![]() |
ທ່ານ ມາຍຟອງ ມາຍຊາຍ ຜູ້ອຳນວຍການໃຫຍ່ ມວສຊ ໄດ້ລາຍງານຜົນສໍາເລັດອັນພົ້ນເດັ່ນໃນສົກຮຽນ 2025-2026 ພ້ອມທັງວາງທິດທາງຈຸດສຸມ 2026-2027.
ຈາກນັ້ນ, ທ່ານ ສະເຫຼີມໄຊ ກົມມະສິດ ໄດ້ກ່າວວ່າ: ການຂະໜານນາມ ແລະ ປະກາດ ມວສ ເປັນ ມວສຊ ແມ່ນສັນຍາລັກຂອງການຍົກລະດັບຄວາມຮັບຜິດຊອບ, ພັນທະກິດ ແລະ ຄວາມໄວ້ເນື້ອເຊື່ອໃຈຂອງສັງຄົມ. ມັນຮຽກຮ້ອງໃຫ້ ມວສຊ ຕ້ອງເປັນເສົາຫຼັກ ໃນການກຳນົດມາດຕະຖານຄຸນນະພາບການສຶກສາ ສາທາ ລະນະສຸກ ເປັນກຳລັງແຮງຕົ້ນຕໍ ໃນການຄົ້ນຄວ້າວິທະຍາສາດສຸຂະພາບ ແລະ ເປັນບ່ອນສ້າງບຸກຄະລາກອນທາງການແພດທີ່ມີຄຸນນະພາບສູງ.
ການລວມສູນທາງດ້ານການສຶກສາ ສາທາລະນະສຸກ ໂດຍການເຕົ້າໂຮມເອົາບັນດາສະຖານການສຶກສາ ສາທາລະນະສຸກໃນຂອບເຂດທົ່ວປະເທດ ມາເປັນເຄືອຂ່າຍດ້ານວິຊາການອັນດຽວກັນຢູ່ໃນ ມວສຊ ຖືເປັນວິໄສທັດ ແລະ ການຊີ້ນໍາ-ນໍາພາທີ່ຖືກຕ້ອງ ແລະ ສ່ອງໃສຂອງຄະນະພັກ-ຄະນະນໍາ ກະ ຊວງສາທາລະນະສຸກ ກໍຄືຂອງ ມວສຊ ເພື່ອເຮັດໃຫ້ມາດຕະຖານການສຶກສາ ສາທາລະນະສຸກມີຄວາມເປັນເອກະພາບ ແລະ ຮັບປະກັນຄຸນນະພາບຫຼາຍຂຶ້ນກວ່າເກົ່າ; ມວສ ແຫ່ງຊາດ ບໍ່ໄດ້ຖືກຮັບຮອງເພື່ອໃຫ້ມີຄວາມຮັບຜິດ ຊອບພຽງແຕ່ເຂດເທສະບານ ຫຼື ນະຄອນຫຼວງເທົ່ານັ້ນ, ແຕ່ຈະຕ້ອງແບກຫາບຄວາມໝັ້ນຄົງດ້ານສຸຂະພາບ, ການມີສຸຂະພາບທີ່ດີຂອງຄົນທັງຊາດ ຊຶ່ງມັນໝາຍເຖິງ ການກຳນົດມາດຕະຖານດ້ານການສຶກສາ ສາທາລະນະສຸກ, ການເສີມຂະຫຍາຍການຄົ້ນຄວ້າວິທະຍາສາດ ແລະ ນະວັດຕະກໍາທາງສຸຂະພາບ ແລະ ການຮັບປະກັນວ່າ: ທຸກໆນະໂຍບາຍ, ທຸກໆບຸກຄະລາກອນທາງການແພດທີ່ສໍາເລັດການສຶກສາ ແລະ ທຸກໆນະວັດຕະກໍາ ສາມາດນໍາໄປໃຊ້ເພື່ອປະໂຫຍດສູງສຸດຂອງປະຊາຊົນໃນທຸກໆແຂວງ, ທຸກໆເມືອງ ແລະ ທຸກໆເຂດຫ່າງໄກສອກຫຼີກ; ຄວາມໝັ້ນຄົງ ແລະ ຄວາມຮັ່ງມີຍືນຍົງຂອງຊາດ ຕິດພັນຢ່າງສະໜິດແໜ້ນກັບສຸຂະພາບທີ່ແຂງແຮງ ແລະ ຄວາມຢູ່ດີກິນດີຂອງປະຊາຊົນ. ຄວາມໝັ້ນຄົງດ້ານສຸຂະພາບທີ່ແທ້ຈິງ ບໍ່ສາມາດອາໄສພຽງແຕ່ຮູບແບບຈາກພາຍນອກເທົ່ານັ້ນ ແຕ່ມັນຮຽກຮ້ອງໃຫ້ ສປປ ລາວ ຕ້ອງສ້າງລະບົບທີ່ອີງໃສ່ຫຼັກຖານວິທະຍາສາດຂອງຕົນເອງ ທີ່ສອດຄ່ອງກັບສະພາບຄວາມເປັນຈິງດ້ານເສດຖະກິດ-ສັງຄົມ, ໂຄງສ້າງປະຊາກອນ ແລະ ສຸຂະພາບຂອງປະຊາ ຊົນລາວ.
