ອັດຕະປື ແລະ ມະຫາວິທະຍາໄລຟາມວັນດິ່ງ ຮ່ວມມືພັດທະນາຊັບພະຍາກອນມະນຸດ

ກອງປະຊຸມພົບປະແລກປ່ຽນບົດຮຽນດ້ານການຮ່ວມມືໃນການກໍ່ສ້າງແລະພັດທະນາຊັບພະຍາກອນມະນຸດ ລະຫວ່າງພະແນກສຶກສາທິການ ແລະ ກິລາແຂວງອັດຕະປືແຫ່ງ ສປປ ລາວ ແລະ ໂຮງຮຽນມະຫາວິທະຍາໄລຟາມວັນດິ່ງ ແຂວງກວາງຫງາຍສສ ຫວຽດນາມ ໄດ້ຈັດຂຶ້ນເມື່ອບໍ່ດົນມານີ້ ທີ່ພະແນກສຶກສາທິການແລະກິລາແຂວງອັດຕະປື, ຝ່າຍລາວນຳໂດຍສະຫາຍ ອຸດົມສິນ ສີຊານົນ ຫົວໜ້າພະແນກສຶກສາທິການ ແລະກິລາແຂວງ, ຝ່າຍມະຫາວິທະຍາໄລຟາມວັນດິ່ງນຳໂດຍທ່ານ ເຈີ່ມ ດີິ່ງ ຖາມ ອະທິການບໍດີມະຫາວິທະຍາໄລ ຟາມວັນດິ່ງ ພ້ອມດ້ວຍຄະນະນໍາສອງຝ່າຍເຂົ້າຮ່ວມ.
    ກອງປະຊຸມຄັ້ງນີ້ໄດ້ປຶກສາຫາລືແລກປ່ຽນບົດຮຽນ ທົບທວນຜົນການຮ່ວມມືໃນໄລຍະຜ່ານມາ ຊຶ່ງທັງສອງຝ່າຍໄດ້ມີການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນຕະຫຼອດມາ. ໃນຕໍ່ໜ້າສອງຝ່າຍເຫັນດີເປັນເອກະພາບກັນທີ່ຈະສືບຕໍ່ເພີ່ມທະວີການພົວພັນຮ່ວມມືແລກປ່ຽນບົດຮຽນ ໂດຍສະເພາະວຽກງານການຮ່ວມມືໃນການກໍ່ສ້າງ ແລະ ພັດທະນາຊັບພະຍາກອນມະນຸດດ້ານການສຶກສາກໍ່ສ້າງວິຊາສະເພາະໃຫ້ແກ່ນັກຮຽນນັກສຶກສາຂອງແຂວງອັດຕະປື, ສອງຝ່າຍຈະໄດ້ສືບຕໍ່ເສີມຂະຫຍາຍສາຍພົວພັນການຮ່ວມມື,ມິດຕະພາບຄວາມສາມັກຄີພິເສດລະຫວ່າງສອງຊາດລາວ-ຫວຽດນາມ, ຫວຽດນາມ-ລາວກໍຄື ພະແນກສຶກສາທິການແລະກິລາແຂວງອັດຕະປື ແລະ ມະຫາວິທະຍາໄລຟາມວັນດິ່ງ ແຂວງກວາງຫງາຍ ສສຫວຽດນາມໃຫ້ໝັ້ນຄົງຂະໜົງແກ່ນຕະຫຼອດໄປ.
    ໃນພິທີສອງຝ່າຍໄດ້ລົງນາມເຊັນບົດບັນທຶກຮ່ວມກັນ ຊຶ່ງເນື້ອໃນບົດບັນທຶກສອງຝ່າຍໄດ້ເຫັນດີເປັນ
ເອກະພາບປະຕິບັດການຮ່ວມມືແລກປ່ຽນວັດທະນະທຳ, ສົ່ງເສີມບັນດາເນື້ອໃນການຮ່ວມມືດ້ານການສຶກສາ-ກໍ່ສ້າງ ແລະ ແລກປ່ຽນຄະນະຜູ້ແທນມາຢ້ຽມຢາມຊຶ່ງກັນ ແລະ ກັນ, ສອງຝ່າຍພ້ອມກັນສົມທົບຈັດຕັ້ງປະຕິບັດບັນດາເນື້ອໃນການກໍ່ສ້າງ ແລະ ບຳລຸງຊັບພະຍາກອນມະນຸດ ທີ່ໄດ້ລົງນາມໃນສັນຍາຮ່ວມມືລະຫວ່າງແຂວງກວາງຫງາຍ ກັບແຂວງອັດຕະປື, ຮ່ວມມືໃນການຮັບນັກຮຽນ, ນັກສຶກສາລາວໄປຮຽນພາສາຫວຽດນາມ ແລະ ຮຽນຢູ່ມະຫາວິທະຍາໄລຟາມວັນດິ່ງດ້ວຍທຶນດ້ວຍຕົນເອງ, ໃນນີ້ພະແນກສຶກສາທິການ ແລະ ກິລາແຂວງ ແລະພະແນກການຕ່າງປະເທດແຂວງອັດຕະປື ຮັບຜິດຊອບເປັນຈຸດໃຈກາງໃນການຮັບນັກຮຽນ, ນັກສຶກສາຈາກແຂວງອັດຕະປື ແລະ ແນະນຳໃຫ້ມາຮຽນພາສາຫວຽດນາມ ແລະ ຮຽນຕໍ່ທີ່ມະຫາວິທະຍາໄລຟາມວັນດິ່ງ.
ຂ່າວ: ວັດທະນາ, ພາບ: ພົມວິຫານ ໄຊຊະນະ