 |
ເຂົ້າຮ່ວມໃນການລົງຢ້ຽມຢາມລວມມີ ທ່ານ ຮອງປະທານຄະນະກຳມະການປົກຄອງແຂວງຫຼວງນ້ຳທາ, ທ່ານປະທານຄະນະກຳມະການປົກຄອງເມືອງວຽງພູຄາ, ພະແນກສຶກສາທິການ ແລະ ກິລາແຂວງ, ຫ້ອງການສຶກສາ ແລະ ກິລາເມືອງ, ພ້ອມດ້ວຍອຳນາດການປົກຄອງບ້ານ, ຄະນະພັດທະນາການສຶກສາຂັ້ນບ້ານ ແລະ ຜູ້ປົກຄອງນັກຮຽນທີ່ມີບົດບາດສຳຄັນໃນການສະໜັບສະໜູນໂຄງການໃນລະດັບທ້ອງຖິ່ນ.
ໃນປີທຳອິດຂອງການຈັດຕັ້ງປະຕິບັດໂຄງການສະແດງໃຫ້ເຫັນຜົນໄດ້ຮັບທີ່ໜ້າພໍໃຈ. ຈຳນວນເດັກຍິງທຸກຍາກ ແລະ ມີຄວາມສ່ຽງທີ່ຈະປະລະການຮຽນ 800 ຄົນທີ່ໄດ້ຮັບການສະໜັບສະໜູນຜ່ານໂຄງການປັບປຸງພື້ນຖານການຮຽນຮູ້ຂອງເດັກ ມີພຽງ 1 ຄົນເທົ່ານັ້ນທີ່ໄດ້ອອກໂຮງຮຽນໃນສົກຮຽນ 2025–2026, ສະທ້ອນໃຫ້ເຫັນເຖິງຜົນສຳເລັດຂອງໂຄງການໃນການຊ່ວຍໃຫ້ເດັກຍິງສາມາດຮຽນຕໍ່ ແລະ ຢູ່ໃນລະບົບການສຶກສາໃນໄລຍະປ່ຽນຜ່ານຂອງເສັ້ນທາງການຮຽນຮູ້ຂອງພວກເຂົາເຈົ້າ.
 |
ໂຄງການປັບປຸງພື້ນຖານການຮຽນຮູ້ຂອງເດັກ FLIP ໄດ້ຮັບທຶນສະໜັບສະໜູນຈາກກອງທຶນຮ່ວມມືສາກົນເພື່ອການສຶກສາ (Global Partnership for Education - GPE) ຜ່ານກອງທຶນຫັນປ່ຽນການສຶກສາ (System Transformation Grant - STG) ແລະ ຈັດຕັ້ງປະຕິບັດໂດຍກະຊວງສຶກສາທິການ ແລະ ກິລາ, ໂດຍມີອົງການຊ່ວຍເຫຼືອເດັກສາກົນ (Save the Children International) ເປັນອົງການບໍລິຫານທຶນ (Grant Agent).ໂຄງການໄດ້ມອບທຶນການສຶກສາໃຫ້ແກ່ເດັກຍິງທຸກຍາກ ແລະ ມີຄວາມສ່ຽງທີ່ຈະປະລະການຮຽນ ຈຳນວນ 800 ຄົນ ໃນ 5 ແຂວງ ແລະ 9 ເມືອງ ພ້ອມທັງຕັ້ງຄ້າຍເຍົາວະຊົນໃນໄລຍະພັກແລ້ງ ແລະ ສືບຕໍ່ດຳເນີນສະໂມສອນເດັກໃນໄລຍະເປີດສົກຮຽນ ເພື່ອສົ່ງເສີມທັກສະພາສາລາວໃນການອ່ານ-ຂຽນ, ຄະນິດສາດ, ສຸຂະອະນາໄມ, ການຮຽນຮູ້ດ້ານສັງຄົມ ແລະ ອາລົມຈິດ.
