 |
ການມາຢ້ຽມຢາມຄັ້ງນີ້, ທ່ານ ເສນ ພັັນລັກ ໄດ້ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງ ໃນໄລຍະ 1 ປີຜ່ານມາໂດຍຫຍໍ້ວ່າ: ເມືອງພຽງ ປະກອບມີ51 ບ້ານ, ມີ 11 ພັນກວ່າຄອບຄົວ, ມີ 60 ພັນກວ່າຄົນ . ສາມາດຜະລິດເຂົ້າໄດ້ທັງໝົດ 39 ພັນກວ່າໂຕ່ນສະເລ່ຍໃສ່ຫົວຄົນໄດ້ 609 ກິໂລ/ຄົນ/ປີ, ຜະລິດພືດເປັນສິນຄ້າ ໄດ້ 4 ແສນກວ່າໂຕ່ນ ແລະ ພືດສະບຽງອາຫານໄດ້ 4 ພັນກວ່າໂຕ່ນ. ການລ້ຽງສັດກໍມີການຂະຫຍາຍຕົວ ສາມາດສະໜອງຊີ້ນ, ໄຂ່ ແລະ ປາສະເລ່ຍໃສ່ຫົວຄົນໜຶ່ງ 50 ກວ່າກິໂລ/ຄົນ/ປີ, ສົ່ງອອກສິນຄ້າທັງໝົດ 640 ກວ່າຕື້ກີບ ໂດຍສະເພາະແມ່ນສິນຄ້າທີ່ປະຊາຊົນຜະລິດ ແລະ ນັກລົງທຶນຕ່າງປະເທດມາລົງທຶນຢູ່ພາຍໃນເມືອງເປັນຕົ້ນແມ່ນເຂົ້າ, ສາລີ, ໝາກເດືອຍ, ຢາງພາລາ, ມັນຕົ້ນ ຖົ່ວເຫຼືອງ, ໝາກໂມ, ໝາກກ້ວຍ ແລະ ສັດລ້ຽງ.
ຕາງໜ້າຄະນະຜູ້ແທນຈາກເມືອງລ້າກໍໄດ້ລາຍງານການພັດທະນາເສດຖະກິດ-ສັງຄົມຢູ່ເມືອງລ້າ ສປ ຈີນໂດຍສະເພາະແມ່ນການຜະລິດກະສິກຳ ແລະ ແຜນຄວາມຕ້ອງການດ້ານສະບຽງອາຫານ. ຈາກນັ້ນ, ທັງສອງຝ່າຍ ກໍໄດ້ປຶກສາຫາລືກ່ຽວກັບການສົ່ງເສີມການລົງທຶນໃນຂົງເຂດກະສິກໍາ, ປຶກສາຫາລືກ່ຽວກັບ ການນໍາເຂົ້າ-ສົ່ງອອກ, ການຜະລິດກະສິກໍາ ແລະ ສົ່ງອອກຜົນຜະລິດທາງດ້ານກະສິກໍາ ພ້ອມທັງໄດ້ແລກປ່ຽນບົດຮຽນ, ເຕັກນິກດ້ານວິຊາການເຊິ່ງກັນ ແລະ ກັນໂດຍມີຈຸດປະສົງໃນການຈັດຕັ້ງ ປະຕິບັດໂຄງການປູກພຶດທາງເລືອກ ແລະ ໂຄງການລ້ຽງງົວທີ່ນໍາເຂົ້າຈາກ ສປ ຈີນ, ລະຫວ່າງ ອົງການປົກຄອງ ເມືອງລ້າ ແຂວງຢູນນານ ແລະ ອົງການປົກຄອງເມືອງພຽງ ແຂວງ ໄຊຍະບູລີໃຫ້ໄດ້ຮັບການພັດທະນາດີຂຶ້ນຕື່ມອີກ.
(ຂ່າວ: ວົງສະຫວັນ ສຸທິໂວຫານ)
ຄໍາເຫັນ