ຄະນະປະຕິບັດງານພິເສດແຫ່ງ ສສ ຫວຽດນາມມອບໃບຍ້ອງຍໍ ໃຫ້ກົມກອງລວມໝູ່ ແລະ ບຸກຄົນ

ເມື່ອບໍ່ດົນມານີ້ ທີ່ສະໂມສອນຂອງເມືອງຄອບ ແຂວງໄຊຍະບູລີ ໄດ້ຈັດພິທີມອບໃບຍ້ອງຍໍຂອງຄະນະປະຕິບັດງານພິເສດແຫ່ງ ສສ ຫວຽດນາມ ໃຫ້ກົມກອງລວມໝູ່ ແລະ ບຸກຄົນ,ໂດຍການເປັນປະທານຂອງ ສະຫາຍ ພັອ ດາວນ້ອຍ ບຸດບົວທອງ ຄະນະປະຈໍາພັກແຂວງ ຫົວໜ້າການເມືອງ ກອງບັນຊາການທະຫານແຂວງໄຊຍະບູລີ, ມີສະຫາຍ ແພງຊ້ອຍ ແພງເມືອງ ກໍາມະການພັກແຂວງ ເລຂາພັກເມືອງ ເຈົ້າເມືອງໆຄອບ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ອົງການ, ກົມກອງທີ່ກ່ຽວຂ້ອງເຂົ້າຮ່ວມ.
ໃນພິທີ ສະຫາຍ ພັທ ຄໍາປ່ຽງ ແດນມີໄຊ ຫົວໜ້າພະແນກພົວພັນຕ່າງປະເທດ ກໍໄດ້ຜ່ານບົດບັນທຶກ ວ່າດ້ວຍການມອບ-ຮັບ ວັດຖຸ,ຍ້ອງຍໍຂອງຄະນະປະຕິບັດງານພິເສດ ສສ ຫວຽດນາມ ສົກປີ 2013-2020 ໃຫ້ແກ່ກົມກອງລວມໝູ່ ແລະ ບຸກຄົນ ທີ່ໄດ້ປະກອບສ່ວນໃນການລົງສໍາຫຼວດເກັບກໍາຂໍ້ມູນຄົ້ນອັດຖິຂອງທະຫານອາສາສະໝັກຫວຽດນາມທີ່ເສຍສະຫຼະຊີວິດຢູ່ແຂວງໄຊຍະບູລີ, ອີງຕາມຂໍ້ຕົກລົງຂອງຄະນະປະຕິບັດງານພິເສດລັດຖະບານລາວ ລົງວັນທີ 8 ກັນຍາ 2023 ວ່າດ້ວຍການນໍາສົ່ງວັດຖຸຍ້ອງຍໍຂອງຄະນະປະຕິບັດງານພິເສດ ສສ ຫວຽດນາມ: ຄະນະປະຕິບັດງານພິເສດເຫັນດີມອບໃບຍ້ອງຍໍໃຫ້ແກ່ກົມກອງລວມໝູ່ 3 ກົມກອງຄື: ກອງບັນຊາການທະຫານເມືອງ, ຫ້ອງການແຮງງານ ແລະ ສະຫວັດດີການສັງຄົມເມືອງ ແລະ ບ້ານປາງໄຮ. ໃນນີ້ ມອບໃບຍ້ອງຍໍລັດຖະບານ ສສ ຫວຽດນາມ 3 ກົມກອງ ແລະ ໃບຍ້ອງຍໍກະຊວງປ້ອງກັນປະເທດ ສສ ຫວຽດນາມ ຈໍານວນ 2 ສະຫາຍ. ໃນໂອກາດນີ້ ສະຫາຍ ພັອ ດາວນ້ອຍ ບຸດບົວທອງ ຄະນະປະຈໍາພັກແຂວງ ຫົວໜ້າການເມືອງ ກອງບັນຊາການທະຫານແຂວງໄຊຍະບູລີ ກໍໄດ້ຂຶ້ນກ່າວມອບໃບຍ້ອງຍໍຂັ້ນລັດຖະບານ ສສ ຫວຽດນາມ ແລະ ສະຫາຍ ແພງຊ້ອຍ ແພງເມືອງ ກໍໄດ້ຂຶ້ນກ່າວມອບ ໃບຍ້ອງຍໍກະຊວງປ້ອງກັນປະເທດ ສສ ຫວຽດນາມ ຕາມລໍາດັບ.