ການຢ້ຽມຢາມໃນຄັ້ງນີ້ ໄດ້ສະທ້ອນໃຫ້ເຫັນເຖິງການຮ່ວມມືອັນແໜ້ນແຟ້ນລະຫວ່າງ ລັດຖະບານ ສປປ ລາວ ແລະ ປະເທດອົສຕຣາລີ ໃນການສົ່ງເສີມການສຶກສາ ໂດຍສະເພາະການຊ່ວຍເຫຼືອເດັກຍິງທີ່ມີຄວາມສ່ຽງຕໍ່ການປະລະການຮຽນໃນໄລຍະປ່ຽນຜ່ານຈາກຊັ້ນປະຖົມສຶກສາ ສູ່ ຊັ້ນມັດທະຍົມສຶກສາຕອນຕົ້ນ. ຄະນະຜູ້ແທນໄດ້ເຂົ້າຢ້ຽມຊົມກິດຈະກຳການຕັ້ງຄ້າຍໄລຍະພັກແລ້ງ ຂອງນັກຮຽນທີ່ໄດ້ຮັບເບ້ຍລ້ຽງ, ການຕັ້ງຄ້າຍແມ່ນເພື່ອເສີມສ້າງທັກສະພາສາລາວໃນການອ່ານ-ຂຽນ, ຄະນິດສາດ ພ້ອມທັງການຮຽນຮູ້ດ້ານສັງຄົມ ແລະ ອາລົມຈິດ.
ຜົນໄດ້ຮັບຂອງບັນດາຄູອາຈານທີ່ໄດ້ຈາກການຝຶກອົບຮົມ ມີທັກສະໃນການນຳພານັກຮຽນຈັດກິດ ຈະກຳການຕັ້ງຄ້າຍພັກແລ້ງ ເພື່ອກຽມຄວາມພ້ອມກ່ອນເຂົ້າຮຽນ ແລະ ເຫັນວ່າການຝຶກອົບຮົມພາຍໃຕ້ໂຄງການໄດ້ຊ່ວຍພັດທະນາຄວາມສາມາດໃນການຈັດການຮຽນການສອນໃຫ້ມີຄວາມມ່ວນຊື່ນ ແລະ ໃຫ້ຄວາມສຳຄັນໃນການມີສ່ວນຮ່ວມຂອງນັກຮຽນຫຼາຍຂຶ້ນ. ພ້ອມດຽວກັນນັ້ນ ການຕັ້ງຄ້າຍໄລຍະພັກແລ້ງ ໄດ້ຊ່ວຍສ້າງແຮງຈູງໃຈ, ສ້າງຄວາມໝັ້ນໃຈ ແລະ ຄວາມຮູ້ສຶກເປັນເຈົ້າການໃນການຮຽນຮູ້ຂອງຕົນເອງ. ນ້ອງນັກຮຽນທີ່ເຂົ້າຮ່ວມການຕັ້ງຄ້າຍຫຼາຍຄົນໄດ້ສະແດງຄວາມພໍໃຈຕໍ່ການຮຽນຮູ້ໃນສະພາບແວດລ້ອມທີ່ເປັນມິດ ແລະ ປອດໄພ ພ້ອມທັງຍ້ອງຍໍຄູອາຈານທີ່ເອົາໃຈໃສ່ຊ່ວຍເຮັດໃຫ້ການຮຽນມີຄວາມມ່ວນຊື່ນ ແລະ ມີຄວາມໝາຍຫຼາຍຂຶ້ນ.
 |
ການຢ້ຽມຢາມໄດ້ສິ້ນສຸດລົງດ້ວຍ ພິທີບາສີສູ່ຂວັນ ແລະ ການສະແດງສິນລະປະ ກ່ຽວກັບວັດທະນະທຳຊົນເຜົ່າອາຄາ, ເຜົ່າມົ້ງຂອງນັກຮຽນ ເພື່ອສະຫຼອງຄວາມຫຼາກຫຼາຍທາງດ້ານວັດທະນະທຳຂອງແຂວງຫຼວງນ້ຳທາ ແລະ ສະທ້ອນໃຫ້ເຫັນເຖິງຄວາມສາມັກຄີລະຫວ່າງໂຮງຮຽນ, ຄອບຄົວ ແລະ ຊຸມຊົນ ໃນການສົ່ງເສີມການສຶກສາ ແລະ ສະພາບການເປັນຢູ່ຂອງເດັກນ້ອຍ. ໃນໂອກາດນີ້, ທ່ານເອກອັກຄະລັດຖະທູດປະເທດອົສຕຣາລີ ປະຈຳ ສປປ ລາວ ຍັງໄດ້ມອບອຸປະກອນການຮຽນ ແລະ ອຸປະກອນກິລາ ເພື່ອສະໜັບສະໜູນການຮຽນການສອນຂອງໂຮງຮຽນ. (ແຫຼ່ງຂ່າວ: ສະຖານທູດອົສຕຣາລີ)
ຄໍາເຫັນ