ຮຽນບັນດາສະຫາຍ,
ເນື່ອງໃນໂອກາດດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງ ພັກກອມມູນິດຫວຽດນາມ ທີ່ມີກຽດສະຫງ່າ, ຕາງໜ້າ ພັກປະຊາຊົນປະຕິວັດລາວ ແລະ ປະຊາຊົນລາວບັນດາເຜົ່າ, ຄະນະບໍລິຫານງານສູນກາງພັກປະຊາຊົນປະຕິວັດລາວ ມີຄວາມປິຕິຊົມຊື່ນເປັນຢ່າງຍິ່ງ ແລະ ຂໍສົ່ງຄວາມສາມັກຄີຮັກແພງ ອັນສະໜິດສະໜົມຖານສະຫາຍອ້າຍນ້ອງ ແລະ ຄໍາອວຍພອນໄຊອັນປະເສີດມາຍັງ ກອງປະຊຸມໃຫຍ່ ແລະ ຜ່ານກອງປະຊຸມໃຫຍ່ໄປຍັງ ສະມາ ຊິກພັກ ແລະ ປະຊາຊົນຫວຽດນາມອ້າຍນ້ອງ ທຸກຖ້ວນໜ້າ.
ພວກຂ້າພະເຈົ້າ ຂໍສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ຜົນສໍາເລັດອັນໃຫຍ່ຫຼວງ, ຮອບດ້ານ ແລະ ມີຄວາມໝາຍປະຫວັດສາດ ທີ່ ພັກ, ລັດ ແລະ ປະຊາຊົນຫວຽດນາມອ້າຍນ້ອງ ຍາດມາໄດ້ຕະຫຼອດໄລຍະ 80 ປີ ແຫ່ງການສະຖາປະນາ ສາທາລະນະລັດ ສັງຄົມນິຍົມຫວຽດນາມ, ໂດຍສະເພາະແມ່ນ ໄລຍະ 40 ປີ ດໍາເນີນພາລະກິດປ່ຽນແປງໃໝ່ຢ່າງຮອບດ້ານ, ປະຕິບັດ ມະຕິກອງປະຊຸມໃຫຍ່ ຄັ້ງທີ XIII ຂອງພັກ ແລະ ແຜນພັດທະນາເສດຖະກິດ - ສັງຄົມ ໃນແຕ່ລະສະໄໝ ໄດ້ຢ່າງມີໄຊ ໂດຍພາຍໃຕ້ການນໍາພາຂອງ ພັກກອມມູນິດຫວຽດນາມ ເຮັດໃຫ້ຫວຽດນາມມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ, ເສດຖະກິດມີການພັດທະນາດ້ວຍຈັງຫວະສູງຢ່າງຕໍ່ເນື່ອງ; ບົດບາດ, ອິດທິພົນຂອງ ສສ ຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ. ບັນດາຜົນສໍາເລັດດັ່ງກ່າວ ເປັນການຢືນຢັນເຖິງການນໍາພາອັນສະຫຼາດສ່ອງໃສ, ຖືກຕ້ອງ ແລະ ປະດິດສ້າງຂອງ ພັກກອມມູນິດຫວຽດນາມ, ທັງເປັນການສະແດງເຖິງຄວາມເດັດດ່ຽວໜຽວແໜ້ນຂອງ ພັກ, ລັດ ແລະ ປະຊາຊົນຫວຽດນາມ ທີ່ມີຄວາມບາກບັ່ນພະຍາຍາມກ້າວຂຶ້ນດ້ວຍເຫງົ້າພະລັງມະຫາສາມັກຄີອັນເປັນປຶກແຜ່ນຂອງທົ່ວທັງຊາດ ເພື່ອບັນລຸເປົ້າໝາຍ ປະຊາຊົນມີຄວາມຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທໍາ ແລະ ສີວິໄລ.
ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງ ພັກກອມມູນິດຫວຽດນາມ ເປັນເຫດການການເມືອງທີ່ສໍາຄັນຍິ່ງ ຂອງທົ່ວ ພັກ, ລັດ ແລະ ປະຊາຊົນຫວຽດນາມ, ເປັນຂີດໝາຍ ແຫ່ງການພັດທະນາໄລຍະໃໝ່ ຂອງການປະຕິວັດ ຫວຽດນາມ ຊຶ່ງຈະກໍານົດແນວທາງ, ເປົ້າໝາຍ ເພື່ອສືບຕໍ່ຍູ້ແຮງພາລະກິດປ່ຽນແປງໃໝ່ຢ່າງຮອບດ້ານ, ເປັນລະບົບຄົບຊຸດ, ກວ້າງຂວາງ ແລະ ເລິກເຊິ່ງ, ນຳພາປະເທດຊາດກ້າວເຂົ້າສູ່ສັງກາດໃໝ່ - ສັງກາດແຫ່ງການກ້າວຂຶ້ນຂອງຊົນຊາດຫວຽດນາມ; ບົນພື້ນຖານຂອງການເສີມຂະຫຍາຍໝາກຜົນຂອງກອງປະຊຸມໃຫຍ່ ຄັ້ງທີ XIII ຂອງພັກ, ພວກຂ້າພະເຈົ້າ ເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນສະຫຼາດສ່ອງໃສ ແລະ ປີຊາສາມາດຂອງ ພັກກອມມູນິດຫວຽດນາມ, ປະຊາຊົນຫວຽດນາມອ້າຍນ້ອງ ຈະສືບຕໍ່ຍາດໄດ້ຜົນສໍາເລັດໃໝ່, ໃຫຍ່ຫຼວງກວ່າເກົ່າ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIV ຂອງພັກ ໄດ້ຢ່າງມີໄຊ.
