ກະຊວງແຜນການແລະ ການລົງທຶນໄດ້ຈັດກອງປະຊຸມ ປືກສາຫາລືວຽກງານຂະບວນການໂຕະມົນ ປະຈຳປີ 2025 ໃນວັນທີ 26 ກຸມພານີ້ ທີ່ໂຮງແຮມ ດັບເບີນທີ ບາຍຣີວຕັນນະຄອນຫຼວງວຽງຈັນ. ເປັນກຽດໃນກອງປະຊຸມ, ທ່ານ ນາງ ສີ​ສົມ​ບູນ ອຸ​ນາ​ວົງ ຫົວ​ໜ້າ​ກົມ​ຮ່ວມ​ມືສາ​ກົນກະຊວງແຜນການ ແລະ ການລົງທຶນ, ທ່ານ ນາງ Martine Therer (ມາຕິນ ເທເຣີ) ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈໍາ ສປປ ລາວ,ບັນດາທ່ານ ຜູ້​ຕາງ​ໜ້າ​ສະ​ຖານເອກອັກຄະລັດຖະທູດ ປະເທດເພື່ອນມິດ, ບັນດາທ່ານ ຜູ້ຕາງໜ້າອົງການຈັດຕັ້ງສາກົນ ແລະ ຄູ່ຮ່ວມພັດທະນາ, ບັນ​ດາ​ທ່ານຫົວ​ໜ້າ​ຫ້ອງ​ການ/ຮອງ​ຫົວ​ໜ້າ​ຫ້ອງ​ການ, ຫົວໜ້າກົມ/ຮອງຫົວໜ້າກົມ, ຫົວໜ້າສະຖາບັນ/ຮອງຫົວໜ້າສະຖາບັນ,ຜູ້ຕາງໜ້າຈາກກະຊວງຂະແໜງການທີ່ກ່ຽວຂ້ອງເຂົ້າຮ່ວມ.

ທ່ານ ນາງ ສີ​ສົມ​ບູນ ອຸ​ນາ​ວົງກ່າວວ່າ: ຂ້າພະເຈົ້າ ຮູ້ສຶກເປັນກຽດ ແລະພາກພູມໃຈ ໃນ​ນາມຫົວ​ໜ້າ​ກອງ​ເລ​ຂາ​ຂະ​ບວນ​ການ​ໂຕະ​ມົນ ລະ​ດັບ​ຊາດ ທີ່​ໄດ້​ຕາງໜ້າໃຫ້ແກ່ ກະຊວງແຜນການ ແລະການລົງທຶນ ​ເຂົ້າ​ຮ່ວມກອງປະຊຸມປຶກ​ສາ​ຫາ​ລື​ວຽກ​ງານ​ຂະ​ບວນ​ການ​ໂຕະ​ມົນ ປະ​ຈຳ​ປີ 2025,​ສະ​ແດງ​ຄວາມ​ຂອບ​ໃຈ​ມາ​ຍັງຜູ້ໃຫ້ທຶນ ກໍ​ຄື ລັດ​ຖະ​ບານ ປະເທດ ນິວຊີແລນ ທີ່ໄດ້ໃຫ້ການສະໜັບສະໜູນການ​ຈັດ​ຕັ້ງ​ປະ​ຕິ​ບັດ​ວຽກ​ງ​ານ​ຂະ​ບວນ​ການ​ໂຕະ​ມົນ ຂອງ​ລັດ​ຖະ​ບານ ສ​ປ​ປ ລາວ, ຂອບໃຈມາຍັງອົງການ ສະຫະປະຊາຊາດເພື່ອການພັດທະນາ ທີ່ໄດ້ຊ່ວຍລະດົມຂົນຂວາຍທຶນຮອນ ທັງ​ໃຫ້ການຊ່ວຍເຫຼືອທາງດ້ານເຕັກ​ນິກ, ວິຊາການ ໃຫ້ແກ່ການ​ຈັດ​ຕັ້ງ​ປະ​ຕິ​ບັດວຽກ​ງານ​ຂະ​ບວນ​ການ​ໂຕະ​ມົນ​ເປັນ​ຢ່າງ​ດີ.

ກອງ​ປະ​ຊມປືກສາຫາລືວຽກງານຂະບວນການໂຕະມົນ ປະຈຳປີ 2025 ແມ່ນເປັນ​ກອງ​ປະ​ຊຸມ​ ລິເລີ່ມ​​ໃນ​ການ​ກະ​ກຽມ​ກອງ​ປະ​ຊຸມ​ໂຕະ​ມົນ ລະ​ດັບ​ສູງ​ ຄັ້ງ​ທີ XIVຊຶ່ງ​ຈຸດ​ປະ​ສົງຂອງກອງ​ປະ​ຊຸມ ເພື່ອ​ນຳສະເໜີກອບໄລຍະເວລາໃນການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5ປີ ຄັ້ງທີ X (2026-2030)ແລະ ຮ່າງແນວຄວາມຄິດ ກອງປະຊຸມໂຕະມົນ ລະດັບສູງ ຄັ້ງ​ທີXIV ປະຈຳປີ 2025 ແລະ ລາຍງານຫຍໍ້ບົດລາຍງານຜົນການເຂົ້າຮ່ວມການຕິດຕາມປະສິດທິຜົນ ການຮ່ວມມືເພືື່ອການພັດທະນາ ໃນລະດັບສາກົນ ຄັ້ງທີ IV ຂອງ ສປປ ລາວ. ໃນ​ກອງ​ປະ​ຊຸມ​ ຈະ​ໄດ້​ພ້ອມ​ກັນ​ປືກ​ສາ​ຫາ​ລືວຽກ​ງານ​ຂະ​ບວນ​ການ​ໂຕະ​ມົນ ໂດຍ​ສະ​ເພາະ​ແມ່ນ​ຮ່າງ​ແນວ​ຄວາມ​ຄິດ ກອງ​ປະ​ຊຸມ​ໂຕະ​ມົນ​ສະ​ດັບ​ສູງ ຄັ້ງທີ XIV ປະ​ຈຳ​ປີ 2025 ແລະ ກອບ​ໄລ​ຍະ​ເວ​ລາການສ້າງແຜນພັດທະນາເສດຖະກິດ-ສັງຄົມ ແຫ່ງຊາດ 5ປີ ຄັ້ງທີ X (2026-2030) ທີ່​ມີ​ສ່ວນ​ຮ່ວມ​​ຢ່າງ​ຕັ້ງ​ໜ້າຂອງ 10 ໜ່ວຍ​ງານ​ຂະ​ແໜງ​ການ.

(ຂ່າວ-ພາບ: ແສງຈັນ)