ບໍລິສັດໄຊນາຢູນີຄອມເປີດຫ້ອງການຜູ້ຕາງໜ້າປະຈຳ ສປປລາວ

ບໍລິສັດ ໄຊນາ ຢູນິຄອມສາກົນ ຈໍາກັດ (China Unicom)ໄດ້ຈັດງານຂອບໃຈຄູ່ຮ່ວມມື, ພ້ອມທັງເປີດຫ້ອງການຜູ້ຕາງໜ້າບໍລິສັດປະຈຳສປປລາວຂຶ້ນຢ່າງເປັນທາງການໃນວັນທີ 28 ມັງກອນຜ່ານມາ ທີ່ໂຮງແຮມແລນມາກ ນະຄອນຫຼວງວຽງຈັນ,ໂດຍມີທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ທ່ານ ຈ້າວ ເວີຍຢຸຍ ທີ່ປືກສາດ້ານເສດຖະກິດ ແລະ ການຄ້າ ສະຖານທູດສປຈີນປະຈຳສປປລາວ, ທ່ານ ນາງ ເມິ້ງ ຊູເສີນ ປະທານບໍລິຫານ ທັງເປັນຜູ້ອຳນວຍການໃຫຍ່ ບໍລິສັດ ຊາຍນາ ຢູນິຄອມ ສາກົນຈຳກັດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ເມິ້ງຊູເສິນ ກ່າວວ່າ: ຈີນ ແລະ ລາວ ໄດ້ມີການພົວພັນຮ່ວມມືກັນມາແຕ່ດົນນານໂດຍສະເພາະແມ່ນການຮ່ວມມືດ້ານເສດຖະກິດ, ການຄ້າແລະການລົງທຶນແລະ ຂົງເຂດອື່ນໆ ນັບມື້ນັບເຂົ້າສູ່ລວງເລິກ,ການສ້າງທາງລົດໄຟລາວ-ຈີນ ໄດ້ກາຍເປັນສັນຍາລັກ ແຫ່ງມິດຕະພາບລະຫວ່າງປະຊາຊົນສອງຊາດ ລາວ-ຈີນ ແລະ ເຮັດໃຫ້ການຮ່ວມມືດ້ານເສດຖະກິດລະຫວ່າງສອງປະເທດລາວ-ຈີນ ໄດ້ຂະຫຍາຍຕົວຢ່າງໄວວາ, ມີນັກທຸລະກິດຈາກ ສປ ຈີນມາລົງທຶນຢູ່ ສປປລາວນັບມື້ເພີ່ມຂຶ້ນ; ບໍລິສັດ ໄຊນາຢູນີຄອມ ມີຄວາມຕັ້ງໃຈໃນການບໍລິການດ້ານການສື່ສານ-ຂໍ້ມູນຂ່າວສານຢູ່ ສປປລາວ.
ທ່ານນາງ ເມິ້ງຊູເສິນ ກ່າວອີກວ່າ: ໃນຖານະທີ່ເປັນ 1 ໃນ 3 ຜູ້ປະກອບການ ດ້ານທຸລະກິດໂທລະຄົມມະນາຄົມ ທີ່ສຳຄັນຂອງຈີນ,ໄຊນາ ຢູນິຄອມ ໄດ້ໃຫ້ຄຳໝັ້ນສັນຍາໃນການສ້າງເຄືອຂ່າຍຂໍ້ມູນ ລະດັບໂລກ ແລະ ສະໜອງການບໍລິການຄຸນນະພາບສູງ ແບບປະຕູດຽວໃຫ້ແກ່ວິສາຫະກິດຈີນ ເພື່ອອອກສູ່ທົ່ວໂລກ, ໃນປີ 2009 ໄຊນາ ຢູນິຄອມ ໄດ້ເຂົ້າສູ່ຕະຫຼາດອາຊຽນຢ່າງເປັນທາງການ ແລະ ສ້າງຕັ້ງສາຂາຢູ່ 9 ປະເທດ ຄື: ສິງກະໂປ,ຫວຽດນາມ,ໄທ,ກຳປູເຈຍ ແລະ ອື່ນໆ. 