ຮຽນບັນດາສະຫາຍ,
ພັກປະຊາຊົນປະຕິວັດລາວ ແລະ ພັກກອມມູນິດຫວຽດນາມ ມີຕົ້ນກໍາເນີດມາຈາກ ພັກກອມມູນິດອິນດູຈີນ ທີ່ມີອຸດົມການປະຕິວັດອັນດຽວກັນ. ພັກ, ລັດ ແລະ ປະຊາຊົນລາວບັນດາເຜົ່າ ຂໍຢືນຢັນຢ່າງສະເໝີຕົ້ນສະເໝີປາຍວ່າ ເຖິງວ່າສະພາບການຂອງໂລກ ຈະມີການຜັນແປໄປແນວໃດກໍຕາມ, ພວກຂ້າພະເຈົ້າ ຈະສືບຕໍ່ຮ່ວມກັບ ພັກ, ລັດ ແລະ ປະຊາຊົນຫວຽດນາມ ພ້ອມກັນປົກປັກຮັກສາ, ຖະນຸຖະໜອມ ແລະ ເສີມຂະຫຍາຍສາຍພົວພັນສາມັກຄີພິເສດ ອັນເປັນມູນເຊື້ອ ທີ່ປະທານ ໂຮ່ຈິມິນ ຜູ້ນໍາທີ່ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ໄດ້ວາງຮາກຖານ ແລະ ສືບຕໍ່ໄດ້ຮັບການເພີ່ມພູນຄູນສ້າງ ໂດຍບັນດາຮຸ່ນການນຳ, ນັກຮົບປະຕິວັດ ແລະ ປະຊາຊົນສອງຊາດ ຈົນກາຍເປັນມໍລະດົກລວມອັນລ້ຳຄ່າຂອງສອງຊາດ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງຊາດ, ເປັນໜຶ່ງໃນປັດໄຈຕັດສິນໄຊຊະນະຂອງການປະຕິວັດຢູ່ແຕ່ລະປະເທດ. ສາຍພົວພັນພິເສດ ລາວ-ຫວຽດ ນາມ ບໍ່ໄດ້ຈືດຈາງໄປຕາມການເວລາ ແຕ່ກົງກັນຂ້າມໄດ້ເພີ່ມທະວີ ແລະ ມີຄວາມໄວ້ເນື້ອເຊື່ອໃຈທາງດ້ານການເມືອງໃນລະດັບສູງ. ໃນສະພາບການໃໝ່, ສອງຝ່າຍ ໄດ້ເປັນເອກະພາບຍົກລະດັບການພົວພັນຂຶ້ນເປັນ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລາວ-ຫວຽດນາມ ເຊິ່ງສະແດງໃຫ້ເຫັນເຖິງຄວາມຕັດສິນໃຈທາງດ້ານການເມືອງ ໃນລະດັບສູງສຸດຂອງການນໍາຂັ້ນສູງສອງປະເທດ ໃນການຍົກລະດັບການພົວພັນ ລາວ-ຫວຽດນາມ ຂຶ້ນສູ່ລະດັບສູງໃໝ່, ເລິກເຊິ່ງກວ່າເກົ່າ ແລະ ແທດເໝາະກັບໄລຍະການພັດທະນາໃໝ່.
ເນື່ອງໃນໂອກາດອັນສະຫງ່າລາສີນີ້, ພວກຂ້າພະເຈົ້າ ຂໍສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ຢ່າງໃຫຍ່ ຫຼວງ, ລ້ຳຄ່າ, ໝົດຈິດໝົດໃຈ, ມີປະສິດທິຜົນ ແລະ ທັນການແກ່ ພັກ, ລັດ ແລະ ປະຊາຊົນລາວ ໃນພາລາກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄື ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງພວກຂ້າພະເຈົ້າ ໃນປັດຈຸບັນ.
ຂໍອວຍພອນໃຫ້ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງ ພັກກອມມູນິດຫວຽດນາມ ຈົ່ງປະສົບຜົນສໍາເລັດຢ່າງສະຫງ່າງາມ.
ອວຍພອນໃຫ້ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງສວຍສົດງົດງາມ ແລະ ໝັ້ນຄົງຂະໜົງແກ່ນຕະຫຼອດໄປ.
ຄໍາເຫັນ