ອັດຕະປື-ກອນຕູມ ແລກປ່ຽນບົດຮຽນດ້ານວຽກງານຍຸຕິທຳ

ທ່ານ ເຈິນ ມິ່ງ ຖັ໋ງ ໄດ້ກ່າວຕ້ອນຮັບ ພ້ອມທັງລາຍງານສະພາບຈຸດພິເສດ ຂອງແຂວງກອນຕູມ ແລະ ການເຄື່ອນໄຫວປະຕິບັດໜ້າທີ່ວຽກງານຜ່ານມາຂອງຕົນ. ຈາກນັ້ນ, ທ່ານ ຄໍາຫຼ້າ ແກ້ວວັນສອນ ໄດ້ກ່າວຍ້ອງຍໍຊົມເຊີຍຕໍ່ພະແນກຍຸຕິທຳແຂວງກອນຕູມ ທີ່ໄດ້ຕອນຮັບຢ່າງອົບອຸ່ນ ແລະ ໄດ້ມີຄຳເຫັນລາຍງານສະພາບຫານເຄື່ອນໄຫວວຽກງານຍຸຕິທຳຂອງຕົນໃນໄລຍະຜ່ານມາ.

ການພົບປະ ຢ້ຽມຢາມຄັ້ງນີ້, ສອງຝ່າຍໄດ້ມີການແລກປ່ຽນບົດຮຽນກ່ຽວກັບການເຄື່ອນໄຫວວຽກງານຍຸຕິທຳເຊັ່ນ: ການປຶກສາຫາລຶ ແລະ ເອກະພາບ ສືບຕໍ່ກະກຽມເຊັນບົດບັນທຶກຊ່ວຍຈຳ, ເພີ່ມທະວີການຮ່ວມມືລະຫວ່າງ ພະແນກຍຸຕິທຳແຂວງອັດຕະປື ແລະ ພະແນກຍຸຕິທຳ ແຂວງກອນຕູມ 2026-2030; ວຽກງານໂຄສະນາເຜີຍແຜ່ກົດໝາຍ ລຽບຕາມຊາຍແດນເພື່ອໃຫ້ປະຊາຊົນສອງຊາດ ມີສະຕິເຄົາລົບ ແລະ ປະຕິບັດກົດໝາຍເຊັ່ນ: ການຕັ້ງພູມລຳເນົາລຽບຕາມຊາຍແດນ, ການເອົາເດັກມາເປັນລູກລ້ຽງ ລະຫວ່າງພົນລະເມືອງລາວ ແລະ ພົນລະເມືອງຫວຽດນາມ, ການແຕ່ງດອງ ຂອງພົນລະເມືອງລາວ ກັບພົນລະເມືອງຫວຽດນາມທີ່ເຫັນວ່າບໍ່ຖືກຕ້ອງ; ແລກປ່ຽນປະສົບການຄວາມອາດສາມາດໃນວຽກງານເອກະສານທາງດ້ານກົດໝາຍ ແລະ ການຈັດຕັ້ງປະຕິບັດກົດໝາຍ; ແລກປ່ຽນຂໍ້ມູນຂ່າວສານກ່ຽວກັບສະພາບການພັດທະນາເດຖະກິດ-ສັງຄົມຂອງສອງທ້ອງຖິ່ນ. ທັງນີ້ ກໍເພື່ອເພີ່ມທະວີພັດທະນາສາຍພົວພັນມິດຕະພາບ ແລະ ການຮ່ວມມື ລະຫວ່າງ ແຂວງ ອັດຕະປື ກັບ ແຂວງ ກອນຕູມ ມີການຮ່ວມມືດ້ານວຽກງານຍຸຕິທຳ ນັບມື້ໄດ້ຮັບຜົນດີ, ພັດທະນາຍືນຍົງ, ສືບຕໍ່ເພີ່ມທະວີສາຍພົວພັນມິດຕະພາບຄວາມສາມັກຄີແບບພິເສດ, ການພົວພັນທີ່ເປັນມູນເຊື້ອ ຂອງສອງ ແຂວງ, ອັດຕະປື - ກອນຕູມ ໃຫ້ສູງຂຶ້ນກວ່າເກົ່າ.

(ແຫຼ່ງຂ່າວ: ຂະແໜງກົດໝາຍ ແລະ ໂຄສະນາເຜີຍແຜ່ກົດໝາຍ ແຂວງອັດຕະປື)