ຮຽນຮູ້ທັກສະທາງດ້ານກົດໝາຍປະເທດຢີ່ປຸ່ນແບບມືອາຊີບ

ກອງປະຊຸມສຳມະນາກ່ຽວກັບການຮຽນຮູ້ທັກສະທາງດ້ານກົດໝາຍແບບມືອາຊີບໄດ້ຈັດຂຶ້ນໃນວັນທີ 6 ກຸມພາຜ່ານມາ ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ຄຳເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ(ອອປສ) ແລະ ທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທຳ, ມີສະມາຊິກກຸ່ມຄົ້ນຄວ້າປະມວນກົດໝາຍແພ່ງ, ປະມວນກົດໝາຍອາຍາ ແລະ ພັດທະນາການສຶກສາ (ກົດໝາຍແພ່ງ) ກະຊວງຍຸຕິທຳ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ມະຫາວິທະຍາໄລແຫ່ງຊາດ, ສາດສະດາຈານ, ຜູ້ຊ່ຽວຊານຢີ່ປຸ່ນ, ຄະນະຮັບຜິດຊອບໂຄງການໄຈກາເຂົ້າຮ່ວມ. 
    ກອງປະຊຸມຄັ້ງນີ້ ໄດ້ຮັບຟັງການສະເໜີບົດຮຽນຂອງສາດສະດາຈານ ຮິໂຣຊິ ມາຊຶໂອະ ແລະ ສາດສະດາຈານ ມາໂກະໂຕະ ອິດະ ຜູ້ຊ່ຽວຊານທາງດ້ານກົດໝາຍແພ່ງ ແລະ ກົດໝາຍອາຍາຂອງປະເທດຍີ່ປຸ່ນທີ່ໄດ້ຖ່າຍຖອດບົດຮຽນ, ທັກສະການນຳໃຊ້ກົດໝາຍແບບມືອາຊີບກ່ຽວກັບການຕີຄວາມໝາຍຂອງກົດໝາຍແພ່ງ, ກົດໝາຍອາຍາ, ການກຳນົດຂໍ້ເທັດຈິງຄະດີແພ່ງ, ຄະດີອາຍາຂອງປະເທດຍີ່ປຸ່ນ ຊຶ່ງເປັນບົດຮຽນທີ່ມີຄວາມສຳຄັນທີ່ສຸດຂອງຜູ້ປະກອບອາຊີບກົດໝາຍ, ຂອງນັກກົດໝາຍມືອາຊີບ, ຮັບປະກັນໃຫ້ການນຳໃຊ້, ການຕີຄວາມໝາຍຂອງກົດໝາຍເຂົ້າໃນການແກ້ໄຂຂໍ້ຂັດແຍ່ງທາງດ້ານກົດໝາຍຢູ່ ສປປ ລາວ ຢ່າງຖືກຕ້ອງ, ເປັນທຳ, ປົກປ້ອງສິດ ແລະ ຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທຳຂອງພົນລະເມືອງຕາມກົດໝາຍເຮັດໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເສດຖະກິດໄດ້ຮັບການພັດທະນາຂະຫຍາຍຕົວຢ່າງບໍ່ຢຸດຢັ້ງ.
ໂອກາດນີ້, ທ່ານ ຄຳເພັດ ສົມວໍລະຈິດ ໄດ້ມີຄໍາເຫັນສະເໜີໃຫ້ສືບຕໍ່ຈັດກອງປະຊຸມດັ່ງກ່າວໃຫ້ພະນັກງານສືບສວນ-ສອບສວນ, ພະນັກງານໄອຍະການປະຊາຊົນ, ຜູ້ພິພາກສາ, ຄູ-ອາຈານກົດໝາຍ, ນັກສຶກສາ, ທະນາຍຄວາມ ແລະ ນັກກົດໝາຍຂອງ ສປປ ລາວ ໃນຂອບເຂດທົ່ວປະເທດຕື່ມອີກ ພ້ອມທັງສັງລວມບົດຮຽນ, ບົດສະເໜີຂອງທ່ານສາດສະດາຈານກ່ຽວບັນຫານີ້ເປັນເອກະສານສຳມະນາຄົບຊຸດ ເພື່ອນຳໄປໝູນໃຊ້ເຂົ້າໃນວຽກງານຕົວຈິງໃຫ້ໄດ້ຮັບຜົນດີປະກອບສ່ວນສ້າງລັດທີ່ປົກຄອງດ້ວຍກົດໝາຍຢູ່ປະເທດເຮົາໃຫ້ນັບມື້ນັບມີຜົນສັກສິດ.
ຂ່າວ-ພາບ: ມະໂນປະພາ