ຫົວໜ້າການເມືອງສອງກອງບັນຊາການທະຫານແຂວງບໍ່ແກ້ວ-ຫຼວງນ້ຳທາ ຢ້ຽມຢາມກອງພັນເຮືອ ສປ ຈີນ

ເມື່ອບໍ່ດົນມານີ້, ສະຫາຍ ພົນຈັດຕະວາ ບຸນມີ ພາມີໄຊ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ ແລະ ສະຫາຍ ພົນຈັດຕະວາ ຫຸມພັນ ແກ້ວວັງລາດ ຫົວໜ້າການເມືອງ ກອງບັນຊາການທະ ຫານແຂວງຫຼວງນ້ຳ ພ້ອມຄະນະໄດ້ເຄື່ອນໄຫວຢ້ຽມຢາມກອງພັນເຮືອປະຈຳທ່າເຮືອຈິງຮ່າ ແຂວງຢູນນານ ສປ ຈີນ ເປັນກຽດຕ້ອນຮັບຂອງສະຫາຍ ພົນໂທ ຢວນຢາຜິງ ຫົວໜ້າກອງບັນຊາການຕຳຫຼວດລາດຕະ ເວນທາງນ້ຳ ແຂວງຢູນນານ ສປ ຈີນ ພ້ອມຄະນະ ມີບັນດາພາກສ່ວນກ່ຽວຂ້ອງເຂົ້າຮ່ວມ.
    ສະຫາຍ ພົນໂທ ຢວນຢາຜິງ ໄດ້ສະແດງຄວາມຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມກອງພັນເຮືອ ປະຈຳທ່າເຮືອຈິງຮ່າ ແຂວງຢູນນານ ສປ ຈີນ ຊຶ່ງໄດ້ຍົກໃຫ້ເຫັນມູນເຊື້ອການພົວພັນຮ່ວມມືລະຫວ່າງສອງຊາດ, ສອງກອງທັບລາວ-ຈີນ, ຈີນ-ລາວໃນໄລຍະຜ່ານມາ. ຊຶ່ງການມາຢ້ຽມຢາມໃນຄັ້ງນີ້ ເພື່ອເປັນການເພີ່ມທະວີການພົວພັນຮ່ວມມືຂອງສອງກອງທັບລາວ-ຈີນ ທັງເປັນການເພີ່ມພູນຄູນສ້າງຄວາມສາມັກຄີທີ່ມີມູນເຊື້ອອັນດີງາມ, ການປະສ່ວນເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງສອງພັກ-ສອງລັດ ແລະ ປະຊາຊົນສອງຊາດລາວ-ຈີນໃຫ້ນັບມື້ໝັ້ນຄົງທະນົງແກ່ນ.
     ໂອກາດນີ້, ສະຫາຍ ພົນຈັດຕະວາ ບຸນມີ ພາມີໄຊ ແລະ ສະຫາຍ ພົນຈັດຕະວາ ຫຸມພັນ ແກ້ວວັງລາດ ໄດ້ສະແດງຄວາມຂອບໃຈ ຕໍ່ສະຫາຍພົນໂທ ຢວນຢາຜິງ ທີ່ໃຫ້ການຕ້ອນຮັບຢ່າງອົບອຸ່ນ ແລະ ເຕັມໄປດ້ວຍໄມຕີຈິດມິດຕະພາບ ພ້ອມທັງຍົກໃຫ້ເຫັນປະຫວັດຄວາມເປັນມາ, ພາລະບົດບາດ ແລະ ໜ້າທີ່ຂອງສອງພັກ-ສອງລັດ ເພື່ອພ້ອມກັນປົກປັກຮັກສາ, ເສີມຂະຫາຍສາຍພົວພັນຮ່ວມມືລະຫວ່າງສອງຊາດລາວ-ຈີນໃຫ້  ແໜ້ນແຟ້ນຍິ່ງໆຂຶ້ນ. ໂອກາດດັ່ງກາວຄະນະຜູ້ແທນໄດ້ຮັບຊົມເຮືອ 53107 ຊຶ່ງປະກອບມີ: ການຮັບຊົມປຶນກົນແບບໃໝ່, ຊົມຫ້ອງເຄື່ອງຈັກ, ປຶນດັບເພິງ, ເຮືອບັງຂັບບໍ່ມີຄົນຂັບ, ຫ້ອງບັນຊາການ ແລະ ຫ້ອງປະຊຸມ. ຈາກນັ້ນໄດ້ຮັບຊົມການສະແດງຈຳນວນ 4 ລາຍການ ແລະ ຮັບຊົບສິລະປະ-ວັນນະຄະດີຂອງສິບສອງພັນນາຈຳ ນວນ 10 ລາຍການເຮັດໃຫ້ບັນຍາກາດດັ່ງກ່າວເຕັມໄປດ້ວຍຄວາມເບີກບານມ່ວນຊື່ນ.  
ຂ່າວ-ພາບ: ວໍລະສິດ ພິດສະຫາຍ