 |
ກອງປະຊຸມອັນມີຄວາມໝາຍສຳຄັນນີ້ ຈັດຂຶ້ນດ້ວຍການຮ່ວມມື 4 ຝ່າຍ ລະຫວ່າງມະຫາວິທະຍາໄລແຫ່ງຊາດ, ສະມາຄົມໂນໂອໂນມີໂລກ, ສະຖາບັນການເມືອງ ແລະ ການປົກຄອງແຫ່ງຊາດແລະສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ.ເຂົ້າຮ່ວມເປັນປະທານ ແລະ ກ່າວຖະແຫຼງໃນພິທີເປີດຄັ້ງນີ້ ປະກອບມີ ຜູ້ຕາງໜ້າລະດັບສູງຈາກ 4 ຝ່າຍ ໄດ້ແກ່: 1. ທ່ານ ພູເພັດ ກ້ຽວພິລາວົງອຳນວຍການໃຫຍ່ ມະຫາວິທະຍາໄລແຫ່ງຊາດ, 2. ທ່ານ ເຊີເກດີບອດຣູນອບປະທານສະມາຄົມໂນໂອໂນມີໂລກສະຫະພັນຣັດເຊຍ, 3. ທ່ານ ສຸພາວະດີຫຼ້າຄຳສາຍຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, 4. ທ່ານ ນາງ ແກ້ວວິວອນ ອຸດທະຈັກຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ.
ພ້ອມດຽວກັນນີ້, ກໍມີບັນດາຜູ້ຕາງໜ້າຈາກກະຊວງ, ຂະແໜງການ, ນັກຄົ້ນຄວ້ານະໂຍບາຍ, ຄະນະນຳ, ອາຈານ, ນັກວິທະຍາສາດ ເຂົ້າຮ່ວມຢ່າງພ້ອມພຽງ ລວມກວ່າ 100 ທ່ານ.
ໃນຍຸກປັດຈຸບັນ, ໂຄງສ້າງເສດຖະກິດໂລກກຳລັງປະເຊີນໜ້າກັບການປ່ຽນແປງທາງໂຄງສ້າງຄັ້ງໃຫຍ່ ອັນເນື່ອງມາຈາກການຫັນປ່ຽນສູ່ຍຸກດີຈີຕອນຢ່າງວ່ອງໄວ, ການພັດທະນາເຕັກໂນໂລຊີ, ປັນຍາປະດິດ (AI) ແລະ ຄວາມຜັນຜວນທາງພູມສາດເສດຖະກິດ. ຮູບແບບການເຕີບໂຕແບບດັ້ງເດີມທີ່ອີງໃສ່ການຂຸດຄົ້ນຊັບພະຍາກອນທຳມະຊາດ ແລະ ກົນໄກຕະຫຼາດແບບເກງກຳໄລ ໄດ້ກ້າວສູ່ຂີດຈຳກັດທາງໂຄງສ້າງ. ດັ່ງນັ້ນ, ການນຳເອົາ “ທິດສະດີ ໂນໂອໂນມີຊຶ່ງລິເລີ່ມໂດຍ ທ່ານ ເຊີເກ ດີ ບອດຣູນອບ ມາວິເຄາະ ແລະ ໝູນໃຊ້ເຂົ້າໃນສະພາບຕົວຈິງຂອງ ສປປ ລາວ ຈຶ່ງເປັນບາດກ້າວບຸກທະລຸທາງທິດສະດີ ແລະ ພາກປະຕິບັດທີ່ມີຄວາມໝາຍການເມືອງອັນເລິກເຊິ່ງ.
ສປປ ລາວ ພາຍໃຕ້ການຊີ້ນຳ-ນຳພາອັນຖືກຕ້ອງ ແລະວິໄສທັດອັນຍາວໄກຂອງພັກປະຊາຊົນປະຕິວັດລາວ, ພວມຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ ແລະ ວິໄສທັດຍຸດທະສາດ ຈາກປະເທດທີ່ບໍ່ມີຊາຍແດນຕິດຈອດກັບທະເລ ໄປສູ່ການເປັນ “ປະເທດເຊື່ອມໂຍງ-ເຊື່ອມຈອດ”.ທິດສະດີໂນໂອໂນມີ ຊີ້ໃຫ້ເຫັນເສັ້ນທາງວິວັດທະນາການໄປສູ່ລະບົບເສດຖະກິດທີ່ຂັບເຄື່ອນດ້ວຍຄວາມຮູ້ແບບເຂັ້ມຂຸ້ນ, ການນຳໃຊ້ເຕັກໂນໂລຊີຂັ້ນສູງ, ລະບົບອັດຕະໂນມັດ ແລະ ປັນຍາປະສົມປະສານ ເພື່ອຮັບໃຊ້ຄວາມຕ້ອງການທີ່ແທ້ຈິງຂອງມະນຸດ ແລະ ສັງຄົມ, ພ້ອມທັງຫັນປ່ຽນຈຸດສຸມຈາກການສະສົມທຶນແບບທຶນນິຍົມເກງກຳໄລໄປສູ່ການພັດທະນາທ່າແຮງບົ່ມຊ້ອນຂອງມະນຸດຢ່າງຮອບດ້ານ. ສິ່ງດັ່ງກ່າວມີຄວາມສອດຄ່ອງຢ່າງຍິ່ງກັບແນວທາງສັງຄົມນິຍົມ ແລະ ການສ້າງເສດຖະກິດເອກະລາດ ເປັນເຈົ້າຕົນເອງຂອງ ສປປ ລາວ.
 |
ພິທີເປີດກອງປະຊຸມ ໄດ້ດຳເນີນໄປພາຍໃຕ້ການດຳເນີນລາຍການຂອງ ທ່ານ ສຸບິນ ສີສະວັດ ໂດຍຜູ້ຕາງໜ້າການນຳທັງ 4 ຝ່າຍ ໄດ້ຜັດປ່ຽນກັນຂຶ້ນມີຄຳເຫັນ.
