ໂດຍເປັນກຽດເຂົ້າຮ່ວມຂອງທ່ານ ມອນໄຊ ລາວມົວຊົ່ງ ເລຂາ ຄຊປປລ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ມີການນຳຈາກກະຊວງ-ອົງການ ແລະ ນັກກິລາເຂົ້າຮ່ວມ.
ທ່ານ ທອງລີ ສີສຸລິດຮອງເລຂາຄຊປປລ ໄດ້ກ່າວວ່າ: ຈຸດປະສົງເພື່ອເປັນການສ້າງຂະບວນການຂໍ່ານັບຮັບຕ້ອນ 3 ວັນປະຫວັດສາດຂອງຊາດຂອງພັກຄື: ວັນສ້າງຕັ້ງພັກຄົບຮອບ 70 ປີ, ວັນຊາດທີ 2 ທັນວາ ຄົບຮອບ 50 ປີ, ວັນເກີດປະທານ ໄກສອນ ພົມວິຫານ ຄົບຮອບ 105 ປີ ແລະ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວຄົບຮອບ 70 ປີ, ພ້ອມທັງຂ່ໍານັບຮັບຕ້ອນກອງປະຊຸມໃຫຍ່ຄັ້ງທີ XII ຂອງພັກ ແລະ ກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ IX ແລະ ກະກຽມການຈັດຕັ້ງປະຕິບັດແຜນພັດທະນາເສດຖະກິດ- ສັງຄົມແຫ່ງຊາດຄັ້ງທີ X.
ກິດຈະກໍາແຂ່ງຂັນກິລາເຕະບານມິດຕະພາບໃນຄັ້ງນີ້ ເປັນການຮ່ວມມືຈາກຫຼາຍພາກສ່ວນ ຊຶ່ງຈັດຂຶ້ນໂດຍສູນກາງຊາວໜຸ່ມປະຊາຊົນປະຕິວັດລາວ, ກະຊວງສຶກສາທິການ ແລະ ກິລາ, ບໍລິສັດຮຸ່ງອາລຸນການຄ້າ ເອເລັກໂຕຣນິກ, ສູນກິລາຄົບວົງຈອນລ້ານຊ້າງ ແລະ ບໍລິສັດຜະລິດຊຸດກິລາ ອີໂວ ແລະ ໄດ້ເຊື້ອເຊີນເອົາຄະນະຊາວໜຸ່ມຈາກບັນດາກະຊວງ, ອົງການ, ແຂວງ, ນະຄອນຫຼວງ, ສະມາຄົມນັກທຸລະກິດໜຸ່ມແຫ່ງຊາດ, ບັນດາຫ້າງຮ້ານ, ບໍລິສັດພາກສ່ວນອຸປະຖໍາທີ່ໃຫ້ການສະໜັບສະໜູນງານເຂົ້າຮ່ວມຫຼາຍກວ່າ 50 ພາກສ່ວນ, ມີຈໍານວນຄົນເຂົ້າຮ່ວມທັງໝົດ 2,000 ກວ່າຄົນ.
ການແຂ່ງຂັນກິລາເຕະບານ11 ຄົນຄັ້ງນີ້ ແມ່ນເປັນການສ້າງຂະບວນການທີ່ມີຄວາມໝາຍຄວາມສໍາຄັນເພື່ອສ້າງເງື່ອນໄຂໃຫ້ຄະນະຊາວໜຸ່ມ, ສະມາຊິກຊາວໜຸ່ມ ແຕ່ລະພາກສ່ວນ ໄດ້ຮັດແໜ້ນຄວາມສາມັກຄີມິດຕະພາບ, ມີໂອກາດໄດ້ສະແດງຄວາມສາມາດຂອງຕົນທາງດ້ານກິລາເຕະບານແລະ ທັງເປັນການອອກກໍາລັງກາຍເພື່ອຮັກສາສຸຂະພາບເຮັດໃຫ້ມີຮ່າງກາຍແຂງແຮງ ແລະ ຈິດໃຈທີ່ເຂັ້ມແຂງ ເພື່ອກຽມພ້ອມເຂົ້າໃນການປະຕິບັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດອັນແສນຮັກ ຂອງພວກເຮົາ. ການແຂ່ງຂັນບໍ່ພຽງແຕ່ເປັນການສະແດງຄວາມສາມາດດ້ານກິລາເທົ່ານັ້ນ, ແຕ່ຍັງເປັນການສະແດງເຖິງຄວາມມຸ່ງໝັ້ນ, ຄວາມອົດທົນແລະ ຈິດໃຈແຫ່ງການແຂ່ງຂັນຂອງຊາວໜຸ່ມເທົ່ານັ້ນ, ແຕ່ມັນເປັນເຄື່ອງມືອັນຊົງພະລັງໃນການສ້າງມິດຕະພາບ, ພັດທະນາທັກສະການເຮັດວຽກເປັນທີມແລະ ສົ່ງເສີມຄວາມສາມັກຄີ ທັງຈະໄດ້ຮັບປະສົບການອັນມີຄ່າຈາກການແຂ່ງຂັນຄັ້ງນີ້, ບໍ່ວ່າຈະເປັນຜູ້ຊະນະຫຼືບໍ່ຊະນະກໍຕາມ.
ເຂົ້າຮ່ວມໃນການແຂ່ງຂັນຄັ້ງນີ້ມີທັງໝົດ 23 ທີມ. ສໍາລັບຂອງຂວັນລາງວັນ, ລາງວັນທີໄດ້ຮັບ1 ຂັນ1 ໜ່ວຍມູນຄ່າ 15,000,000 ກີບ ພ້ອມເງິນສົດ 20,000,000 ກີບ, ລາງວັນທີ 2 ເງິນສົດ 15,000,000 ກີບ, ລາງວັນທີ 3 ເງິນສົດ 10,000,000 ກີບ ລາງວັນທີ 4 ເງິນສົດ 5,000,000 ກີບແລະລາງວັນອື່ນອີກຈຳນວນໜຶ່ງ.
ຂ່າວ-ພາບ: ບຸນອູ້ມ
ຄໍາເຫັນ