 |
ທ່ານ ນາງ ເພັດສະໝອນ ສອນ ຫົວໜ້າສູນສະຖິຕິແຫ່ງຊາດ ຄະນະຊີ້ນຳລະດັບຊາດສຳລັບການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ຜູ້ປະຈຳການ ແລະ ທ່ານ ບັກທີຢໍ ຄາດິໂຣຟຜູ້ຕາງໜ້າອົງການສະຫະປະຊາດກອງທຶນສຳລັບປະຊາກອນໄດ້ໃຫ້ກຽດເຂົ້າຮ່ວມເປັນປະທານຮ່ວມພິທີປິດຊຸດຝຶກອົບຮົມດັ່ງກ່າວ ຊຶ່ງໄດ້ດຳເນີນແຕ່ວັນທີ 15-26/6/2026 ພາຍໃຕ້ການສະໜັບສະໜູນທາງດ້ານເຕັກນິກຈາກອົງການສະຫະປະຊາດກອງທຶນສຳລັບປະຊາກອນ ແລະ ຄູ່ຮ່ວມພັດທະນາ; ທ່ານ ນາງ ເພັດສະໝອນ ສອນ ກ່າວວ່າ: ຈຸດປະສົງຂອງການຝຶກອົບຮົມຄັ້ງນີ້ແມ່ນເພື່ອຍົກລະດັບຄວາມອາດສາມາດໃຫ້ແກ່ ພະນັກງານສູນສະຖິຕິແຫ່ງຊາດກຽ່ວກັບຫຼັກການ, ວິທີການ ແລະ ການປະຕິບັດຕົວຈິງໃນການກວດແກ້ ແລະ ປຸ່ງແຕ່ງຂໍ້ມູນໂດຍນຳໃຊ້ AI. ຜ່ານການຮຽນນຳຊ່ຽວຊານສາກົນ, ນັກສຳມະນາກອນໄດ້ຮຽນຮູ້ກ່ຽວກັບຫຼັກການການກວດແກ້ຂໍ້ມູນການປຸງແຕ່ງຂໍ້ມູນລວມທັງການໃສ່ລະຫັດ ແລະ ການກວດແກ້ຄວາມສອດຄ່ອງຂອງຂໍ້ມູນທີ່ໄດ້ຈາກການລົງເກັບກຳຂໍ້ມູນຢູ່ພາກສະໜາມໃນທ້າຍປີ 2025 ແລະ ການສຳຫຼວດປະເມີນຄຸນນະພາບພາຍຫຼັງການສຳຫຼວດໃຫຍ່ ໃນເດືອນມີນາປີ 2026, ໂດຍນຳໃຊ້ລະບົບ AI ເຂົ້າໃນວຽກງານດັ່ງກ່າວ”.
ທ່ານຍັງກ່າວຕື່ມວ່າການຝຶກອົບຮົມກ່ຽວກັບການວິເຄາະວິໄຈຂໍ້ມູນຂອງການສຳຫຼວດຈະຈັດຂຶ້ນໃນເດືອນກໍລະກົດພາຍໃຕ້ແຜນຮ່ວມມືລະຫວ່າງສູນສະຖິຕິແຫ່ງຊາດ ແລະ ອົງການສະຫະປະຊາດກອງທຶນສຳລັບປະຊາກອນ. ຜົນສຳເລັດຂອງການຍົກລະດັບຄວາມຮູ້ຄວາມສາມາດໃຫ້ແກ່ພະນັກງານສູນສະຖິຕິແຫ່ງຊາດຈະສ້າງພື້ນຖານເພື່ອກ້າວໄປສູ່ການກຽມສ້າງບົດລາຍງານຜົນຂອງການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ປີ 2025 ສະບັບສົມບູນ ຊຶ່ງຄາດວ່າບົດລາຍງານດັ່ງຈະຖືກເຜີຍແຜ່ໃນ 2-3 ເດືອນຂ້າງໜ້າ.
