 |
ໃນວັນທີ 13 ພຶດສະພາຜ່ານມາ ທີ່ກະຊວງ ສສກ ທ່ານ ນາງ ເລິມ ທິ ເຟືອງ ແທງ ລັດຖະມົນຕີ ກະຊວງວັດທະນະທຳ ກິລາ ແລະ ທ່ອງທ່ຽວ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າຢ້ຽມຢາມພົບປະທ່ານ ທອງສະລິດ ມັງໜໍ່ເມກ ຮອງນາຍົກລັດຖະມົນຕີ ລັດຖະມົນຕີກະຊວງສຶກສາທິການ ແລະ ກິລາ ໃນໂອກາດເດີນທາງມາຢ້ຽມຢາມ ແລະ ເຮັດວຽກງານຢູ່ ສປປ ລາວ. ການພົບປະຄັ້ງນີ້, ສອງຝ່າຍໄດ້ຕີລາຄາສູງກ່ຽວກັບການຮ່ວມມືໃນໄລຍະຜ່ານມາ, ກ່ຽວກັບວຽກງານຂະແໜງການສຶກສາ ແລະ ກິລາ ໂດຍສະເພາະທາງລັດຖະ ບານ ສປປ ລາວ ສະເໜີໃຫ້ລັດຖະບານ ສສ ຫວຽດນາມ ສືບຕໍ່ຊ່ວຍເຫຼືອປັບປຸງສູນຝຶກກິລາແຫ່ງຊາດ ທີ່ເປັນໂຄງການຊ່ວຍເຫຼືອຈາກ ສສ ຫວຽດນາມ ຊຶ່ງກໍ່ສ້າງຂຶ້ນໃນປີ 2009 ເນື່ອງຈາກປັດຈຸບັນມີສະພາບທີ່ຊຸດໂຊມ ແລະ ບໍ່ສາມາດນຳໃຊ້ໄດ້; ສືບຕໍ່ຊຸກຍູ້ຊ່ວຍເຫຼືອໂຄງການກໍ່ສ້າງສູນວິທະຍາສາດການກິລາ ເພື່ອນໍາໃຊ້ເຂົ້າໃນການກະກຽມນັກກິລາທີມຊາດລາວ ເຂົ້າຮ່ວມແຂ່ງຂັນງານມະຫະກໍາກິລາຊີເກມ ຄັ້ງທີ 36 ໃນປີ 2031 ທີ່ ສປປ ລາວ ເປັນເຈົ້າພາບ; ສືບຕໍ່ສະໜອງທຶນການສຶກສາໄລຍະຍາວໃນສາຂາການກິລາ ແລະ ທຶນຝຶກອົບຮົມໄລຍະສັ້ນ-ກາງ ໃຫ້ບຸກຄະລາກອນກິລາ ແລະ ນັກກິລາທີມຊາດ ທັງໃນຮູບແບບນຳສົ່ງວິທະຍາກອນມາຈັດຝຶກອົບຮົມ ຢູ່ ສປປ ລາວ ແລະ ທຶນເກັບຕົວຝຶກຊ້ອມໄລຍະ 3-6 ເດືອນທີ່ ສສ ຫວຽດນາມຈຳນວນ 35-60 ທຶນຕໍ່ປີ ແລະ ໄລຍະປີ 2029-2030 ທີ່ກະກຽມເປັນເຈົ້າພາບຊີເກມທີ່ຈະຈັດຂຶ້ນໃນປີ 2031 ຈໍານວນ 70-100 ທຶນຕໍ່ປີ; ສືບຕໍ່ສະໜອງອຸປະກອນຝຶກຊ້ອມ ແລະ ແຂ່ງຂັນທີ່ຈຳເປັນ ແລະ ໄດ້ມາດຕະຖານ ໃນປະເພດກິລາທີ່ມີຄວາມຫວັງຫຼຽນລາງວັນ ໂດຍສະເພາະປະກອບໃຫ້ສູນຝຶກກິລາແຫ່ງຊາດ, ສະຖາບັນກິລາ-ກາຍະກຳແຫ່ງຊາດ ເພື່ອກະກຽມນັກກິລາທີມຊາດ ເຂົ້າຮ່ວມແຂ່ງຂັນໃນງານມະຫະກຳກິລາຊີເກມປີ 2031 ທີ່ ສປປ ລາວ ເປັນເຈົ້າພາບ.
ພ້ອມນີ້, ຍັງສະເໜີຝ່າຍຫວຽດນາມ ສະໜອງທຶນຝຶກອົບຮົມການບໍລິຫານຄຸ້ມຄອງກິລາຄົນພິການໃຫ້ຜູ້ບໍລິຫານ; ການຈັດກິດຈະກຳແຂ່ງຂັນກິລາບານເຕະນັກຮຽນມັດທະຍົມສຶກສາ ລະຫວ່າງລາວ ແລະ ຫວຽດນາມ, ສືບຕໍ່ຊ່ວຍເຫຼືອຝຶກຊ້ອມໃຫ້ນັກກິລາຄົນພິການທີມຊາດລາວ ປະເພດກິລາແລ່ນ-ລານ ແລະ ຍົກນ້ຳໜັກ ພ້ອມທັງແລກປ່ຽນການສົ່ງເສີມມວນຊົນທຸກເພດໄວ ເຂົ້າຮ່ວມຂະບວນການອອກກຳລັງກາຍເພື່ອສຸຂະພາບ ແລະ ສົ່ງເສີມກິລາພື້ນເມືອງ.
ຂ່າວ-ພາບ: ສົງການ ພັນແພງດີ
ຄໍາເຫັນ