1. ທ່ານພູເພັດ ກ້ຽວພິລາວົງໄດ້ເນັ້ນໜັກເຖິງຄວາມສຳຄັນຂອງສະຖາບັນການສຶກສາຊັ້ນສູງໃນການເປັນຊັບພະຍາກອນມະນຸດ ແລະ ຜັນຂະຫຍາຍນະໂຍບາຍສາທາລະນະໃຫ້ຕິດພັນກັບການຫັນເປັນດີຈີຕອນ.
2. ທ່ານ ເຊີເກ ດີ ບອດຣູນອບໄດ້ນຳສະເໜີແນວຄວາມຄິດຫຼັກຂອງທິດສະດີນູໂນມີ ວ່າດ້ວຍການຫັນປ່ຽນອາລິຍະທຳມະນຸດ ຈາກຍຸກເສດຖະກິດວັດຖຸສູ່ຍຸກເສດຖະກິດປັນຍາ ແລະ ຄວາມຮູ້.
3. ທ່ານສຸພາວະດີ ຫຼ້າຄຳສາຍ ໄດ້ຍົກໃຫ້ເຫັນມຸມມອງການເມືອງ ແລະ ບົດບາດຂອງສະຖາບັນການເມືອງ ໃນການສຶກສາອົບຮົມການເມືອງ-ແນວຄິດ, ການຍົກລະດັບທິດສະດີມາກ-ເລນິນ ແລະ ການເຊື່ອມສານທິດສະດີເສດຖະກິດສະໄໝໃໝ່ເຂົ້າໃນວຽກງານການນຳພາ-ຄຸ້ມຄອງລັດ.
4. ທ່ານ ນາງ ແກ້ວວິວອນ ອຸດທະຈັກໄດ້ວິເຄາະສະພາບເສດຖະກິດມະຫາພາກຂອງລາວ ແລະ ຍຸດທະສາດການຫັນປະເທດໃຫ້ກາຍເປັນສູນກາງຄວາມຮູ້ ແລະ ໂລຈີສຕິດ ຂອງພາກພື້ນ.
ກອງປະຊຸມສຳມະນາວິທະຍາສາດລະດັບສາກົນຄັ້ງນີ້ ມີໝາກຜົນບັນລຸໄດ້ຢ່າງເປັນຮູບປະທຳດັ່ງນີ້:ການສ້າງບົດສະຫຼຸບນະໂຍບາຍເພື່ອສ້າງເອກະສານວິເຄາະເຊີງຍຸດທະສາດ“ການເຊື່ອມໂຍງແນວຄິດ ໂນໂນມີ ເຂົ້າໃນຍຸດທະສາດການພັດທະນາ ເສດຖະກິດ-ສັງຄົມ ຂອງ ສປປ ລາວ ຫຼັງປີ 2030”ສະເໜີຕໍ່ພາກລັດ ແລະ ອົງການວາງແຜນພັດທະນາລະດັບຊາດ, ການສ້າງສູນຄົ້ນຄວ້າ:ຂໍ້ສະເໜີໃນການຈັດຕັ້ງໜ່ວຍງານ ຫຼື ສູນຄົ້ນຄວ້າສະເພາະດ້ານ ໂນໂນມີ ແລະ ເສດຖະກິດຖານຄວາມຮູ້ ເພື່ອຮັບປະກັນການສືບຕໍ່ຄົ້ນຄວ້າໃນໄລຍະຍາວ, ການຍົກລະດັບວຽກງານການພິມ ແລະ ສຶກສາ:ການແປຜົນງານຄົ້ນຄວ້າຫຼັກກ່ຽວກັບໂນໂນມີເປັນພາສາລາວ, ການສ້າງຫຼັກສູດການຮຽນ-ການສອນ ແລະ ການຈັດພິມວາລະສານວິຊາການສະບັບພິເສດ, ການລົງນາມບົດບັນທຶກຄວາມເຂົ້າໃຈ (MOU): ເພື່ອຮັດແໜ້ນຄວາມຮ່ວມມືຢ່າງຮອບດ້ານ
ກອງປະຊຸມຄັ້ງນີ້ ຖືເປັນຂີດໝາຍປະຫວັດສາດອັນສຳຄັນ ທີ່ສະທ້ອນໃຫ້ເຫັນເຖິງວິໄສທັດອັນກວ້າງໄກ ແລະ ຄວາມຕັດສິນໃຈອັນເດັດດ່ຽວ ໃນການຍົກລະດັບຂີດຄວາມສາມາດທາງປັນຍາ, ເຕັກໂນໂລຊີ ແລະ ຊັບພະຍາກອນມະນຸດ.
(ຂ່າວ: ສມປຊ)
ຄໍາເຫັນ