ໂອກາດນີ້, ຫົວໜ້າຄະນະຂອງທັງສອງຝ່າຍ ໄດ້ຜັດປ່ຽນກັນຂຶ້ນລາຍງານສະພາບການພັດທະນາເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານກໍ່ສ້າງພັກ-ພະນັກງານ ແລະ ຜົນສຳເລັດໃນການຈັດຕັ້ງປະຕິບັດບົດບັນທຶກຊ່ວຍຈຳລະຫວ່າງຄະນະຈັດຕັ້ງທັງ 2 ແຂວງໃນໄລຍະຜ່ານມາ.
ສະຫາຍ ບົວສອນ ມະຫາວົງ ໄດ້ຍົກໃຫ້ຮູ້ວ່າ: ທົ່ວແຂວງສະຫວັນນະເຂດ ມີສະມາຊິກພັກທັງໝົດ 34,810 ສະຫາຍ ຍິງ 10,262 ສະຫາຍ; ໄດ້ຄົ້ນຄວ້າອອກບັດ-ມອບບັດໃຫ້ສະມາຊິກພັກສົມບູນສໍາເລັດແລ້ວຈໍານວນ 33 ຊຸດ, ມີສະມາຊິກພັກໄດ້ຮັບບັດແລ້ວ 27,007 ສະຫາຍ, ກວມ 83.76%, ມີພະນັກງານ-ລັດຖະກອນທົ່ວແຂວງ 14,980 ຄົນ ຍິງ 8,008 ຄົນ. ສໍາເລັດການສ້າງແຜນກໍານົດພະນັກງານນໍາພາ-ຄຸ້ມຄອງໃນ 14 ເມືອງ, 1 ນະຄອນ, 36 ພະແນກການ-ທຽບເທົ່າອ້ອມຂ້າງແຂວງ ເພື່ອກະກຽມບຸກຄະລາກອນໃຫ້ແກ່ກອງປະຊຸມໃຫຍ່ 3 ຂັ້ນຂອງພັກ;
ມາຮອດປັດຈຸບັນ ແຂວງສະຫວັນນະເຂດ ສາມາດຄົ້ນຄວ້າ ແລະ ນໍາສົ່ງພະນັກງານໄປຍົກລະດັບທິດສະດີຊັ້ນກາງທີ່ໂຮງຮຽນການເມືອງເລຢວນ ແຂວງກວາງຈິ ຈໍານວນ 14 ຊຸດ, ມີພະນັກງານນໍາພາ-ຄຸ້ມຄອງທີ່ຜ່ານການຍົກລະດັບທັງໝົດ ຈໍານວນ 325 ສະຫາຍ ແລະ ກໍາລັງສຶກຢູ່ ແມ່ນຮຸ່ນທີ XIV ຈໍານວນ 25 ສະຫາຍ ຍິງ 5 ສະຫາຍ.
ໃນກອງປະຊຸມ, ຄະນະແທນທັງສອງແຂວງ ກໍໄດ້ມີການສົນທະນາແລກປ່ຽນບົດຮຽນຮ່ວມກັນ ແລະ ຍັງມີການມອບຂອງຂວັນທີ່ລະນຶກເຊິ່ງກັນ ແລະ ກັນນຳອີກ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