ອະດີດທະຫານອາສາສະໝັກ ແລະ ຊ່ຽວຊານຫວຽດນາມ ເຄື່ອນໄຫວເຮັດວຽກ ຢູ່ແຂວງຄຳມ່ວນ

ໃນການຢ້ຽມຢາມ ແຂວງຄໍາມ່ວນຂອງອະດີດທະຫານອາສາສະໝັກ ແລະ ຊ່ຽວຊານຫວຽດນາມ ເທື່ອນີ້, ໄດ້ມີການພົບປະແຈ້ງສະພາບໂດຍຫຍໍ້ລະຫວ່າງທັງສອງຝ່າຍ, ສະຫາຍ ພົນຈັດຕະວາ ສົມແຄນ ອັບປະສອນ ໄດ້ກ່າວຕ້ອນຮັບ ແລະ ຕີລາຄາສູງ ຕໍ່ການມາເຄື່ອນໄຫວຢ້ຽມຢາມຄັ້ງນິ້, ຊຶ່ງເປັນການເສີມສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ-ຫວຽດນາມ ໃຫ້ນັບມື້ພັດທະນາ ເຂົ້າສູ່ລວງເລິກ ເວົ້າລວມ, ເວົ້າສະເພາະ ການຮ່ວມມື ລະຫວ່າງ ອະດີດທະຫານອາສາສະໝັກ ແລະ ຊ່ຽວຊານຫວຽດນາມຊ່ວຍເຫຼືອລາວ ກັບ ສະຫະພັນນັກຮົບເກົ່າແຂວງ ຄໍາມ່ວນ ໃຫ້ມີຄວາມແໜ້ນແຟ້ນຍິ່ງໆຂຶ້ນ. “ພວກເຮົາຍັງຈົດຈໍາໄດ້ດີເຖິງເຫດການໃນເມື່ອກ່ອນ, ພວກສະຫາຍໄດ້ເດີນທາງມາຈາກແຜ່ນດິນຫວຽດນາມອັນແສນຮັກ, ຂ້າມພູຜາປ່າດົງ, ຍ່າງຕາມເສັ້ນທາງທີ່ແສນລໍາບາກ, ບໍ່ຫວັ່ນໄຫວຕໍ່ລູກປືນ-ລະເບີດທີ່ໂຫດຮ້າຍຂອງສັດຕູ. ການຕໍ່ສູ້ຂອງພວກສະຫາຍໄດ້ເຮັດໃຫ້ດິນແດນແຫ່ງນີ້ມີຄວາມສະຫງົບສຸກ ແລະ ເປັນເອກະລາດ. ພວກສະຫາຍໄດ້ນອນຮ່ວມໝອນ, ກິນຮ່ວມຈານ ແລະ ຕໍ່ສູ້ຢູ່ຄຽງຂ້າງກັບປະຊາຊົນລາວ, ສ້າງສາຍພົວພັນອັນເລິກເຊິ່ງຈົນເຖິງຂັ້ນທີ່ປະຊາຊົນລາວເອີ້ນພວກສະຫາຍວ່າ “ ນັກຮົບອ້າຍນ້ອງ” ແລະ ເປັນຄືກັບຄົນໃນຄອບຄົວ’’.

ອີກເທື່ອໜຶ່ງພວກສະຫາຍໄດ້ນໍາເອົາຈິດໃຈແຫ່ງການເສຍສະຫຼະອັນສູງສົ່ງຂອງປະທານ ໂຮ່ຈີມິນ ແລະ ໄດ້ຮ່ວມກັບການນໍາຂອງລາວຄື ປະທານ ໄກສອນ ພົມວິຫານ ແລະ ປະທານ ສຸພານຸວົງ ເພື່ອສູ້ຊົນເອົາໄຊຊະນະມາໃຫ້ຊາດລາວ. ການເສຍສະຫຼະເລືອດເນື້ອຂອງບັນດາສະຫາຍເພື່ອປົກປ້ອງຜືນແຜ່ນດິນລາວ, ເພື່ອຄວາມເປັນເອກະລາດ, ເສລີພາບ ແລະ ຄວາມຢູ່ລອດຂອງສອງຊາດ ລາວ-ຫວຽດນາມ ແມ່ນຄຸນງາມຄວາມດີທີ່ບໍ່ມີສິ່ງໃດມາທຽບໄດ້. ພວກເຮົາຈະບໍ່ມີວັນລືມ.

ໂອກາດນີ້, ສະຫາຍ ຫງວຽນ ຕຽນດົງ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບ ອັນອົບອຸ່ນ ຈາກການນຳແຂວງ, ສະຫະພັນນັກຮົບຮົບເກົ່າແຂວງ ແລະ ໄດ້ແຈ້ງຈຸດປະສົງ ຂອງການມາເຄື່ອນໄຫວຢ້ຽມຢາມ ແຂວງຄໍາມ່ວນ ໃນຄັ້ງນີ້, ບໍ່ແມ່ນພຽງແຕ່ການເດີນທາງມາຢ້ຽມຢາມທໍາມະດາ, ແຕ່ເປັນການຫວນຄືນກັບມາບ້ານຫຼັງທີ່ສອງທີ່ເຄີຍຢູ່ອາໄສ ແລະ ເປັນການເດີນທາງທີ່ເຕັມໄປດ້ວຍຄວາມໝາຍ,ຄວາມສຳຄັນທາງປະຫວັດສາດ, ເປັນການເດີນທາງທີ່ເຕັມໄປດ້ວຍຄວາມຮູ້ສຶກເລິກເຊິ່ງ, ເຕັມໄປດ້ວຍຄວາມຜູກພັນ ທີ່ຜູກມັດສອງຊາດພວກເຮົາໄວ້. ມັນເປັນການຢັ້ງຢັນຄືນໃໝ່ເຖິງມູນເຊື້ອແຫ່ງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ-ຫວຽດນາມ ທີ່ບໍ່ມີວັນເສື່ອມຄາຍ ແລະ ຕະຫຼອດໄປ. ພວກເຮົາໄດ້ກັບຄືນສູ່ຜືນແຜ່ນດິນທີ່ເຄີຍເປັນສະ ໜາມຮົບ, ຜືນແຜ່ນດິນທີ່ເຄີຍເຕັມໄປດ້ວຍເລືອດເນື້ອ ແລະ ຄາບນໍ້າຕາແຫ່ງການຕໍ່ສູ້. ມື້ນີ້ຜືນແຜ່ນດິນດັ່ງກ່າວໄດ້ກາຍເປັນດິນແດນແຫ່ງສັນຕິພາບ, ຄວາມສະຫງົບສຸກ ແລະ ການພັດທະນາ, ຊຶ່ງທັງໝົດນີ້ແມ່ນໄດ້ມາຈາກການເສຍສະຫຼະອັນສູງສົ່ງຂອງສອງຊາດອ້າຍນ້ອງເຮົາ.

(ແຫຼ່ງຂ່າວ: ແຂວງຄໍາມ່ວນ)