ໂຮງຮຽນການເມືອງການປົກຄອງແຂວງຜົ້ງສາລີ ສະຫຼອງວັນຄູແຫ່ງຊາດຄົບຮອບ 30 ປີ.

(7 ຕຸລາ 1994-7 ຕຸລາ 2024) ຂຶ້ນຢູ່ທີ່ສະໂມສອນໂຮງຮຽນດັ່ງກ່າວ ໂດຍການເຂົ້າຮ່ວມຂອງ ທ່ານ ຈັນສີ ແສງສົມພູ ກຳມະການພັກແຂວງ ຫົວໜ້າໂຮງຮຽນການເມືອງການປົກຄອງແຂວງ, ມີບັນດາຄູອາຈານ, ນັກສຶກສາລະບົນຂັ້ນກາງຮຸ່ນທີ II ແລະ ຂັ້ນຕົ້ນຮຸ່ນທີ I ພ້ອມດ້ວຍແຂກຖືກເຊີນເຂົ້າຮ່ວມ.
ໃນພິທີ, ທ່ານ ຈັນສີ ແສງສົມພູ ໄດ້ເລົ່າຄືນມູນເຊື້ອວັນຄູແຫ່ງຊາດຄົບຮອບ 30 ປີ ຊຶ່ງທ່ານ ໄດ້ຍົກໃຫ້ເຫັນພາລະບົດບາດຄວາມເປັນຄູລວມທັງການພັດທະນາຄູແຕ່ລະໄລຍະໃຫ້ມີຄູນນະພາບ, ຊຶ່ງຍາມໃດພັກ-ລັດຖະບານກໍໃຫ້ຄວາມສໍາຄັນ ແລະ ເອົາໃຈໃສ່ຕໍ່ວຽກງານການສຶກສາຄູ ແລະ ຖືເອົາຄູສອນເປັນກົກໃນການຍົກສູງຄຸນນະພາບຂອງການສຶກສາ ກໍຄືການພັດທະນາຊັບພະຍາກອນມະນຸດ, ຄູໄດ້ມີບົດບາດສໍາຄັນໃນການສ້າງອະນາຄົດໃຫ້ຄົນແຕ່ລະຫຸ່ນ ໃນພາລະກິດສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ ຈົນຖືກສັງຄົມຂະໜານນາມວ່າ: ຄູແມ່ນແມ່ພິມຂອງຊາດ, ຄູແມ່ນວິສາວະກອນແຫ່ງດວງວິນຍານ, ຄູແມ່ນຜູ້ທີ່ມີຄວາມຮູ້ ແລະ ປະສົບການທີ່ສາມາດຖ່າຍທອດໃຫ້ຄົນອື່ນ, ຄູຄືຜູ້ນໍາພາການປ່ຽນແປງໃໝ່ ແລະ ອື່ນໆ.
ວັນທີ 7 ຕຸລາ ເປັນວັນປະຫວັດສາດວັນໜຶ່ງຂອງປະຊາຊົນລາວບັນດາເຜົ່າກໍຄືຄູ-ອາຈານທີ່ມີພັນທະສິດສອນເພື່ອສ້າງພາລະກິດໃນປະຫວັດສາດທຸກຍຸກສະໄໝໃຫ້ກາຍເປັນຊັບພະຍາກອນທີ່ດີ ແລະ ເປັນທຶນຮອນອັນປະເສີດຂອງຊາດ. ສ່ວນວ່າ ປະຫັວດສາດທີ່ມາຂອງວັນທີ 7 ຕຸລານັ້ນໄດ້ຖືເອົາວັນທີ່ນາຍຄູຄໍາໄດ້ເຂົ້າເປັນນາຍຄູມື້ທໍາອິດຂອງຄົນລາວໃນຍຸກຝຣັ່ງເຂົ້າມາປົກຄອງ ແລະ ເປັນຜູ້ທໍາອິດຂອງຄົນລາວ.
ໃນໂອກາດອັນມີຄວາມໝາຍຄວາມສຳຄັນນີ້ ນັກສຶກສາລະບົນຂັ້ນກາງ, ຂັ້ນຕົ້ນ ໄດ້ມອບຂອງຂວັນ ແລະ ຊຸດກິລາໃຫ້ກັບຄູອາຈານ ພ້ອມທັງສ້າງຂະບວນການແຂ່ງຂັນກິລາບານເຕະມິດຕະພາບລະຫ່ວາງຄູອາຈານ ແລະ ນັກສຶກ ຢ່າງເປັນຂະບວນຟົດຟື້ນ.
(ພາບ-ຂ່າວ: ແສງຄຳ ສາລີວັນ)