ສຳລັບການສ້າງຕັ້ງຫ້ອງການຜູ້ຕາງໜ້າປະຈຳສປປລາວ ແມ່ນການປະກອບສ່ວນຢ່າງຕັ້ງໜ້າ ຂອງໄຊນາ ຢູນິຄອມ ໃນການຊຸກຍູ້ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງ ແລະ ສືບຕໍ່ລົງເລິກມາດຕະການປະຕິບັດຕົວຈິງເພື່ອຮັບໃຊ້ຕະຫຼາດລາວ, ຂ້າພະເຈົ້າເຊື່ອໝັ້ນວ່າຫ້ອງການຜູ້ຕາງໜ້າບໍລິສັດປະຈຳລາວຈະສາມາດເຊື່ອມໂຍງເຂົ້າກັບສະພາບແວດລ້ອມການລົງທຶນແລະການພັດທະນາຢູ່ ສປປລາວແລະເຮັດວຽກຢ່າງໃກ້ຊິສິດກັບບໍລິສັດຜູ້ລົງທຶນ, ຜູ້ປະກອບການແລະຄູ່ຮ່ວມມື ໃນ ສປປລາວ.
ທ່ານ ພູໂຂງ ຈິດຮູບໂລກ ຫົວໜ້າຫ້ອງການກະຊວງເຕັກໂນໂລຊີ ແລະ ການສື່ສານ ກ່າວວ່າ: ການຫັນເປັນດີຈີຕອນ ແມ່ນຄວາມຕ້ອງການທີ່ຈຳເປັນຢ່າງພາວະວິໄສ ໃນການພັດທະນາປະເທດ, ວຽກດັ່ງກ່າວເປັນໜ້າທີ່ສຳຄັນ, ທັງເປັນວຽກສະເພາະໜ້າຮີບດ່ວນແລະເປັນຍຸດທະສາດທີ່ຍາວນານໃນທົ່ວສັງຄົມ ຊຶ່ງຕິດພັນຢ່າງສະໜິດແໜ້ນກັບຂະບວນການເຊື່ອມໂຍງສາກົນ, ການຫັນເປັນດີຈີຕອນ ຕ້ອງດຳເນີນຢ່າງເລິກເຊິ່ງ ຕ້ອງສົມທົບກັບການປັບປຸງຍົກລະດັບບັນດາເງື່ອນໄຂ ແລະ ສິ່ງອຳນວຍຄວາມສະດວກຢູ່ພາຍໃນປະເທດ ກັບການຕັ້ງໜ້າຂົນຂວາຍຍາດແຍ່ງການຮ່ວມມື ແລະ ການລົງທຶນຈາກຕ່າງປະເທດ, ເປັນຕົ້ນແມ່ນບັນດາປະເທດເພື່ອນມິດຍຸດທະສາດ ແລະ ສືບຕໍ່ປະຕິບັດການເຊື່ອມຈອດ ເຊື່ອມໂຍງກັບສາກົນ ເພື່ອດຶງດູດທຶນຮອນ ແລະ ການຖ່າຍທອດເຕັກໂນໂລຊີທັນສະໄໝ ພ້ອມທັງຄວາມຮູ້ ແລະ ຜົນສຳເລັດໃໝ່ທາງດ້ານວິທະຍາສາດ ເຕັກໂນໂລຊີ ແລະ ນະວັດຕະກຳຈາກຕ່າງປະເທດ, ເສີມຂະຫຍາຍ ຄວາມອາດສາມາດບົ່ມຊ້ອນ ແລະກຳລັງແຮງຂອງປະເທດ,ໃນການຈັດຕັ້ງປະຕິບັດຍຸດທະສາດດີຈີຕອນຂອງລາວ ບໍ່ພຽງແຕ່ຈະຊ່ວຍປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າເທົ່ານັ້ນແຕ່ຍັງສາມາດຊຸກຍູ້ການພັດທະນາເສດຖະກິດ-ສັງຄົມ ຂອງ ສປປ ລາວ ໃຫ້ກ້າວໜ້າຍິ່ງໆຂຶ້ນ.
ຂ່າວ: ຄ. ຄຳປະສິດ