ໄດ້ຕ້ອນຮັບທ່ານ ຫງວຽນວັນເຍືອງຮອງຫົວໜ້າອໍານວຍການອະນຸສອນສະຖານປະທານໂຮ່ຈິມິນ (ທໍານຽບປະທານປະເທດສສຫວຽດນາມກະຊວງວັດທະນະທໍາ,ກິລາແລະທ່ອງທ່ຽວພ້ອມຄະນະ ໃນວັນທີ 28 ຕຸລາ ນີ້ທີ່ຫໍພິພິທະພັນໄກສອນ ພົມວິຫານ ເນື່ອງໃນໂອກາດທີ່ໄດ້ມາຢ້ຽມຢາມ ແລະ ເຮັດວຽກຮ່ວມກົມພິພິທະພັນ ໄກສອນ ພົມວິຫານ ແລະ ອະນຸສອນສະຖານ ຜູ້ນໍາປະຕິວັດ ລະຫວ່າງວັນທີ 27 ຕຸລາຫາ 2 ພະຈິກນີ້.
ໃນໂອກາດດັ່ງກ່າວ,ທ່ານ ໄຊຍະລາດ ພົງຍາລັກ ໄດ້ສະແດງຄວາມຕ້ອນຮັບ ແລະ ຂອບໃຈເປັນຢ່າງສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍຄື ສອງກົມພິພິທະພັນ ໄກສອນ ພົມວິຫານ ແລະ ອະນຸສອນສະຖານປະທານໂຮ່ຈິມິນ ໃນໄລຍະຜ່ານມາ ໂອກາດມາຢ້ຽມຢາມຄັ້ງນີ້ ທ່ານ ຫງວຽນວັນເຍືອງໃຫ້ກຽດຂຶ້ນຈັດວາງກະຕ່າດອກໄມ້ ຢູ່ຕໍ່ໜ້າຮູບປັ້ນຫຼໍ່ຂອງປະທານ ໄກສອນ ພົມວິຫານຜູ້ນໍາທີ່ດີເດັ່ນ ແລະ ແສນເຄົາລົບຮັກຂອງພັກ-ລັດ ແລະ ປວງຊົນລາວທັງຊາດ ເພື່ອສະແດງຄວາມເຄົາລົບຮັກ, ກະຕັນຍູຮູ້ບຸນຄຸນ ຈາລຶກຄຸນງາມຄວາມດີຂອງປະທານ ໄກສອນ ພົມວິຫານ ທີ່ໄດ້ອຸດທິດຕະຫຼອດຊີວິດ ເພື່ອຜົນປະໂຫຍດສ່ວນລວມຂອງຊາດ, ທ່ານໄດ້ສຸມສະຕິປັນຍາເຂົ້າໃນການນໍາພາຂະບວນການຕໍ່ສູ້ຕ້ານການຮຸກຮານຂອງພວກຕ່າງດ້າວ ສາມາດຍາດໄດ້ໄຊຊະນະ ແລະ ນໍາເອົາຄວາມຢູ່ເຢັນເປັນສຸກມາສູ່ປະຊາຊົນ. ປະທານ ໄກສອນ ພົມວິຫານ ແມ່ນນັກຮັກຊາດຜູ້ຍິ່ງໃຫຍ່, ເປັນນັກປະຕິວັດຜູ້ດີເລີດ ເປັນຜູ້ນໍາສູງສຸດຂອງການປະຕິວັດທີ່ມີຄວາມປີຊາສາມາດ, ມີຄວາມສະຫຼາດຫຼັກແຫຼມ, ມີໄຫວພິບອັນແຫຼມຄົມ, ມີນໍ້າໃຈຕໍ່ສູ້ເດັດດ່ຽວໜຽວແໜ້ນ, ນໍາພາສ້າງຕັ້ງ, ຖະນຸບຳລຸງ, ສ້າງສາ ແລະ ພັດທະນາປະເທດຊາດໃຫ້ຮຸ່ງເຮືອງສີວິໄລ, ສ້າງປະຖົມປັດໄຈ ກ້າວຂຶ້ນສັງຄົມນິຍົມຢ່າງໜັກແໜ້ນ.ທັງເປັນການຮັກສາມູນເຊື້ອຄວາມສາມັກຄີ ອັນດີງາມຂອງສອງຊາດ ລາວ-ຫວຽດນາມ, ຫວຽດນາມ-ລາວ ທີ່ມີມາຍາວນານ ແລະ ສືບຕໍ່ໄປຂ້າງໜ້າໃຫ້ໝັ້ນຄົງຂະໜົງ ແກ່ນຕະຫຼອດໄປ.
ຂ່າວ-ພາບ:ພິພິທະພັນໄກສອນ ພົມວິຫານ
ຄໍາເຫັນ