ພິທີຊາປະນະກິດສົບລະດັບຊາດຂອງ ສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກປະຊາຊົນປະຕິວັດລາວ ອະດີດປະທານປະເທດ ແຫ່ງ ສປປ ລາວ ໄດ້ຈັດຂຶ້ນຢ່າງສົມກຽດໃນວັນທີ 7 ເມສານີ້ ທີ່ເດີ່ນພະທາດຫຼວງ ນະຄອນຫຼວງວຽງຈັນ
ໂດຍມີ ພະເຖລາ - ນຸເຖລະ, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ, ບັນດາການນໍາຂັ້ນສູງ ແລະ ອະດີດການນໍາຂັ້ນສູງ ຂອງ ພັກ-ລັດ, ຄອບຄົວ ແລະ ຍາດພີ່ນ້ອງ ຂອງ ສະຫາຍ ພົນເອກ ຄໍາໄຕ ສີພັນດອນ; ພ້ອມນີ້, ກໍມີ ສະຫາຍ ຟ້າມ ມິງ ຈິງ ກຳມະການກົມການເມືອງສູນກາງພັກກອມມູນິດຫວຽດນາມ ນາຍົກລັດຖະມົນຕີ ແຫ່ງ ສສ ຫວຽດນາມ, ທ່ານ ສຸຣິຍະ ຈິ່ງຣຸ່ງເຣືອງກິດ ຮອງນາຍົກລັດຖະມົນຕີ ແຫ່ງ ຣາຊະອານາຈັກໄທ; ມີບັນດາທູຕານຸທູດ, ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ແລະ ມີບັນດາມວນຊົນ ປະຊາຊົນລາວເຮົາ ເຂົ້າຮ່ວມຢ່າງຫຼວງຫຼາຍ.
ໃນເວລາ 12 ໂມງ 5 ນາທີ, ຂະບວນລົດເຄື່ອນສົບ ສະຫາຍ ພົນເອກ ຄຳໄຕ ສີພັນດອນ ເລີ່ມເຄື່ອນອອກຈາກ ຫໍປະຊຸມແຫ່ງຊາດ ໄປຍັງສະຖານທີ່ຈັດພິທີ ທີ່ເດີ່ນພະທາດຫຼວງ ຊຶ່ງດຳເນີນຕາມພິທີທີ່ຄະນະຮັບຜິດຊອບພິທີຊາປະນະກິດສົບລະດັບຊາດ ໄດ້ປຶກສາຫາລື ແລະ ຕົກລົງເປັນເອກະພາບກັນ. ສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໃນນາມຄະນະຈັດຕັ້ງພິທີ ໄດ້ກ່າວຈຸດປະສົງຂອງພິທີດັ່ງກ່າວ.
ໃນນາມປະທານ ຄະນະຮັບຜິດຊອບພິທີ ຊາປະນະກິດສົບລະດັບຊາດ, ສະຫາຍ ທອງລຸນ ສີສຸລິດ ໄດ້ກ່າວສະດຸດີ ໂດຍໄດ້ກ່າວຫວນຄືນປະຫວັດການເຄື່ອນໄຫວ ແລະ ຄຸນສົມບັດສິນທຳປະຕິວັດ ອັນໂດດເດັ່ນ ແລະ ໜັກແໜ້ນຂອງ ຂອງ ສະຫາຍ ພົນເອກ ຄໍາໄຕ ສີພັນດອນ ໂດຍເນັ້ນໜັກວ່າ: ເປັນບົດຮຽນ ອັນລໍ້າຄ່າ ໃຫ້ຄົນຮຸ່ນນີ້ ແລະ ຮຸ່ນຕໍ່ໆໄປ ຂອງພັກ ແລະ ຂອງຊາດເຮົາ.
ຈາກນັ້ນ, ບັນດາສະຫາຍ ແລະ ທ່ານທີ່ເຂົ້າຮ່ວມ ກໍໄດ້ລຸກຂຶ້ນກົ້ມຫົວໄວ້ອາໄລ ຕໍ່ການຈາກໄປຂອງ ສະຫາຍ ພົນເອກ ຄໍາໄຕ ສີພັນດອນ.
ສະຫາຍ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ ແລະ ສະຫາຍ ວຽງສະຫວັດ ສີພັນດອນ ກຳມະການສູນກາງພັກ ເຈົ້າແຂວງຫຼວງນໍ້າທາ ໄດ້ຕາງໜ້າຄອບຄົວສີພັນດອນ ກ່າວຄຳຂອບໃຈ ຕໍ່ຜູ້ນຳພັກ-ລັດ ແລະ ທຸກພາກສ່ວນກ່ຽວຂ້ອງ ທີ່ໄດ້ແບ່ງເບົາຄວາມທຸກໂສກ, ໃຫ້ຄວາມອົບອຸ່ນ ແລະ ໄດ້ປະກອບສ່ວນຕ່າງໆ ພ້ອມທັງໃຫ້ກຳລັງໃຈແກ່ຄອບຄົວສີພັນດອນ ເຮັດໃຫ້ການຫ້າງຫາກະກຽມ ແລະ ຈັດຕັ້ງພິທີຊາປະນະກິດສົບລະດັບຊາດຂອງ ສະຫາຍ ພົນເອກ ຄຳໄຕ ສີພັນດອນ ໄດ້ດຳເນີນໄປຢ່າງສົມກຽດ ແລະ ລຸລ່ວງໄປດ້ວຍດີ.
ພາຍຫຼັງສຳເລັດພິທີທາງການ, ຕໍ່ດ້ວຍພິທີທາງສາສະໜາ ຊຶ່ງມີການສູດບັງສະກຸນ, ໃຫ້ພອນ, ຢາດນໍ້າ ແລະ ວາງຜ້າບັງສະກຸນ; ຈາກນັ້ນ, ໄດ້ມີການວາງດອກໄມ້-ທູບທຽນ ເພື່ອເປັນການອຳລາ ສະຫາຍ ພົນເອກ ຄຳໄຕ ສີພັນດອນ ເປັນຄັ້ງສຸດທ້າຍ ແລະ ກໍໄດ້ມີການວາງເພີງເຢັນ, ແລ້ວກໍປະຕິບັດຕາມພິທີຕ່າງໆ.
(ຂ່າວ: ສຸກສະຫວັນ-ສຳນານ, ພາບ: ວັນເພັງ-ບຸນອູ້ມ-ຍຸພິນທອງ)
ຄໍາເຫັນ