ການຮ່ວມມືຕາມລ້ອງແມ່ນໍ້າລ້ານຊ້າງ-ແມ່ນໍ້າຂອງ ຮ່ວມກັນສ້າງອະນາຄົດທີ່ດີງາມກວ່າເກົ່າ

ວັນທີ 25 ທັນວາ 2023ຜ່ານມາ, ກອງປະຊຸມສຸດຍອດວ່າດ້ວຍການຮ່ວມມືແມ່ນໍ້າລ້ານຊ້າງ-ແມ່ນ້ຳຂອງຄັ້ງທີ 4 ໄດ້ຈັດຂຶ້ນໂດຍຜ່ານວິດີໂອທາງໄກ, ຜູ້ນຳຈີນ ແລະ 5 ປະເທດລ້ອງແມ່ນ້ຳຂອງ ຄື: ກຳປູເຈຍ, ລາວ, ມຽນມາ, ໄທ ແລະ ຫວຽດນາມ ໄດ້ເຂົ້າຮ່ວມກອງປະຊຸມ ໂດຍພາຍໃຕ້ຫົວຂໍ້ “ຊຸກຍູ້ການສ້າງປະຊາຄົມຮ່ວມຊາຕາກໍາຂອງບັນດາປະເທດລ້ອງແມ່ນ້ຳລ້ານຊ້າງ-ແມ່ນ້ຳຂອງ, ຮ່ວມກັນມຸ່ງໜ້າໄປສູ່ຄວາມທັນສະໄໝ”, ກອງປະຊຸມໄດ້ຫວນຄືນຄວາມຄືບໜ້າແຫ່ງການຮ່ວມມືລ້ອງແມ່ນໍ້າລ້ານຊ້າງ-ແມ່ນ້ຳຂອງ ແລະ ວາງແຜນການພັດທະນາໃນອະນາຄົດ.
ກອງປະຊຸມຄັ້ງນີ້ໄດ້ເຜີຍແຜ່ “ຖະແຫຼງການເນປີດໍຂອງກອງປະຊຸມສຸດຍອດວ່າດ້ວຍການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 4” “ແຜນແມ່ບົດແຫ່ງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຮອບ 5 ປີ (2023-2027)” ແລະ “ຂໍ້ລິເລີ່ມຮ່ວມ ໃນການສ້າງແລວທາງປະດິດສ້າງໃໝ່ລ້ອງແມ່ນ້ຳລ້ານຊ້າງ-ແມ່ນ້ຳຂອງ”, ໃນນັ້ນ, “ແຜນແມ່ບົດແຫ່ງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຮອບ 5 ປີ (2023-2027)” ໄດ້ລະບຸວ່າ, ຈະເພີ່ມທະວີການຮ່ວມມືໃນ 3 ເສົາຄ້ຳ (ຄວາມໝັ້ນຄົງທາງການເມືອງ, ເສດຖະກິດ ແລະ ການພັດທະນາແບບຍືນຍົງ, ສັງຄົມ ແລະ ວັດທະນະທໍາ), ລົງເລິກການຮ່ວມມືໃນ 5 ຂົງເຂດບຸລິມະສິດ (ເຊື່ອມໂຍງເຊື່ອມຈອດກັນ, ຄວາມສາມາດດ້ານການຜະລິດ, ເສດຖະກິດຂ້າມຊາດ, ຊັບພະຍາກອນນ້ຳ, ກະສິກຳ ແລະ ການຫຼຸດຜ່ອນຄວາມທຸກຍາກ), ຕັ້ງໜ້າຂະຫຍາຍການຮ່ວມມືໃນຂົງເຂດໃໝ່, ຊຸກຍູ້ການຍົກລະດັບໜ່ວຍງານຮ່ວມກັນໃນບັນດາຂົງເຂດບຸລິມະສິດໃຫ້ສູງຂຶ້ນ, ສະໜັບສະໜູນການສ້າງຕັ້ງໜ່ວຍງານປະສົມ ແລະ ສູນຮ່ວມມືໃໝ່.
ແຫຼ່ງຂ່າວ: CRI, App ເສດຖະກິດການຄ້າສໍານັກຂ່າວຊິນຮວາ