ບໍລິສັດ ທາງລົດໄຟລາວ-ຈີນ ແຂ່ງຂັນບົດຮຽນຈຸລະພາກ ແລະ ການບັນຍາຍຂອງຄູ

ເມື່ອບໍ່ດົນມານີ້ ບໍລິສັດທາງລົດໄຟລາວ-ຈີນ ໄດ້ຈັດການແຂ່ງຂັນບົດຮຽນຈຸລະພາກ ແລະ ການບັນຍາຍຂອງຄູສອນໃຫ້ແກ່ພະນັກງານລາວແຕ່ລະຂະແໜງການຂຶ້ນ ເພື່ອເປັນການຝຶກຝົນ ແລະ ສົ່ງເສີມໃຫ້ພະນັກງານໄດ້ສະແດງອອກເຖິງສັກກະຍະພາບ ແລະ ຄວາມສາມາດ, ແນວຄວາມຄິດ, ການແບ່ງປັນ ແລະ ແລກປ່ຽນຄວາມຮູ້ຊຶ່ງກັນ ແລະ ກັນ ເພື່ອສາມາດນຳໃຊ້ເປັນບົດຮຽນໃນການສອນພະນັກງານຮຸ່ນຕໍ່ໆໄປ, ເປັນການປະກອບສ່ວນຈາກບໍລິສັດທາງລົດໄຟລາວ-ຈີນ ໃນການຝຶກອົບຮົມພະນັກງານລາວໃຫ້ມີຄວາມພັດທະນາໄປອີກຂັ້ນ.
   ການແຂ່ງຂັນໄດ້ດຳເນີນໄປຢ່າງລາບລື່ນ, ພາຍໃຕ້ຫຼັກສູດທີ່ອຸດົມສົມບູນ ແລະ ກວ້າງຂວາງ. ພະນັກງານທຸກຄົນຕ່າງກໍມີຄວາມກະຕືລືລົ້ນ ແລະ ເອົາໃຈໃສ່ໃນການແຂ່ງຂັນເປັນຢ່າງດີ,  ເມື່ອການແຂ່ງຂັນສິ້ນສຸດລົງກໍໄດ້ມີການຮັບຟັງຄຳຄິດເຫັນ ແລະ ທິດຊີ້ນຳທີ່ມີປະໂຫຍດຈາກບັນດາຄະນະນຳບໍລິສັດທາງລົດໄຟລາວ-ຈີນ ເພື່ອນຳໄປຝຶກຝົນ, ປັບປຸງແກ້ໄຂ ແລະ ນຳໃຊ້ເຂົ້າໃນວຽກງານຕົວຈິງຂອງຕົນເອງໃຫ້ເກີດປະໂຫຍດ. ພ້ອມກັນນັ້ນ ກໍໄດ້ມີການຄັດເລືອກ ແລະ ມອບລາງວັນໃຫ້ແກ່ພະນັກງານທີ່ເຂົ້າຮ່ວມການແຂ່ງຂັນ 1, 2, 3 ຕາມລຳດັບ ເພື່ອເປັນລາງວັນໃຫ້ແກ່ຄວາມຕັ້ງໃຈ ແລະ ເປັນກຳລັງໃຈໃຫ້ພະນັກງານລາວທຸກຄົນສືບຕໍ່ຝຶກຝົນຫຼໍ່ຫຼອມຕົນເອງ ເພື່ອປະກອບສ່ວນໃນການປະຕິບັດໜ້າທີ່ຂອງຕົນໃຫ້ດີ ກໍຄືປະກອບສ່ວນໃນພັດທະນາປະເທດຊາດ. 
(ຂ່າວ-ພາບ: ທາງລົດໄຟລາວ-ຈີນ)