ໃນພິທີດັ່ງກ່າວ, ສະຫາຍ ພັທ ອໍາໄພ ອຸ່ມສາພົນ ຄະນະພັກກອງບັນຊາການ ຮອງຫ້ອງພາລາພິການທະຫານແຂວງ ກໍໄດ້ຂຶ້ນຜ່ານຂໍ້ຕົກລົງ ສະບັບເລກທີ 6681/ກມທ ລົງວັນທີ 16 ຕຸລາ 2023 ວ່າດ້ວຍການແຕ່ງຕັ້ງຫົວໜ້າພະແນກບໍລິຫານ ກອງບັນຊາການທະຫານເມືອງຄອບ ກົມໃຫຍ່ການເມືອງກອງທັບ ຕົກລົງແຕ່ງຕັ້ງສະຫາຍ ພັຕ ຢາເຮີ ເກີບົວວາ ເປັນຫົວໜ້າພະແນກບໍລິຫານ ກອງບັນຊາການທະຫານເມືອງຄອບ; ຂໍ້ຕົກລົງ ສະບັບເລກທີ 662/ກບຊ ລົງວັນທີ 25 ຕຸລາ 2023 ວ່າດ້ວຍການແຕ່ງຕັ້ງຫົວໜ້າ ແລະ ຮອງກອງບັນຊາການທະຫານເມືອງຄອບ ກອງບັນຊາການທະຫານແຂວງຕົກລົງ ແຕ່ງຕັ້ງ ສະຫາຍ ພັທ ສົມບຸ ດີເພັດໄທ ເປັນຫົວໜ້າການເມືອງ ກອງບັນຊາການທະຫານເມືອງຄອບ, ສະຫາຍ ພັທ ແສງຈັນ ສຸລິຂັນ ເປັນຫົວໜ້າການທະຫານ ກອງບັນຊາການທະຫານເມືອງຄອບ, ສະຫາຍ ພັຕ ແກ້ວວິໄລ ວົງແສງແກ້ວ ເປັນຮອງການເມືອງ ທັງເປັນຫົວໜ້າພະແນກການເມືອງ ກອງບັນຊາການທະຫານເມືອງຄອບ; ຂໍ້ຕົກລົງສະບັບເລກທີ 728/ກບຊ ລົງວັນທີ 6 ຕຸລາ 2023 ວ່າດ້ວຍຄໍາສັ່ງຍົກຍ້າຍພະນັກງານ ກອງບັນຊາການທະຫານແຂວງ ໄດ້ຍົກຍ້າຍ ສະຫາຍ ຮອ ນາງ ວັນດີ ກອງຊັບ ຄອມພິວເຕີ ກອງບັນຊາການທະຫານເມືອງຄອບ ມາໃຫ້ຫ້ອງການເມືອງ ແລະ ຂໍ້ຕົກລົງ ສະບັບເລກທີ 700/ກບຊ ລົງວັນທີ 8 ພະຈິກ 2023 ວ່າດ້ວຍການອະນຸມັດໃຫ້ພະນັກງານພັກການເພື່ອລໍຖ້າຮັບເບ້ຍບໍານານ ກອງບັນຊາການທະຫານແຂວງຕົກລົງ ອະນຸມັດໃຫ້ ສະຫາຍ ພັທ ເຂັມໃຈ ຍິ່ງສົມບູນ ຫົວໜ້າການທະຫານ ກອງບັນຊາການທະຫານເມືອງ ພັກການລໍຖ້າຮັບເບ້ຍບໍານານ.
ຂ່າວ-ພາບ: ພົມມະນີ ອິນສະຫວັນ