ຂ່າວຕ່າງປະເທດລາຍງານ ໃນວັນທີ 4 ກຸມພາ ຜ່ານມາວ່າ: ອົງການ​ທ່ອງ​ທ່ຽວ​ຍີ່ປຸ່ນ​ຈະ​ເລີ່​ມດຳ​ເນີນ​ໂຄງການ​ຊ່ວຍເຫຼືອເທດສະບານເມືອງ ​ແລະ ທຸລະ​ກິດຕ່າງໆ ເພື່ອ​ດຶງ​ດູດdigital nomadຊຶ່ງ​ໝາຍ​ເຖິງ​ຜູ້​ທີ່​ນຳ​ໃຊ້​ເຕັກ​ໂນ​ໂລ​ຊີ​ດີ​ຈີ​ຕອນ​​ເຮັດ​ວຽກໄດ້​ຈາກ​ທຸກ​ບ່ອນ​ໃນ​ໂລກ​ໃນ​ປີງົບປະມານ2025.

ຫ້ອງການດັ່ງກ່າວ ຈະຈັດສັນເງິນອຸດໜູນຈໍານວນໜຶ່ງສໍາລັບຄ່າໃຊ້ຈ່າຍທີ່ກ່ຽວຂ້ອງກັບການສ້າງບ່ອນເຮັດວຽກ ແລະ ທີ່ພັກໃຫ້ເໝາະສົມກັບຄົນກຸ່ມນີ້. ໂດຍເງິນອຸດໜູນດັ່ງກ່າວຈະສະໜັບສະໜູນການພັດທະນາຫ້ອງການໃຊ້ຮ່ວມກັນ 24 ຊົ່ວໂມງ, ຮ້ານກາເຟແລະບາ ທີ່ສາມາດນັ່ງເຮັດວຽກໄດ້ ແລະທີ່ພັກອາໄສທີ່ສະດວກໃນການເຮັດວຽກ.

ຈຸດປະສົງຂອງໂຄງການແມ່ນເພື່ອສົ່ງເສີມການພັກເຊົາທີ່ຍາວນານແລະ ເພີ່ມການໃຊ້ຈ່າຍຈາກຄົນກຸ່ມນີ້ທີ່ເປັນຊາວຕ່າງປະເທດເມື່ອທຽບກັບນັກທ່ອງທ່ຽວແບບດັ່ງເດີມ.

ທັງນີ້, ຫ້ອງການດັ່ງກ່າວ​ໄດ້​ປະຕິບັດ​ໂຄງການ​ທົດ​ລອງ​ໃນ 5 ​ເຂດ​ ຂອງ​ປີ​ງົບປະມານ 2024 ​ເພື່ອ​ຄົ້ນຄວ້າ ​ສຳຫຼວດ ແລະ ຫາ​ວິທີ​ດຶງ​ດູດ​ຄົນ​ກຸ່ມ​ນີ້. ໂດຍຍີ່ປຸ່ນ​ຈະ​ກຳນົດ​ທິດ​ທາງ​ໃຫ້​ແກ່​ເຂດ​ອື່ນໆ ທີ່ສົນໃຈຈະດຳເນີນໂຄງການລັກສະນະດຽວກັນນີ້ດ້ວຍ.