ສປປ ລາວ ໄດ້ເລີ່ມຕົ້ນດຳເນີນຂະບວນການເກັບກຳຂໍ້ມູນພາກສະໜາມການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ປີ 2025 ແຕ່ວັນທີ 3 ພະຈິກປີ 2025 ຫາວັນທີ 28 ທັນວາ 2025 ພາຍຫຼັງສຳເລັດວາງແຜນ ແລະ ກະກຽມຄວາມພ້ອມດ້ານຕ່າງໆເປັນເວລາ 4 ປີພາຍໃຕ້ການຊ່ວຍເຫຼືອດ້ານວິຊາການຈາກອົງການສະຫະປະຊາດກອງທຶນສຳລັບປະຊາກອນ ແລະ ບັນດາຄູ່ຮ່ວມພັດທະນາເຊັ່ນ: ລັດຖະບານອົສຕຣາລີ, ສປ ຈີນ, ສະວິດ, ລຸກຊຳບວກ, ສະຫະລັດ ອາເມຣິກາ ແລະ ເຢຍລະມັນ; ການສຳຫຼວດຄັ້ງນີ້ ແນໃສ່ເກັບກຳຂໍ້ມູນເພື່ອຊີ້ໃຫ້ເຫັນສະພາບຊີວິດການເປັນຢູ່ ຂອງປະຊາຊົນ, ທ່າອ່ຽງການປ່ຽນແປງດ້ານປະຊາກອນ ແລະ ທີ່ຢູ່ອາໄສ. ຂໍ້ມູນດັ່ງກ່າວຈະເປັນພື້ນຖານທີ່ສຳຄັນແກ່ການສ້າງນະໂຍບາຍທີ່ອີງໃສ່ຫຼັກຖານ, ເປັນບ່ອນອີງໃຫ້ແກ່ການວາງແຜນພັດທະນາ, ຈັດສັນງົບປະມານ ແລະ ຕິດຕາມຄວາມຄືບໜ້າການຈັດຕັ້ງປະຕິບັດວຽກບຸລິມະສິດຂອງລັດຖະບານລວມທັງຕິດຕາມຄວາມຄືບໜ້າການຈັດຕັ້ງປະຕິບັດເປົ້າໝາຍພັດທະນາແບບຍືນຍົງ ແລະ ບັນດາຄຳໝາຍໝັ້ນຕໍ່ການຈັດຕັ້ງປະຕິບັດໜ້າວຽກງານຍຸດທະສາດອື່ນໆ.
 |
ໃນວັນທີ 30 ເມສາ ຜ່ານມາ, ຄະນະຊີ້ນຳລະດັບຊາດສຳລັບການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ໄດ້ເປີດກອງປະຊຸມເພື່ອທົບທວນຄວາມຄືບໜ້າໃນການຈັດຕັ້ງປະຕິບັດວຽກງານສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ປີ 2025. ນອກຈາກນີ້, ກອງປະຊຸມຍັງຮຽກຮ້ອງໃຫ້ສູນສະຖິຕິແຫ່ງຊາດ ແລະ ຄູ່ຮ່ວມງານໃຫ້ເອົາໃຈໃສ່ຈັດຕັ້ງປະຕິບັດວຽກງານສຳຫຼວດພົນລະເມືອງໃຫ້ໄປຕາມແຜນທີ່ກຳນົດໄວ້ ພ້ອມທັງສືບຕໍ່ ກວດກາ, ປຸງແຕ່ງ ແລະ ວິເຄາະຂໍ້ມູນເພື່ອຮັບປະກັນໃຫ້ການສ້າງບົດລາຍງານຜົນການສຳຫຼວດພົນລະເມືອງ ແລະ ທີ່ຢູ່ອາໄສສະບັບສົມບູນສຳເລັດຕາມແຜນທີ່ວາງໄວ້ ພ້ອມທັງມີຄຸນນະພາບສູງ; ທ່ານ ລຽນທອງ ສຸພານີ ຫົວໜ້າກົມສະຖິຕິເສດຖະກິດ-ສັງຄົມ, ສູນສະຖິຕິແຫ່ງຊາດທັງເປັນຫົວໜ້າຫ້ອງການສຳຫຼວດຂັ້ນສູນກາງໄດ້ກ່າວວ່າ: ພາຍຫຼັງທີ່ໄດ້ສຳເລັດການເກັບກຳຂໍ້ມູນພາກສະໜາມໃນທົ່ວປະເທດໃນທ້າຍປີ 2025 ແລະ ການສຳຫຼວດປະເມີນຄຸນນະພາບຫຼັງການສຳຫຼວດໃຫຍ່. ມາຮອດປັດຈຸບັນການສຳຫຼວດໄດ້ກ້າວເຂົ້າສູ່ ໄລຍະທ້າຍຂອງໂຄງການແລ້ວ ຊຶ່ງເປັນໄລຍະທີ່ນຳເອົາຂໍ້ມູນຈາກການເກັບກຳພາກສະໜາມມາວິເຄາະວິໄຈ, ຂຽນບົດລາຍງານຜົນຂອງການສຳຫຼວດ ແລະ ຈະໄດ້ເຜີຍແຜ່ຜົນຂອງການສຳຫຼວດໃນເວລາອັນໃກ້ນີ້; "ເຖິງວ່າໄດ້ປະເຊີນກັບສິ່ງທ້າທາຍຫຼາຍດ້ານ, ການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ປີ 2025 ໄດ້ດຳເນີນຕາມກຫຼັກການສາກົນ ແລະ ສາມາດປະຕິບັດຕາມແຜນທີ່ກຳນົດໄວ້. ຜົນສຳເລັດດັ່ງກ່າວສ່ອງແສງໃຫ້ເຫັນຄຳໝາຍໝັ້ນ, ການຮ່ວມມື, ການປະສານສົມທົບທີ່ເຂັ້ມແຂງລະຫວ່າງລັດຖະບານແຫ່ງ ສປປ ລາວ, ຄູ່ຮ່ວມພັດທະນາ ແລະ ພາກ ສ່ວນທີ່ກ່ຽວຂ້ອງ. ຜົນຂອງການສຳຫຼວດຄັ້ງນີ້ຈະເປັນຫຼັກຖານສຳຄັນເພື່ອນຳໃຊ້ເຂົ້າໃນການກຳນົດແຜນພັດທະນາ, ກຳນົດນະໂຍບາຍ ແລະ ຈັດສັນງົບປະມານແຫ່ງຊາດ,” ຜູ້ຕາງໜ້າອົງການສະຫະປະຊາດກອງທຶນສຳລັບປະຊາກອນທ່ານ ບັກທີຢໍຄາດິໂຣຟ ສະແດງຄວາມຍິນດີຕໍ່ຄວາມຄືບໜ້າໃນກາຈັດຕັ້ງປະຕິບັດການສຳຫຼວດພົນລະເມືອງໃນໄລຍະຜ່ານມາ ພ້ອມທັງໃຫຢືນຢັນຄືນຄຳໝາຍໝັ້ນຂອງອົງການທີ່ຈະສືບຕໍ່ໃຫ້ການຊ່ວຍເຫຼືອລັດຖະບານແຫ່ງ ສປປ ລາວ ບັນລຸຜົນສຳເລັດການສຳຫຼວດພົນລະເມືອງຄັ້ງນີ້.
“ຂະນະທີ່ພວກເຮົາພວມຫຍັບເຂົ້າໃກ້ຜົນສຳເລັດຂອງການຈັດຕັ້ງປະຕິບັດຂະບວນການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ປີ 2025, ພວກເຮົາຮັບຮູ້ວ່າເປົ້າໝາຍສູງສຸດຂອງການສຳຫຼວດພົນລະເມືອງແມ່ນເພື່ອປະຊາຊົນ. ຢູ່ເບື້ອງຫຼັງຂອງທຸກຂໍ້ມູນແມ່ນບຸກຄົນ, ຄອບຄົວ ແລະ ຊຸມຊົນ. ຜົນສຳຫຼວດຄັ້ງນີ້ຈະສະໜອງຫຼັກຖານທີ່ສຳຄັນສຳລັບການກຳນົດນະໂຍບາຍ ແລະ ເປັນບ່ອນອີງໃນການຈັດສັນການລົງທຶນ ແລະ ການກຳນົດແນວທາງການພັດທະນາແນໃສ່ຍົກລະດັບຊິວິດເປັນຢູ່ຂອງປະຊາຊົນໂດຍສະເພາະແມ່ຍິງ, ຊາວໜຸ່ມ ແລະ ຜູ້ສູງອາຍຸລວມທັງຜູ້ດ້ອຍໂອກາດ. ໂດຍຮັບປະກັນໃຫ້ທຸກຄົນໄດ້ຮັບການຈົດນັບ, ພວກເຮົາຈຶ່ງສາມາດຮັບປະກັນໃຫ້ທຸກຄົນຖືກເບິ່ງເຫັນ, ຖືກໄດ້ຍິນ ແລະ ມີໂອກາດປະກອບສ່ວນເຂົ້າໃນສ້າງສາພັດທະນາປະເທດຊາດ.
(ແຫຼ່ງຂ່າວ: UNDP)
ຄໍາເຫັນ