີ່ສໍາຄັນໃນການຍົກລະດັບພື້ນຖານໂຄງລ່າງ, ການບໍລິການ ແລະ ການທ່ອງທ່ຽວ ຢູ່ເຂດສະໜາມບິນສາກົນວັດໄຕ ໃນການຕ້ອນຮັບແຂກ, ນັກທຸລະກິດ ແລະ ນັກທ່ອງທ່ຽວທັງພາຍໃນ ແລະ ຕ່າງປະ ເທດ, ການລິເລີ່ມໂຄງການກໍ່ສ້າງໂຮງແຮມ, ອາພາດເມັ້ນ, ສູນການຄ້າ ແລະ ຮ້ານຄ້າປອດພາສີທີ່ທັນສະ ໄໝໃນຄັ້ງນີ້, ຈະຊ່ວຍຍົກລະດັບການບໍລິການຕອບສະໜອງຄວາມຕ້ອງການຂອງຜູ້ໂດຍສານ ແລະ ນັກທ່ອງທ່ຽວຢ່າງຄົບວົງຈອນ, ຊຸກຍູ້ເສດຖະກິດ, ສ້າງວຽກເຮັດງານທໍາ, ສ້າງລາຍຮັບໃນຂະແໜງການທ່ອງທ່ຽວ ແລະ ການຄ້າເພື່ອເປັນການກະຕຸ້ນການຂະຫຍາຍຕົວທາງເສດຖະກິດ-ສັງຄົມ ເວົ້າລວມ, ເວົ້າສະ ເພາະການສ້າງລາຍຮັບໃຫ້ກະຊວງ ປກຊ, ພັດທະນາພື້ນຖານໂຄງລ່າງ ເຮັດໃຫ້ຂອບເຂດສະໜາມບິນ ມີຄວາມສະອາດ, ສວຍງາມ, ມີສິ່ງອໍານວຍຄວາມສະດວກທີ່ທັນສະໄໝ ແລະ ໄດ້ມາດຕະຖານທຽບເທົ່າສາ ກົນ. ພ້ອມທັງ, ເນັ້ນໜັກໃຫ້ຄະນະຮັບຜິດຊອບໂຄງການ ແລະ ທຸກໆຝ່າຍປະຕິບັດການກໍ່ສ້າງໃຫ້ເຂັ້ມງວດຕາມມາດຕະຖານເຕັກນິກ, ເຕັກໂນໂລຊີ ແລະ ລະບຽບກົດໝາຍທີ່ກຳນົດໄວ້, ພ້ອມທັງຮັບປະກັນຄວາມປອດໄພ ແລະ ບໍ່ໃຫ້ສົ່ງຜົນກະທົບຕໍ່ການບໍລິການຂອງສະໜາມບິນ, ທັງສອງຝ່າຍ (ກະຊວງປ້ອງກັນປະ ເທດ ແລະ ບໍລິສັດ) ຕ້ອງປະສານງານກັນຢ່າງໃກ້ຊິດ, ແກ້ໄຂບັນຫາອຸປະສັກທີ່ອາດຈະເກີດຂຶ້ນຢ່າງທັນການ ແລະ ໂປ່ງໃສ, ຄຸ້ມຄອງເວລາສຸມໃສ່ການດໍາເນີນງານໃຫ້ສໍາເລັດຕາມກຳນົດເວລາ ເພື່ອໃຫ້ສາມາດ ເປີດບໍລິການ ຕອບສະໜອງຄວາມຕ້ອງການຂອງສັງຄົມໄດ້ໂດຍໄວ.
![]() |
ໂຄງການນີ້, ປະກອບມີອາຄານ 9 ຫຼັງ ແລະ ສູນການຄ້າຫຼັກ ທີ່ມີຟັງຊັນການນໍາໃຊ້ທີ່ຫຼາກຫຼາຍ, ຜະລິດຕະພັນບັນດາກິດຈະການພາຍໃນໂຄງການປະກອບມີ: ວິນລາຊັ້ນສູງ (Sky Villas), ທີ່ຢູ່ອາໄສແບບຫ້ອງຊຸດຂະໜາດໃຫຍ່, ໂຮງແຮມລະດັບມາດຕະຖານສາກົນ ແລະ ໃຫ້ບໍລິການອາພາດເມັ້ນ ຕອບສະໜອງຄວາມຕ້ອງການທີ່ຫຼາກຫຼາຍ ທັງການຕ້ອນຮັບລະດັບສູງ, ການພັກອາໄສປະຈໍາວັນ, ການພັກເຊົາເພື່ອທຸລະກິດ ແລະ ອື່ນໆ. ພື້ນທີ່ແຫ່ງນີ້, ສາມາດຮອງຮັບທັງຜູ້ມາຢ້ຽມຢາມຈາກພາຍນອກ ແລະ ຜູ້ທີ່ພັກອາໄສຢູ່ພາຍໃນໂຄງການ ແລະ ໃຫ້ບໍລິການຜູ້ເດີນທາງມາເຮັດທຸລະກິດຜ່ານສະໜາມບິນ ແລະ ຊາວນະຄອນຫຼວງວຽງຈັນ.
![]() |
(ຂ່າວ: ສຸກສາຄອນ)



ຄໍາເຫັນ