ໃນຖານະທີ່ຖືກຍົກລະດັບເປັນ ມວສຊ ໄດ້ຮັບຄວາມໄວ້ວາງໃຈໃຫ້ເປັນຜູ້ນຳພາໃນດ້ານນີ້. ຜ່ານການປະເມີນເຕັກໂນໂລຊີດ້ານສຸຂະພາບ (HTA) ທີ່ອ້າງອີງໃສ່ຂໍ້ມູນພາຍໃນ, ການຄົ້ນຄວ້າທາງຄຣີນິກ ແລະ ການລົງໄກ້ສິດຕິດແທດກັບຊຸມຊົນ, ມວສຊ ຈະຊ່ວຍໃຫ້ການຕັດສິນໃຈດ້ານນະໂຍບາຍສາທາລະນະສຸກ ໃຫ້ມີປະສິດທິຜົນສູງສຸດ ແລະ ເໝາະສົມກັບປະຊາຊົນ. ຄຽງຄູ່ກັບນະໂຍບາຍດ້ານສາທາລະນະສຸກ ຫຼື ການບໍລິການຮັກສາສຸຂະພາບທີ່ມີຄຸນນະພາບ, ຕ້ອງໃຫ້ຄວາມສໍາຄັນກັບຄວາມສະເໝີພາບເຊັ່ນກັນ: ໃນຂະນະທີ່ເຮົາຂະຫຍາຍນະວັດຕະກໍາທາງວິທະຍາສາດ ແລະ ການບໍລິການທີ່ມີຄຸນນະພາບ, ຕ້ອງບໍ່ປ່ອຍປະລະເລີຍກັບກຸ່ມປະຊາຊົນທີ່ມີຄວາມບອບບາງ, ຕ້ອງທັບມ້າງອຸປະສັກທີ່ກີດຂວາງການເຂົ້າເຖິງການບໍລິການ ຂອງປະຊາຊົນບັນດາເຜົ່າ ແລະ ເຮົາຕ້ອງປົກປ້ອງສຸຂະພາບຂອງແມ່ ແລະ ເດັກ ໃນທຸກໆໄລຍະຊີວິດ; ຄະນະນໍາ, ຄູ-ອາຈານ ແລະ ບຸກຄະລາກອນຂອງ ມວສຊ, ລັດຖະບານ ສປປ ລາວ ໄດ້ມອບຄວາມໄວ້ວາງໃຈອັນສູງສົ່ງໃຫ້ ໃນຂະນະທີ່ພັດທະນາໂຄງລ່າງພື້ນຖານ (ຊຶ່ງລວມມີການປຸກສ້າງສູນຈໍາລອງການຮຽນ-ການສອນ ຫຼື Modern Simulation Center ແລະ ໂຮງໝໍມະຫາວິທະຍາໄລ ຂະໜາດ 400 ຕຽງ), ກໍາລັງສ້າງມາດຕະຖານໃໝ່ ໃຫ້ກັບວົງການສາທາລະນະສຸກຂອງລາວ ຕິດພັນກັບການຫັນເປັນເສດຖະກິດເອກະລາດ ເປັນເຈົ້າຕົນເອງ ດ້ວຍການສ້າງລາຍຮັບກຸ້ມຕົນເອງເທື່ອລະກ້າວ. ໃນໂລກທີ່ມີການເຊື່ອມໂຍງກັນ ຄວາມໝັ້ນຄົງດ້ານສຸຂະພາບ ຮຽກຮ້ອງໃຫ້ມີການຮ່ວມມືໃນພາກພື້ນ ແລະ ສາກົນ. ພະຍາດຕິດຕໍ່ ບໍ່ເຄີຍມີພົມແດນ ແລະ ເຊື້ອພະຍາດບໍ່ຈໍາເປັນຕ້ອງມີພາສປອດ (Passport) ໃນການເດີນທາງ ແລະ ການລະບາດຂອງພະຍາດໂຄວິດ-19 ໄດ້ກາຍເປັນບົດຮຽນທີ່ສອນໃຫ້ມວນມະນຸດທົ່ວໂລກຮູ້ວ່າ: ເຮົາຕ້ອງມີການກຽມພ້ອມທຸກເວລາ ແລະ ເຮົາຕ້ອງມີຄວາມເຂັ້ມແຂງໃນທຸກສະຖານະການ ໂດຍສະເພາະໃນສະ ພາບການຂອງໂລກປັດຈຸບັນ ບໍ່ວ່າຈະເປັນດ້ານການເມືອງ, ການທະຫານ, ເສດຖະກິດ, ການໂຈມຕີທາງໄຊເບີ ແລະ ອື່ນໆ ທີ່ກໍາລັງຜັນແປຢ່າງສະຫຼັບຊັບຊ້ອນ ແລະ ຄາດເດົາໄດ້ຍາກ.
ສະນັ້ນ, ຮຽກຮ້ອງໃຫ້ກຽມພ້ອມທຸກເວລາເພື່ອຮັບມືກັບສະພາບ ຫຼື ເຫດການສຸກເສີນທີ່ອາດຈະເກີດຂຶ້ນໃນອະນາຄົດ. ສະນັ້ນ, ເພື່ອຮັບປະກັນຄວາມພ້ອມ ແລະ ການຕອບໂຕ້ຕໍ່ເຫດການສຸກເສີນຢ່າງທັນການ, ການຫັນເປັນທັນສະໄໝ ຫຼື ດີຈີຕອນເພື່ອເຊື່ອມໂຍງ-ເຊື່ອມຈອດໃນທຸກມິຕິມີຄວາມຈໍາເປັນ ແລະ ຂາດບໍ່ໄດ້ໃນຍຸກສະໄໝປັດຈຸບັນ.
ຂ່າວ-ພາບ: ບຸນອູ້ມ

ຄໍາເຫັນ