ຫົວໜ້າ ຄຕພ ຕ້ອນຮັບຄະນະຜູ້ເເທນ ພັກກອມມູນິດສະຫະພັນຣັດເຊຍ 

ໃນວັນທີ2 ຕຸລາ ຜ່ານມາ, ທີ່ ສຳນັກງານ ຄະນະພົວພັນຕ່າງປະເທດສູນກາງພັກ, ສະຫາຍ ທອງສະຫວັນ ພົມວິຫານກໍາມະການສູນກາງພັກຫົວໜ້າຄະນະພົວພັນຕ່າງປະເທດສູນກາງພັກ(ຄຕພ) ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ສະຫາຍ ເດນິສ ອັນເດຣເຢວິດ ປາຣເຟນົບ(Denis Andreevich Parfenov)ສະມາຊິກສະພາດູມາສະຫະພັນຣັດເຊຍເລຂາທິການອົງຄະນະພັກນະຄອນຫຼວງມົສກູກໍາມະການສູນກາງພັກກອມມູນິດສະຫະພັນຣັດເຊຍ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວເເຕ່ວັນທີ 29 ກັນຍາ - 6 ຕຸລາ 2023.
ໃນການພົບປະສະຫາຍ ທອງສະຫວັນ ພົມວິຫານໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະຜູ້ແທນພັກກອມມູນິດສະຫະພັນຣັດເຊຍ ໃນຄັ້ງນີ້ແລະ ໄດ້ແຈ້ງສະພາບພົ້ນເດັ່ນພາຍໃນຂອງລາວໂດຍສັງເຂບ ໂດຍສະເພາະການພັດທະນາເສດຖະກິດ-ສັງຄົມຂອງ ສປປ ລາວ ໃຫ້ຝ່າຍຣັດເຊຍຊາບ, ພ້ອມທັງຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອອັນດີງາມ ລະຫວ່າງ ພັກ ປປ ລາວ ແລະ ພັກກອມມູນິດສະຫະພັນຣັດເຊຍ ຕະຫຼອດໄລຍະຜ່ານມາ ຊຶ່ງສາຍພົວພັນດັ່ງກ່າວ ໄດ້ເປັນການປະກອບສ່ວນສໍາຄັນເຂົ້າໃນການຮັດແໜ້ນແລະ ເສີມຂະຫຍາຍສາຍພົວພັນມິດຕະພາບແລະ ການຮ່ວມມືລະຫວ່າງ ສອງປະເທດ ລາວ ແລະ ຣັດເຊຍ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ໃນໂອກາດດັ່ງກ່າວ, ສະຫາຍ ເດນິສ ອັນເດຣເຢວິດ ປາຣເຟນົບ ກໍໄດ້ກ່າວສະແດງຄວາມຂອບໃຈແລະ ຕີລາຄາສູງຕໍ່ການຕ້ອນຮັບອັນອົບອຸ່ນຖານມິດສະຫາຍອັນສະໜິດສະໜົມຈາກຝ່າຍລາວ.ພ້ອມທັງໄດ້ແຈ້ງໃຫ້ຊາບກ່ຽວກັບການມາຢ້ຽມຢາມ ສປປ ລາວ ຄັ້ງນີ້ ຄະນະຜູ້ເເທນພັກກອມມູນິດສະຫະພັນຣັດເຊຍ ໄດ້ພົບປະເຮັດວຽກກັບອົງຄະນະພັກນະຄອນຫຼວງວຽງຈັນ ຊຶ່ງເປັນການຈັດຕັ້ງປະຕິບັດຕາມເນື້ອໃນຈິດໃຈຂໍ້ຕົກລົງ ລະຫວ່າງ ສອງອົງຄະນະພັກກອມມູນິດສະຫະພັນຣັດເຊຍ ປະຈໍາສະພາດູມານະຄອນຫຼວງມົສກູ ແລະ ອົງຄະນະພັກນະຄອນຫຼວງວຽງຈັນ ກໍຄືລະຫວ່າງ ພັກກອມມູນິດສະຫະພັນຣັດເຊຍ ແລະ ພັກ ປປ ລາວ ໃຫ້ປະກົດຜົນເປັນຈິງ ແລະ ມີໝາກຜົນຍິ່ງໆຂຶ້ນ. ນອກນັ້ນ, ຄະນະຜູ້ແທນພັກກອມມູນິດສະຫະພັນຣັດເຊຍ ຍັງໄດ້ພົບປະ ແລະ ເຮັດວຽກຮ່ວມກັບພາກສ່ວນກ່ຽວຂ້ອງຂອງ ສປປ ລາວໂດຍສະເພາະສູນກາງຊາວໜຸ່ມ ປະຊາຊົນ ປະຕິວັດລາວ, ສູນກາງສະຫະພັນແມ່ຍິງລາວ, ສະມາຄົມມິດຕະພາບລາວ-ຣັດເຊຍ, ສູນວິທະຍາສາດ ແລະ ວັດທະນະທໍາຣັດເຊຍ, ຢ້ຽມຊົມການຮຽນການສອນພາສາຣັດເຊຍຢູ່ໂຮງຮຽນມັດທະຍົມຕົ້ນເພຍວັດ, ຢ້ຽມຊົມສະຖານທີ່ທ່ອງທ່ຽວທາງປະຫວັດສາດໃນນະຄອນຫຼວງວຽງຈັນ ແລະ ຢ້ຽມຊົມສະຖານທີ່ທ່ອງທ່ຽວທາງທໍາມະຊາດ“ນໍ້າກັດຢໍລະປາ”, ເຂດເສດຖະກິດປູກຝັງລ້ຽງສັດຕ່າງໆ ຢູ່ແຂວງອຸດົມໄຊ.
ນອກຈາກນັ້ນ, ທັງສອງຝ່າຍຍັງໄດ້ປຶກສາຫາລືກັນ ກ່ຽວກັບ ການສົ່ງເສີມການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ການເປີດສາຍການບິນຄືນໃໝ່ ຈາກນະຄອນຫຼວງມົສກູ-ວຽງຈັນ-ມົສກູ, ພ້ອມນັ້ນຝ່າຍຣັດເຊຍມີຄວາມສົນໃຈຮ່ວມມື ຊື້-ຂາຍ ກາເຟຈາກລາວ.
    ໃນຕອນທ້າຍ, ສະຫາຍທອງສະຫວັນ ພົມວິຫານ ໄດ້ອວຍພອນໃຫ້ແກ່ການຢ້ຽມຢາມ ສປປ ລາວ ຂອງຄະນະຜູ້ເເທນພັກກອມມູນິດສະຫະພັນຣັດເຊຍ ໃນຄັ້ງນີ້ ຈົ່ງປະສົບຜົນສໍາເລັດຕາມເປົ້າໝາຍແລະ ມີຜົນສໍາເລັດອັນໃໝ່ທີ່ຍິ່ງໃຫຍ່ກວ່າເກົ່າໃນພາລະກິດຂອງຕົນ.
ຂ່າວ: ຄຕພ, ພາບ: ພັດ ລໍວັນໄຊ