ຫ້ອງວ່າການສໍານັກງານປະທານປະເທດ (ຫສປທ) ໄດ້ຈັດພິທີປາຖະກະຖາວັນສໍາຄັນຂອງຊາດ ຄື: ວັນຊາດ ທີ 2 ທັນວາ ຄົບຮອບ 49 ປີ (2 ທັນວາ 1975 – 2 ທັນວາ 2024) ແລະ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ (13 ທັນວາ 1920 – 13 ທັນວາ 2024) ໃນວັນທີ 25 ພະຈິກນີ້ ທີ່ຫ້ອງປະຊຸມຂອງ ຫສປທ.
ເປັນກຽດປາຖະກະຖາ ໂດຍ ທ່ານ ອິນທະປັນຍາ ຂຽວວົງພະຈັນ ຮອງເລຂາຄະນະພັກ ຮອງຫົວໜ້າ ຫສປທ, ເຂົ້າຮ່ວມຮັບຟັງມີບັນດາ ຄະນະພັກ, ຄະນະນໍາ, ຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ ພ້ອມດ້ວຍພະນັກງານຫຼັກແຫຼ່ງ, ພະນັກງານ-ລັດຖະກອນ.
ຈຸດປະສົງຂອງການປາຖະກະຖາ ເພື່ອຫວນຄືນມູນເຊື້ອການຕໍ່ສູ້ຢ່າງອົງອາດກ້າຫານ ບໍ່ຍອມຈໍານົນຂອງປະຊາຊົນລາວບັນດາເຜົ່າ ພາຍໃຕ້ການນໍາພາທີ່ສະຫຼາດສ່ອງໃສ ຂອງພັກ, ສາມາດນໍາພາປະຊາຊົນລາວລຶບລ້າງແອກປົກຄອງ ຂອງພວກຈັກກະພັດລ່າເມືອງຂຶ້ນແບບເກົ່າ ແລະ ຈັກກະພັດລ່າເມືອງຂຶ້ນແບບໃໝ່ ແລະ ລຶບລ້າງລະບອບສັກດີນາ ແລະ ນາຍທຶນ, ຫວນຄືນວັນເກີດຂອງປະທານ ໄກສອນ ພົມວິຫານ ຄົບຮອບ 104 ປີ, ສືບຕໍ່ເສີມຂະຫຍາຍມູນເຊື້ອດັ່ງກ່າວເຂົ້າໃນການພັດທະນາສ້າງສາປະເທດຊາດ.
ທ່ານ ອິນທະປັນຍາ ຂຽວວົງພະຈັນ ໄດ້ຍົກໃຫ້ເຫັນວ່າ: ວັນທີ 2 ທັນວາ 1975 ແມ່ນວັນທີ່ມີຄວາມໝາຍສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດລາວເຮົາ; ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ; ທັງເປັນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງສາປະເທດລາວສັນຕິພາບ, ເອກະ ລາດ, ປະຊາທິປະໄຕ, ເອກະພາບ, ວັດທະນາຖາວອນ.
ພາຍຫຼັງພັກກອມມູນິດອິນດູຈີນ ໄດ້ຮັບການສ້າງຕັ້ງຂຶ້ນ ໃນປີ 1930, ອິດທິພົນ ຂອງພັກກອມມູນິດອິນດູຈີນ ໄດ້ຂະຫຍາຍຕົວແຮງ ແລະ ກວ້າງຂວາງ ຢູ່ 3 ປະເທດອິນດູຈີນ, ມາເຖິງວັນທີ 22 ມີນາ 1955 ພັກປະຊາຊົນ ປະຕິວັດລາວ ກໍໄດ້ຮັບການສ້າງຕັ້ງຂຶ້ນໂດຍແມ່ນ ປະທານ ໄກສອນ ພົມວິຫານ ເປັນເລຂາທິການໃຫຍ່ ພາຍໃຕ້ການນໍາພາອັນສະຫຼາດສ່ອງໃສຂອງພັກ ຂະບວນການປະຕິວັດໄດ້ກ້າວຂຶ້ນສູ່ລະດັບໃໝ່, ໃນທີ່ສຸດກໍກ້າວໄປເຖິງໄຊຊະນະຢ່າງສົມບູນ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975.
