ສະຫາຍເຈິນ ແທັງ ເໝີ້ນທີ່ນັບຖື ແລະ ຮັກແພງ, ໃນນາມສະພາແຫ່ງຊາດ ແຫ່ງ ສປປ ລາວ ແລະ ໃນນາມສ່ວນຕົວ, ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງມາຍັງສະຫາຍ ທີ່ໄດ້ຮັບເລືອກຕັ້ງເປັນປະທານສະພາແຫ່ງຊາດ ແຫ່ງ ສສ ຫວຽດນາມອີກວາລະໜຶ່ງ ໃນກອງປະຊຸມຄັ້ງປະຖົມມະລືກ ຂອງສະພາແຫ່ງຊາດຊຸດທີ XVI, ໃນວັນທີ 6 ເມສາ 2026. ຂ້າພະເຈົ້າຂໍສະແດງຄວາມຊົມເຊີຍຢ່າງຈິງໃຈ ແລະ ອວຍພອນໄຊອັນປະເສີດ ມາຍັງສະຫາຍ ມານະໂອກາດນີ້ດ້ວຍ.
ການທີ່ສະຫາຍໄດ້ຮັບການເລືອກຕັ້ງ ໃຫ້ດຳລົງຕໍາແໜ່ງທີ່ສຳຄັນດັ່ງກ່າວອີກວາລະໜຶ່ງເປັນການສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຢ່າງສູງຈາກພັກ, ລັດ, ບັນດາສະມາຊິກສະພາແຫ່ງຊາດ ແລະ ປະຊາຊົນຫວຽດນາມອ້າຍນ້ອງທີ່ມີຕໍ່ສະຫາຍ ຊຶ່ງເປັນການນຳຜູ້ທີ່ມີປະສົບການສູງ, ມີບົດຮຽນອັນອຸດົມສົມບູນ ແລະ ມີຜົນງານທີ່ພົ້ນເດັ່ນ ໃນການປະຕິບັດໜ້າທີ່ວຽກງານໃນໄລຍະຜ່ານມາ.
ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ ດ້ວຍຄວາມຮູ້ຄວາມສາມາດ, ບົດຮຽນອັນລໍ້າຄ່າ ແລະປະສົບການທີ່ຫຼາກຫຼາຍ ຂອງ ສະຫາຍ, ສະຫາຍ ຈະນໍາພາສະພາແຫ່ງຊາດຫວຽດນາມ ຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງອົງການນິຕິບັນຍັດທີ່ມີກຽດສະຫງ່າ ແລະ ສູງສົ່ງດ້ວຍຜົນສຳເລັດອັນຈົບງາມ, ປະກອບສ່ວນອັນສຳຄັນເຂົ້າໃນພາລະກິດສ້າງສາພັດທະນາປະເທດຊາດ ຫວຽດນາມ ວິລະຊົນໃຫ້ຮັ່ງມີເຂັ້ມແຂງ, ເຮັດໃຫ້ຖານະບົດບາດ ຂອງປະເທດຊາດຫວຽດນາມ ນັບມື້ພົ້ນເດັ່ນຂຶ້ນໃນເວທີພາກພື້ນ ແລະ ສາກົນ.
ຂ້າພະເຈົ້າ ຫວັງເປັນຢ່າງຍິ່ງວ່າ ຈະໄດ້ເຮັດວຽກຮ່ວມກັບສະຫາຍ ແລະ ສະພາແຫ່ງຊາດຫວຽດນາມ ໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສະພາແຫ່ງຊາດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ໄດ້ຮັບການເສີມຂະຫຍາຍສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.
ໃນໂອກາດອັນສະຫງ່າລາສີນີ້, ຂໍອວຍພອນໄຊອັນປະເສີດແດ່ສະຫາຍຈົ່ງມີພະລານາໄມອັນສົມບູນ, ປະສົບຜົນສໍາເລັດໃນໜ້າທີ່ວຽກງານອັນໃຫຍ່ຫຼວງ ແລະ ມີກຽດສະຫງ່າຂອງຕົນ.
ດ້ວຍຄວາມນັບຖື ແລະ ຮັກແພງຢ່າງສູງ.
ຄໍາເຫັນ