ຂ່າວຕ່າງປະເທດລາຍງານ ໃນວັນທີ 6 ກຸມ ຜ່ານມາວ່າ: ຕຳຫຼວດລັດເພນຊິລເວເນຍ ຂອງສະຫະລັດ ອາເມຣິກາ ກຳລັງນຳຈັບຄົນຮ້າຍທີ່ບຸກເຂົ້າໄປລັກໄຂ່ໄກ່ປອດສານພິດ ຈຳນວນ 100,000 ໜ່ວຍ ​ໃນ​ທ້າຍ​ອາ​ທິດ​ຜ່ານ​ມາ ຊຶ່ງມີມູນຄ່າເສຍຫາຍເຖິງ 40 ຕື້ໂດລາ. ທ່າມກາງການຂາດແຄນໄຂ່ໄກ່ ແລະ ລາຄາໄຂ່ໄກ່ທີ່ເພີ່ມຂຶ້ນ.

ທ່ານນາງ ເມແກນ ເຟຣເຊີ ເຈົ້າໜ້າທີ່ຕຳຫຼວດລັດເພນຊິລວາເນຍ ທີ່ຮັບຜິດຊອບຄະດີເປີດເຜີຍຕໍ່ສື່ມວນຊົນວ່າ: ຕະຫຼອດ 12 ປີໃນການປະຕິບັດໜ້າທີ່ ບໍ່ເຄີຍພົບກໍລະນີລັກໄຂ່ໄກ່ມາກ່ອນແລະ ຄະດີທີ່ໃກ້ຄຽງທີ່ສຸດໄດ້ເກີດຂຶ້ນເມື່ອ 10 ປີທີ່ຜ່ານມາ ຄືເຫດການທີ່ມີຄົນລັກລົດພ່ວງທີ່ບັນທຸກໄກ່ເຕັມຄັນ.

ກະ​ຊວງ​ແຮງ​ງານສະຫະລັດ ​ອາ​ເມ​ລິ​ກາ​ກ່າວ​ວ່າ: ລາ​ຄາ​ໄຂ່​ໄກ່ພາຍ​ໃນ​ປະ​ເທດ​ໄດ້​ເພີ່ມ​ຂຶ້ນ​ຫຼາຍ​ກວ່າ 50%, ໂດຍສາເຫດສ່ວນ​ໃຫຍ່​ແມ່ນ​ຍ້ອນ​ການ​ລະ​ບາດ​ຂອງ​ໄຂ້​ຫວັດ​ສັດ​ປີກ. ເຮັດໃຫ້ຊາວກະສິກອນຕ້ອງກຳຈັດໄກ່ນັບລ້ານໂຕເພື່ອຄວບຄຸມການແຜ່ກະລະບາດ.

ກະ​ຊວງ​ກະ​ສິ​ກຳ​ ສະຫະລັດ ອາ​ເມ​ລິ​ກາ ລະບຸວ່າ: ນັບ​ແຕ່​ເດືອນ​ທັນ​ວາ ປີ 2024 ​ເປັນ​ຕົ້ນ​ມາ, ຈຳນວນ​ໄກ່​ທີ່​ຖືກ​ກຳຈັດ ​ມີ​ເຖິງ 13 ລ້ານ​ໂຕ.

ຂໍ້ມູນຈາກ NIQ ຊຶ່ງເປັນອົງການຄົ້ນຄວ້າຜູ້ບໍລິໂພກຂອງສະຫະລັດ ອາເມຣິກາ ລະບຸວ່າ: ລາຄາໄຂ່ໄກ່ໃນທ້າຍເດືອນມັງກອນ ຜ່ານມາ ແມ່ນສູງເຖິງ5.29 ໂດລາຕໍ່ໜຶ່ງໂຫຼ ເພີ່ມຂຶ້ນຈາກ3.50 ໂດລາຕໍ່ ໜຶ່ງໂຫຼ ເມື່ອ​ທຽບ​ໃສ່​ໄລຍະ​ດຽວ​ກັນ​ຂອງ​ປີ​ກາຍ.

ສື່​ມວນ​ຊົນ​ຫຼາຍ​ແຫ່ງ​ລາຍ​ງານ​ໃນ​ທິດ​ທາງ​ດຽວ​ກັນ​ວ່າ: ວິກິດການລາຄາໄຂ່ໃນສະຫະລັດ ອາເມຣິກາ ເຮັດໃຫ້ຊັ້ນວາງສິນຄ້າໃນຫ້າງສັບພະສິນຄ້າຫຼາຍແຫ່ງວ່າງເປົ່າ. ໃນຂະນະທີ່ຮ້ານອາຫານທີ່ມີຊື່ສຽງເຊັ່ນ: Waffle House ທີ່ມີສາຂາໃນທົ່ວປະເທດ ຈໍາເປັນຕ້ອງເພີ່ມລາຄາເມນູໄຂ່ ຈານລະ 50 ເຊັນຕໍ່ໄຂ່ໜຶ່ງ ໜ່ວຍ.