ໂອກາດນີ້, ຄະນະນໍາພະແນກທັງສອງແຂວງ ໄດ້ແລກປ່ຽນບົດຮຽນ ໂດຍໄດ້ຜັດປ່ຽນກັນລາຍງານການຈັດຕັ້ງປະຕິບັດການຈັດເກັບລາຍຮັບ ການປະຕິບັດລາຍຈ່າຍ ແລະ ວຽກງານວິຊາສະເພາະຂອງແຕ່ລະຂະແໜງການ. ທ່ານ ຄໍາຮູ້ ອ່ອນມະນີ ໃຫ້ຮູ້ວ່າ: ມາຮອດປັດຈຸບັນ, ການຈັດຕັ້ງປະຕິບັດຈັດເກັບລາຍຮັບ, ຄຸ້ມຄອງລາຍຈ່າຍ 4 ເດືອນກວ່າ ຕົ້ນປີ 2025 ສາມາດຈັດເກັບລາຍຮັບໄດ້ທັງໝົດ 153.45 ຕື້ກີບ ທຽບໃສ່ແຜນປີ ປະຕິບັດໄດ້ 24.87%, ທຽບໃສ່ໄລຍະດຽວຂອງປີຜ່ານມາ (131.66 ຕື້ກີບ) ເພີ່ມຂຶ້ນ 16.55%. ໃນນັ້ນ, ມີລາຍຮັບພູດສູນກາງ ປະຕິບັດຢູ່ທ້ອງຖິ່ນໄດ້ 45.4 ຕື້ກີບ, ທຽບໃສ່ແຜນປີເທົ່າກັບ 47.65%; ລາຍຮັບພູດທ້ອງຖິ່ນ ປະຕິບັດໄດ້ 108.05 ຕື້ກີບ ທຽບໃສ່ແຜນປີ ປະຕິບັດໄດ້ 20.71%, ໂດຍລາຍຮັບພູດທ້ອງຖິ່ນ ລວມມີ: ລາຍຮັບສ່ວຍສາອາກອນ ປະຕິບັດໄດ້ 71.02 ຕື້ກີບ ທຽບໃສ່ແຜນປີເທົ່າກັບ 15%, ລາຍຮັບຊັບສິນປະຕິບັດໄດ້ 37.03 ຕື້ກີບ ທຽບໃສ່ແຜນປີເທົ່າກັບ 51%.
ທ່ານ ຄໍາຮູ້ ອ່ອນມະນີ ກ່າວຕື່ມວ່າ: ການມາຢ້ຽມຢາມ ແລະ ພົບປະແລກປ່ຽນບົດຮຽນທາງດ້ານວິຊາການຂອງຄະນະນໍາພະແນກການເງິນ ແຂວງກວາງນາມໃນຄັ້ງນີ້ ແມ່ນເປັນການຮັດແໜ້ນ ແລະ ສືບຕໍ່ເສີມສ້າງສາຍພົວພັນ ຮ່ວມມືມິດຕະພາບ, ຄວາມສາມັກຄີແບບພິເສດ ທີ່ມີມູນເຊື້ອຂອງສອງພັກ-ສອງລັດ ເວົ້າລວມ, ເວົ້າສະເພາະສອງຂະແໜງການເງິນໃຫ້ເພີ່ມພູນຄູນສ້າງ ແລະ ແໜ້ນແຟ້ນຂຶ້ນເລື້ອຍໆ. ໃນໄລຍະຜ່ານມາ, ພະແນກການເງິນທັງ ສອງແຂວງ ເຊກອງ-ກວາງນາມ ໄດ້ສ້າງເງື່ອນໄຂ ແລະ ພົວພັນແລກປ່ຽນບົດຮຽນດ້ານວິຊາການ ລະຫວ່າງຂະແໜງລາຍຮັບ, ຂະແໜງລາຍຈ່າຍ ແລະ ຂະແໜງການອື່ນໆ. ໃນຕໍ່ໜ້າ ຈະສືບຕໍ່ພົວພັນຮ່ວມມືນໍາກັນໃຫ້ດີຂຶ້ນກວ່າເກົ່າ ໂດຍສະເພາແລກປ່ຽນບົດຮຽນທາງດ້ານວິຊາສະເພາະ ແລະ ການກໍ່ສ້າງຊັບພະຍາກອນມະນຸດດ້ານການເງິນ.
(ຂ່າວ: ພຸດທະສອນ)
ຄໍາເຫັນ