ຫົວໜ້າ ຄຕພຢ້ຽມຢາມ ສປ ຈີນ 

ໂດຍຕອບສະຫນອງຕາມການເຊື້້ອເຊີນ ຂອງ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ແລະ ປະຕິບັດຕາມແຜນການຮ່ວມມື ລະຫວ່າງ ສອງພັກ ແລະ ແຜນການຮ່ວມມື ສອງຄະນະພົວພັນຕ່າງປະເທດສູນກາງພັກ ລາວ-ຈີນ, ສະຫາຍ ທອງສະຫວັນ ພົມວິຫານ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ນຳພາຄະນະຜູ້ແທນ ຄະນະພົວພັນຕ່າງປະເທດສູນກາງພັກ ປປ ລາວ ເດີນທາງຢ້ຽມຢາມ ສປ ຈີນ ຢ່າງເປັນທາງການ ແຕ່ວັນທີ 14-16 ຕຸລາ 2023.
ໃນວັນທີ 15 ຕຸລາ 2023, ສະຫາຍ ທອງສະຫວັນ ພົມວິຫານ ໄດ້ພົບປະກັບ ສະຫາຍ ຫຼິວ ຈ້ຽນຊາວ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ທີ່ ນະຄອນຫຼວງປັກກິ່ງ ຊຶ່ງສອງຝ່າຍ ໄດ້ຕີລາຄາສູງຕໍ່ໝາກຜົນຂອງການພົວພັນຮ່ວມມືລະຫວ່າງ ສອງພັກ, ສອງປະເທດ ກໍຄື ລະຫວ່າງ ສອງຄະນະພົວພັນຕ່າງປະເທດສູນກາງພັກລາວ-ຈີນ ໃນໄລຍະຜ່ານມາ,ໄດ້ແລກປ່ຽນຄຳຄິດເຫັນນຳກັນກ່ຽວກັບການເສີມຂະຫຍາຍສາຍພົວພັນຮ່ວມມືລະຫວ່າງສອງພັກ, ສອງຄະນະພົວພັນຕ່າງປະເທດສູນກາງພັກ ແລະ ທັດສະນະ ກ່ຽວກັບບັນຫາສາກົນ ແລະ ພາກພື້ນ ທີ່ສອງຝ່າຍໃຫ້ຄວາມສົນໃຈ.
ສອງຝ່າຍເຫັນດີເອກະພາບສືບຕໍ່ຮັດແຫນ້ນການປະສານທົບກັນ, ເຮັດໜ້າທີ່ເປັນເສນາທິການໃຫ້ແກ່ສູນກາງພັກ, ຈັດຕັ້ງປະຕິບັດແຜນການຮ່ວມມືລະຫວ່າງສອງພັກແລະສອງຄະນະພົວພັນຕ່າງປະເທດສູນກາງພັກໃຫ້ເກີດດອກອອກຜົນ,ຢືນຢັນທີ່ຈະສືບຕໍ່ໃຫ້ການສະໜັບສະໜູນຊຶ່ງກັນແລະກັນ ແລະ ປະສານສົມທົບກັນຢ່າງໃກ້ຊິດໃນເວທີພາກພື້ນແລະສາກົນ, ພ້ອມກັນເປັນເຈົ້າການ ແລະ ເອົາໃຈໃສ່ຈັດຕັ້ງຜັນຂະຫຍາຍບັນດາເນື້ອໃນຈິດໃຈທີ່ການນຳສູງສຸດຂອງສອງພັກ, ສອງລັດ ໄດ້ຕົກລົງກັນຜ່ານມາ ເພື່ອສືບຕໍ່ເພີ່ມພູນຄູນສ້າງສາຍພົວພັນຄູ່ຮ່ວມມືຍຸດທະສາດຮອບດ້ານໝັ້ຍຄົງຍາວນານຕາມທິດ 4 ດີໃຫ້ເຂົ້າສູ່ລວງເລິກ ແລະ ຮ່ວມກັນສ້າງຄູ່ຮ່ວມຊາຕາກຳລາວ-ຈີນດ້ວຍມາດຕະຖານສູງ, ຄຸນນະພາບສູງແລະລະດັບສູງກວ່າເກົ່າ.
ກ່ອນໜ້ານັ້ນ ໃນວັນທີ 14 ຕຸລາ 2023 ຄະນະຜູ້ແທນ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຢຸນນານສປ ຈີນ ຊຶ່ງ ສະຫາຍ ທອງສະຫວັນ ພົມວິຫານ ໄດ້ພົບປະກັບ ສະຫາຍ ສື ຢູ້ກ່າງ ກໍາມະການສຳຮອງສູນກາງພັກຮອງເລຂາຄະນະພັກແຂວງ ອະທິການບໍດີໂຮງຮຽນພັກແຂວງ ອະທິການບໍດີໂຮງຮຽນການປົກຄອງແຂວງຢຸນນານຊຶ່ງສອງຝ່າຍ ໄດ້ພ້ອມກັນຕີລາຄາ ການຈັດຕັ້ງຜັນຂະຫຍາຍກົນໄກການຮ່ວມມືລະຫວ່າງສອງພັກ, ສອງຄະນະພົວພັນຕ່າງປະເທດສູນກາງພັກກໍຄືມູນເຊື້ອມິດຕະພາບລະຫວ່າງຄະນະພົວພັນຕ່າງປະເທດສູນກາງພັກປປລາວກັບ ແຂວງຢຸນນານ ໃນໄລຍະຜ່ານມາ.
ສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມືແລະປະສານສົມທົບກັນລະຫວ່າງຄະນະພົວພັນຕ່າງປະເທດສູນກາງພັກປປລາວກັບແຂວງຢຸນນານໂດຍສະເພາະແມ່ນ ການຮັບປະກັນໃຫ້ແກ່ການເຄື່ອນໄຫວຂອງການນນຳສອງພັກ, ສອງປະເທດ ໃຫ້ໄດ້ຮັບຜົນສຳເລັດ; ຕີລາຄາກົນໄກການແລກປ່ຽນການຢ້ຽມຢາມໄປມາຫາສູ່ກັນ ລະຫວ່າງສອງຝ່າຍ, ການແລກປ່ຽນຄະນະວິຊາການແລະການຝຶກອົບຮົມດ້ານເຕັກນິກວິຊາການຕ່າງໆຂອງສອງຝ່າຍ, ເອກະພາບກັນ ສຶບຕໍ່ເພີ່ມທະວີການພົວພັນຮ່ວມມືສອງຝ່າຍ ກໍຄື ການຮັກສາການປະສານສົບກັນຢ່າງໃກ້ຊິດໃນຕໍ່ໜ້າ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ ໃຫ້ນັບມື້ນັບຫຼາຍຂຶ້ນ.
 ຂ່າວ-ພາບ:ຄຕພ