ເລີ່ມແຕ່ປີ 1986 ເປັນຕົ້ນມາ, ພັກເຮົາໄດ້ນໍາພາປ່ຽນແປງຢ່າງຮອບດ້ານ ແລະ ມີຫຼັກການ ຂອງພັກ ສາມາດຍາດໄດ້ຜົນງານ ແລະ ໄຊຊະນະອັນໃຫຍ່ຫຼວງ ຄື: ດ້ານການເມືອງ, ການພັດທະນາເສດຖະກິດ ເຮັດໃຫ້ປະເທດເຮົາ ມີການຂະຫຍາຍຕົວຕໍ່ເນື່ອງ, ໝັ້ນທ່ຽງ, ອັດຕາການເຕີບໂຕຂອງເສດຖະກິດສະເລ່ຍເພີ່ມຂຶ້ນ ໃນແຕ່ລະໄລຍະ ອັນພົ້ນເດັ່ນແມ່ນການຈັດເກັບລາຍຮັບເຂົ້າງົບປະມານ ນັບຕັ້ງແຕ່ປີ 2021 ເປັນຕົ້ນມາ ແມ່ນໄດ້ເກີນແຜນການ 4 ປີຕິດຕໍ່ ກັນ, ໄປຄຽງຄູ່ກັນນັ້ນ ກໍໄດ້ເອົາໃຈໃສ່ຄຸ້ມຄອງລາຍຈ່າຍບົນຈິດໃຈປະຢັດ ເຮັດໃຫ້ການຂາດດຸນງົບປະມານມີທ່າອ່ຽງຫຼຸດລົງ, ວຽກງານກະສິກໍາ-ປ່າໄມ້: ສາມາດຜະລິດເຂົ້າກິນພຽງພໍ, ກຸ້ມກິນ, ມີສ່ວນແຮໄວ້ ແລະ ຂາຍເປັນສິນຄ້າສົ່ງອອກນັບມື້ເພີີ່ມຂຶ້ນໃນແຕ່ລະປີ, ວຽກງານອຸດສາຫະກໍາ-ການຄ້າ ແມ່ນໜຶ່ງໃນຂະແໜງການເສດຖະກິດທີ່ສໍາຄັນ ທີ່ພັກ-ລັດໄດ້ເອົາໃຈໃສ່ ນໍາພາ-ຊີ້ນໍາ ພັດທະນາຂົງເຂດນີ້ຢ່າງຕັ້ງໜ້າ, ດ້ານພະລັງງານ ແລະ ບໍ່ແຮ່ ໄດ້ສືບຕໍ່ເອົາໃຈໃສ່ພັດທະນາພະລັງງານຕາມທ່າແຮງບົ່ມຊ້ອນ, ວຽກງານຄົມມະນາຄົມຂົນສົ່ງ: ໄດ້ສືບຕໍ່ພັດທະນາຢ່າງຕັ້ງໜ້າ ແລະ ມີຈຸດສຸມທັງການຂົນສົ່ງທາງອາກາດ, ທາງບົກ ແລະ ທາງນ້ຳຕາມຍຸດທະສາດຫັນປ່ຽນຈາກປະເທດທີ່ບໍ່ມີຊາຍແດນຕິດກັບທະເລກາຍເປັນປະເທດເຊື່ອມຕໍ່ເຊື່ອມຈອດ ພິເສດ ແມ່ນພາຍຫຼັງເປີດນໍາໃຊ້ເສັ້ນທາງດ່ວນ ແລະ ເສັ້ນທາງລົດໄຟລາວ - ຈີນ ໄດ້ເຮັດໃຫ້ການຂົນສົ່ງຂະຫຍາຍຕົວດີ, ວຽກງານການແກ້ໄຂຄວາມທຸກຍາກ: ພັກເຮົາຖືການພັດທະນາຊົນນະບົດ ແລະ ແກ້ໄຂຄວາມທຸກຍາກ ເປັນວຽກສຳຄັນ ແລະ ເປັນບຸລິມະສິດໃນການພັດທະນາເສດຖະກິດ-ສັງຄົມ ຂອງປະເທດເຮົາໃນແຕ່ລະໄລຍະ, ດ້ານວັດທະນະທໍາ-ສັງຄົມ, ວຽກງານສຶກສາ, ວຽກງານສາທາລະນະສຸກ: ພັກຖືເອົາການກັນພະຍາດສົ່ງເສີມສຸຂະພາບເປັນຕົ້ນຕໍ ແລະ ຖືເອົາການປິ່ນປົວທີ່ມີຄຸນນະພາບ ແລະ ວຽກງານອື່ນ ກໍມີການຂະຫຍາຍຕົວໄປໃນທາງທີ່ດີ.
ໃນວັນດຽວກັນ, ທ່ານອິນທະປັນຍາ ຂຽວວົງພະຈັນ ໄດ້ສືບຕໍ່ຫວນຄືນວັນຄ້າຍວັນວັນເກີດ ປະທານ ໄກສອນ ພົມວິຫານ ຄົບຮອບ 104 ປີ (13 ທັນວາ 1920 – 13 ທັນວາ 2024).
(ຂ່າວ-ພາບ: ແສງຈັນ)
ຄໍາເຫັນ